பழனியில் கந்த சஷ்டி திருவிழா: நவம்பர்12 இல் தொடக்கம்

-

-

பழனி தண்டாயுதபாணி சுவாமி கோயிலில்
கந்த சஷ்டி திருவிழா வரும் நவ.12-ஆம் தேதி காப்புக்
கட்டுடன் தொடங்குகிறது.

நவ.17ஆம் தேதி சூரசம்ஹாரமும், 18ஆம் தேதி
திருக்கல்யாணமும் நடைபெறுகிறது.

பழனி மலைக்கோயிலில் ஆண்டு தோறும் நடைபெறும்
விழாக்களில் கந்த சஷ்டி பெருவிழா முக்கியமான
திருவிழாவாகும். முழுக்க முழுக்க மலைக்கோயிலில்
நடைபெறும் இவ்விழா வரும் நவ.12ஆம் தேதி காப்புக்
கட்டுடன் தொடங்குகிறது.

விழாவை முன்னிட்டு அன்று அதிகாலை 4 மணிக்கே
நடை திறக்கப்பட்டு மூலவருக்கு சிறப்பு பூஜைகள்,
அபிஷேகங்கள் நடைபெறும்.

பின்னர், உச்சிக்காலத்தின் போது காப்புக்கட்டும்
நிகழ்ச்சி நடைபெறுகிறது.

விழாவை முன்னிட்டு ஒரு வார காலமும் மலைக்கோயில்
கார்த்திகை மண்டபத்தில் சிறப்பு ஆன்மிக சொற்பொழிவுகள்,
கலை நிகழ்ச்சிகள் நடைபெறுகின்றன. விழா நாள்களில்
உச்சிக்காலத்தில் கல்ப பூஜை, சண்முகர் தீபாராதனை,
தங்கமயில் புறப்பாடு, தங்கச் சப்பரம் புறப்பாடு,
வெள்ளிக்காமதேனு புறப்பாடு ஆகியன நடைபெறுகிறது.

ஆறாம் நாளான நவ.17ஆம் தேதி (செவ்வாய்க்கிழமை)
சூரசம்ஹாரம் நடைபெறவுள்ளது. மலைக் கோயிலில் அன்று
மதியம் உச்சிகால பூஜையைத் தொடர்ந்து சாயரட்சை பூஜை
நடத்தப்பட்டு சூரர்களை வதம் செய்யும் பொருட்டு
மலைக்கொழுந்து அம்மனிடம் சின்னக்குமாரசாமி வேல்
வாங்கும் விழா நடைபெறும்.

தொடர்ந்து மதியம் 2.30 மணிக்கு நடை அடைக்கப்பட்டு
சுவாமி பராசக்திவேலுடன் அடிவாரம் வந்தடைவார்.
மாலை 6 மணிக்கு மேல் வடக்கு கிரிவீதியில் தாரகாசூரவதமும்,
கிழக்கு கிரிவீதியில் பானுகோபன்வதமும், தெற்கு கிரிவீதியில்
சிங்கமுகசூரவதமும்,
மேற்கு கிரிவீதியில் சூரபத்மன் வதமும் நடைபெறுகிறது.

இரவு ஆரியர் மண்டபத்தில் வெற்றி விழா கொண்டாடப்பட்டதும்,
மலைக்கோயிலில் சம்ப்ரோட்சண பூஜை நடத்தப்பட்டு பின்னர்
அர்த்தஜாமபூஜை நடைபெறும்.

ஏழாம் நாளான நவ.18 (புதன்கிழமை) மலைக்கோயிலில்
வள்ளி, தேவசேனா சமேத சண்முகருக்கு திருக்கல்யாணம்
காலை 10.30 மணிக்கு மேல் நடைபெறும்.

அதே தினம் பெரியநாயகியம்மன் கோயிலில் வள்ளி, தெய்வானை
சமேத முத்துக்குமாரசாமி திருக்கல்யாணம்
மாலை 6 மணிக்கு நடைபெறும். தொடர்ந்து சுவாமி தங்கக்
குதிரையில் புறப்பாடு செய்யவுள்ளார்.
–
———————————————–
தினமணி
படம்- இணையம்