-

ராஜ்கோட்,
-
தென்ஆப்பிரிக்காவுக்கு எதிரான 3-வது ஒரு நாள் கிரிக்கெட்
போட்டியில் இந்திய அணி 18 ரன்கள் வித்தியாசத்தில் தோல்வி
அடைந்தது.
-
நிர்ணயிக்கப்பட்ட 50 ஓவர்களில் தென்ஆப்பிரிக்க அணி
7 விக்கெட் இழப்புக்கு 270 ரன்கள் சேர்த்தது.
-
பின்னர் 271 ரன்கள் இலக்கை நோக்கி இந்திய அணியின் தொடக்க
ஆட்டக்காரர்களாக ரோகித் சர்மாவும், ஷிகர் தவானும் ஆட வந்தனர்.
இவர்கள் முதல் விக்கெட்டுக்கு 41 ரன்கள் எடுத்தனர். வழக்கம் போல்
தடுமாறிய தவான் 13 ரன்களில் (29 பந்து) தொடர்ந்து 3-வது முறையாக
மோர்னே மோர்கலின் பந்து வீச்சுக்கு இரையானார்.

அடுத்து துணை கேப்டன் விராட் கோலி இறங்கினார்.
18 ரன்களில் இருந்த போது கேட்ச் கண்டத்தில் இருந்து தப்பித்த
ரோகித் சர்மா தனது பங்குக்கு 65 ரன்கள் (74 பந்து, 7 பவுண்டரி, 2 சிக்சர்)
எடுத்து ஆட்டம் இழந்தார்.

இதைத் தொடர்ந்து எதிர்பாராத வகையில் கேப்டன் டோனி 3-வது
விக்கெட்டுக்கு உள்ளே வந்தார். அவரும் கோலியும் தொடக்கத்தில்
நன்றாக ஆடியது போல் தெரிந்தது. கடைசி 12 இன்னிங்சில்
ஒரு அரைசதம் கூட அடிக்கவில்லையே என்ற ஏக்கத்தையும் கோலி
தணித்தார்.

தோல்வி தந்த ஓவர்கள்

ஆனால் டோனியும், கோலியும் 30 முதல் 39 ஓவர்கள் இடைவெளியில்
தென்ஆப்பிரிக்காவின் பந்து வீச்சை அடித்து ஆட தவறியதுடன்,
அணிக்கும் குந்தகம் விளைவித்து விட்டனர்.
இந்த சமயத்தில் 35 பந்துகளில் இவர்கள் ரன்னே எடுக்கவில்லை.
இதனால் இந்திய அணிக்கு பலத்த நெருக்கடி ஏற்பட்டது.

கடைசி 10 ஓவர்களில் வெற்றிக்கு 86 ரன்கள் தேவைப்பட்டன.
கேப்டன் டோனி (47 ரன், 61 பந்து, 4 பவுண்டரி), விராட் கோலி
(77 ரன், 99 பந்து, 5 பவுண்டரி) ஆகியோரை மோர்னே மோர்கல் கழற்ற,
ஆட்டம் தென்ஆப்பிரிக்காவின் பக்கம் திரும்பியது.

சுரேஷ் ரெய்னாவின் (0) பொறுப்பற்ற ஆட்டம் ரசிகர்களை வெறுப்படைய
செய்தது. ரஹானேவும் (4 ரன்) சோபிக்கவில்லை.

இலக்கை நெருங்குவது போல் சென்று கடைசியில் தடம்புரண்ட
இந்திய அணியால் 50 ஓவர்களில் 6 விக்கெட்டுக்கு 252 ரன்களே எடுக்க
முடிந்தது.

இதன் மூலம் தென்ஆப்பிரிக்கா 18 ரன்கள் வித்தியாசத்தில் வெற்றி
பெற்றது.
மோர்னே மோர்கல் 4 விக்கெட்டுகளை சாய்த்ததுடன் ஆட்டநாயகன்
விருதையும் பெற்றார்.
-
--------------------------------------