"டிசம்பர் 16' பாலியல் வன்கொடுமை வழக்கு: தூக்கு தண்டனையை உறுதி செய்ய இன்று தில்லி உயர் நீதிமன்றம் விசாரணை

"டிசம்பர் 16' பாலியல் வன்கொடுமை வழக்கில் தீர்ப்பளிக்கப்பட்ட நான்கு பேரின் தூக்குத் தண்டனையை உறுதி செய்வதற்கான விசாரணை தில்லி உயர் நீதிமன்றத்தில் இன்று நடைபெறுகிறது.

நீதிபதி ரேவா கேத்ரபால் தலைமையில் அடங்கிய உயர் நீதிமன்ற பெஞ்ச் இந்த விசாரணையை மேற்கொள்ளும். இந்த வழக்கில் குற்றவாளிகளாக அறிவிக்கப்பட்ட முகேஷ் (26), அக்ஷய் தாகுர் (28), பவன் குப்தா (19), வினய் சர்மா (20) ஆகியோருக்கு தூக்குத் தண்டனை விதித்து தில்லி சாகேத் விரைவு நீதிமன்ற கூடுதல் அமர்வு நீதிபதி யோகேஷ் கன்னா செப்டம்பர் 13-ஆம் தேதி தீர்ப்பளித்தார். மாவட்ட நீதிமன்றத்தில் தூக்குத் தண்டனை விதிக்கப்பட்டால் அது குறித்த தகவலை உயர் நீதிமன்றத்துக்குத் தெரிவித்து, தண்டனையை உறுதி செய்ய வேண்டும் என்று சட்டம் உள்ளது. அதன்படி இந்த வழக்கின் குற்றவாளிகள் ஒவ்வொருவரின் தூக்குத் தண்டனையை தில்லி உயர் நீதிமன்றம் திங்கள்கிழமை விசாரிக்க உள்ளது. சாகேத் விரைவு நீதிமன்றம் அளித்த தீர்ப்பை உயர் நீதிமன்றம் உறுதி செய்த பிறகே தூக்குத் தண்டனையை நிறைவேற்ற முடியும்.

கடந்த ஆண்டு டிசம்பர் 16-ஆம் தேதி ஓடும் பேருந்தில் துணை மருத்துவ மாணவி பாலியல் வன்கொடுமைக்கு ஆளாகி உயிரிழந்தார். அது தொடர்பாக மைனர் உள்பட ஆறு பேர் மீது கூட்டுப் பாலியல் வன்கொடுமை மற்றும் கொலை வழக்குப் பதிவு செய்யப்பட்டது.

சாகேத் விரைவு நீதிமன்றத்தில் கூடுதல் அமர்வு நீதிபதி யோகேஷ் கன்னா முன்னிலையில் விசாரணை நடைபெற்று வந்த நேரத்தில், முக்கிய குற்றவாளியான பேருந்து ஓட்டுநர் ராம்சிங் (34) கடந்த மார்ச் 11-இல் திஹார் சிறையில் தூக்கிட்டு இறந்தார். சிறார் நீதிமன்றத்தில் நடைபெற்ற மைனர் மீதான குற்றச்சாட்டுகள் தொடர்பான விசாரணையின் முடிவில், மூன்று ஆண்டு தண்டனையை சீர்திருத்தப் பள்ளியில் கழிக்க வேண்டும் என்று உத்தரவிடப்பட்டது. மற்ற நான்கு பேரின் மீதான விசாரணை முடிவில் அவர்கள் நால்வருக்கும் தூக்குத் தண்டனை விதித்து நீதிபதி யோகேஷ் கன்னா தீர்ப்பளித்தார்.
.


நன்றி தினமணி

எதுக்கு பேசாம இவனுக்கால ஓட வீடு சுடுங்க