தமிழ்நாட்டின் பாரம்பரியக் கலை - பாரெங்கும் பரவும் பறை

தமிழ்நாட்டின் பாரம்பரியக் கலையான பறை இசை அமெரிக்காவிலும் பரவி வருகிறது

பெரும்பாலும் அமெரிக்காவாழ் தமிழர்கள் நமது தொன்மையான பறை இசைக்கு அவ்வளவாக ஆர்வம் காட்டியது கிடையாது. பரத நாட்டியம், மிருதங்கம், கர்நாடக சங்கீதம் போன்ற கலைகளுக்குத்தான் அங்கு ஆர்வம் இருந்தது. ஆனால் இப்போது பறை இசைக்கு, இளைய தலைமுறை அமெரிக்கத் தமிழர்களிடம் மவுசு ஏற்பட்டுள்ளது.

அமெரிக்காவின்செயின்ட் லூயிஸ் நகரில் வசிக்கும் தமிழர்களான பொற்செழியன், புவனேஸ்வரி, நந்தகுமார், செந்தில் நாயகி, வீணா, அசோக், ரம்யா, யசோதா மற்றும் பிரிதிவிராஜ் ஆகியோர் கணினி வல்லுநர்களாகப் பணிபுரிந்து வருகின்றனர். தமிழகத்தில் மிகவும் பிரபலமான திண்டுக்கல் சக்தி கலைக்குழுவினரின் பறை இசையால் ஈர்க்கப்பட்ட இவர்கள், அமெரிக்காவிற்கும் பறை இசையை கொண்டு வரவேண்டும் என்று விரும்பினர். சக்தி கலைக் குழுவினரிடம் தொடர்புகொண்டு, அவர்கள் மூலமாகவே பறை இசைக் கருவிகளை வாங்கியுள்ளனர். வீடியோ, ஆடியோ மூலமாகக் கேட்டு சுயமாகவே பயிற்சி செய்ய ஆரம்பித்தனர். மேலும், அமெரிக்காவின் டெக்சாஸ் நகரில் வாழும் தமிழகத்தைச் சேர்ந்த பள்ளி மாணவியான ரோஷிணி, ஏற்கெனவே திண்டுக்கல் சக்தி கலைக் குழுவினரிடம் நேரடியாக பறை இசைப் பயிற்சி பெற்றிருக்கிறார். ரோஷிணியிடமிருந்தும் இவர்கள் பயிற்சி எடுத்துள்ளனர்.

முதல் நிகழ்ச்சியாக, கான்சாஸ் நகர தமிழ் சங்கத்தின் சார்பில் நடைபெற்ற, ‘கலகலப்பு 2013’ கலை நிகழ்ச்சியில் பங்கேற்று, நடனத்துடன் கூடிய பறை இசை நிகழ்ச்சி நடத்தினர்.

கணினி வல்லுநர்கள் பறை நடனம் ஆடிய நிகழ்ச்சி கான்சாஸ் நகரத்தையே வியப்பில் ஆழ்த்திவிட்டது. தொடர்ந்து செயின்ட் லூயிஸ் மிசௌரி தமிழ்ச்சங்கத்தின் முத்தமிழ் விழாவிலும் இக்குழுவினர் பறை நிகழ்ச்சி நடத்தி அசத்தி விட்டனர்.

2014 பொங்கல் விழா அன்றும் அமெரிக்காவில் இக்குழுவினரின் பறை நிகழ்ச்சி இடம் பெறுகிறது. சிகாகோ தமிழ்ச் சங்கம் இதற்கான ஏற்பாடுகளை செய்து வருகிறது. மேலும், செயின்ட் லூயிஸ் நகரில் நடைபெற உள்ள, ‘ஃபெட்னா 2014’ தமிழ் விழாவிலும் பறை இசைக் குழுவின் நிகழ்ச்சி இடம் பெறுகிறது. அமெரிக்கப் பல்கலைக்கழங்களுடன் இணைந்து தமிழ் மொழியியல் இசையாகவும் பறையைப் பதிவு செய்யும் முயற்சியும் நடந்து வருகிறது.

ஒவ்வொரு மாதமும் ஏதாவது ஒரு நகரத்தில் தமிழ் அமைப்புகளின் சார்பில் நடனத்துடன் பறை இசையை அரங்கேற்றி தமிழர்களின் பண்டைய பாரம்பரியத்தை புதுப்பித்து வருகிறார்கள் இந்த செயின்ட் லூயிஸ் தமிழ் ஆர்வலர்கள். மேலும், தாங்கள் பங்கேற்கும் நிகழ்ச்சிகளில் கிடைக்கும் நன்கொடைத் தொகையை முழுமையாக, தமிழகத்தில் உள்ள பறை இசைக் கலைஞர்களின் நலனுக்காக அனுப்பி விடுகிறார்கள்.

தமிழகத்தில் இருக்கும் இளைஞர்கள் மேற்கத்திய கலாச்சாரத்தை நோக்கி போய்க் கொண்டிருக்கும் நிலையில், அமெரிக்காவில் வாழும் தமிழர்கள் தமிழகத்தின் தொன்மையைப் போற்றி வருவது தமிழக இளைஞர்களை சிந்திக்க வைக்கும் என்பதில் சந்தேகமில்லை.

பறை இசைக் குழுவினரைத் தொடர்பு கொள்ள: porchezhian@hotmail.com
-சா.சின்னதுரை - puthiya talaimurai