வெளியே வா...

வெளியே வா...
இங்கே,
இடியும் மழையும்
வெயிலும் புயலும்
இருட்டும் பகலும் இயற்கை..
வெளியே வா...

இங்கே,
வழி நெடுக முட்கள்..
உன் பாதங்களை
இட்றி விடும் கற்கள்..
இதயத்தை இரணமாக்கும்
எதிரிகளின் சொற்கள்..
இருந்தாலும் பரவாயில்லை..
வெளியே வா..!

சஞ்சிக்கூலிகளாய் வந்தோம்..
இன்னமும்
மாதக் கூலிகளாய்..

நீ கேட்கும் முன்னூரு
முழுசாய் கிடைக்கும் போது
உன்,
கண்ணீர் கூட வற்றிப் போயிருக்கும்..!
வெளியே வா..!

இங்கே..
பிழைக்க வந்த இந்தோனீசியனும்
இரண்டாயிரம் பெறுகிறான்..

பிறப்புரிமை கொண்ட உனக்கு மட்டும்
வெறும் முன்னூறு!!!

இருபது இருபது இலட்சியம்
உனக்கு மட்டும்
விதிவிலக்கா என்ன?
வெளியே வா..!!!

இனியும்,
தொலைத்து விட்ட வாழ்க்கையை
தோட்டத்திலேயே தேடிக்கொண்டிருக்காதே..!

பட்டணத்தில்
எலிகள் கூட பருத்து இருக்கின்றன..

புலியென நீ வந்தால்..
புவியே உனதாகும்!
தோல்விகளை
தோட்டத்திலேயே விட்டு விட்டு
வெற்றிக் கனிகளைபறிக்க
வெளியே வா..

ஒன்று மட்டும் உறுதி!

இன்று,
உனக்கு கிட்டாவிட்டாலும்
உன் பிள்ளைக்காவதுகிட்டும் - வெற்றி..
நினைவில் கொள்!!!

-கிருஷ்ணமூர்த்தி

பிறப்புரிமை கொண்ட உனக்கு மட்டும்
வேற்றும் முன்னூறு!!!

அது வேற்றும் அல்ல நண்பரே.. "வெறும்.."
தவறு என்னுடையதுதான்.. எனது வலைப்பக்கத்தில் திருத்தி விட்டேன்.. நீங்களும் திருத்தினால் மகிழ்ச்சி கொள்வேன்..

சுட்டிக்காட்டியமைக்கு நன்றி கவிஞரே, திருத்திவிட்டேன்!