அறிமுக டெஸ்டில் ரெய்னா சதம்!

அறிமுக டெஸ்டில் சதம் அடித்து சாதனை புரிந்துள்ளார் இந்திய வீரர் சுரேஷ் ரெய்னா.
இந்தியா - இலங்கை அணிகளுக்கு இடையேயான இரண்டாவது டெஸ்ட்போட்டி சிங்கள ஸ்போர்ட்ஸ் மைதானத்தில் நடந்து வருகிறது. முதலில் ஆடிய இலங்கை அணி 642 ரன்களுக்கு டிக்ளேர் செய்தது. பின்னர் ஆடி வரும் இந்திய அணி 4வது நாளான இன்று 4 விக்கெட்டுகளை இழந்து 471 ரன்கள் எடுத்துள்ளது.

நேற்றைய ஆட்டத்தின் முடிவில் இந்தியா 382 ரன்கள் எடுத்திருந்தது. சச்சின் தன்னுடைய 48 ஆவது சதத்தை அடித்து 108 ரன்கள் எடுத்திருந்தார். சுரேஷ் ரெய்னா 66 ரன்கள் எடுத்திருந்தார்.

இன்றும் தொடர்ந்து விளையாடிய இந்த ஜோடி தற்சமயம் வரை விளையாடி வருகிறது. சச்சின் 255 பந்துகளில் 146 ரன்கள் அடித்துள்ளார்.

டெஸ்ட் போட்டியில் முதல் முறையாக களமிறங்கியுள்ள சுரேஷ் ரெய்னா அறிமுக டெஸ்டிலேயே சதம் அடித்தார். 208 பந்துகளில் அவர் 106 ரன்கள் எடுத்திருக்கிறார். அறிமக டெஸ்டில் சதமடித்த 12 ஆவது இந்திய வீரர் என்ற பெருமையை சுரேஷ் ரெய்னா பெற்றுள்ளார்.