அய்யா வழி

-
பல நாள் பட்டினி போடப்பட்ட புலி. கூண்டுக்குள்
பசியால் பலமாக உறுமிக் கொண்டிருந்தது.
குற்றவாளி என்று பொய்யாகக் குற்றம் சாட்டி
இழுத்து வரப்பட்ட அந்த மகானை அந்த
கூண்டிற்குள் தள்ளி அடைத்தார்கள்.

புன்னகையோடு தண்டனையை ஏற்கத் தயாராக
இருந்தார் அந்த மகான். அகோரப் பசி கொண்ட
புலி அவரை கடித்துக் குதறப் போகிறது என்று
நினைத்தனர். ஆனால் அந்தப் புலி, பூனைக்குட்டி
போல் அவரது காலடியில் வந்து படுத்துக்
கொண்டது.

அவரை தண்டிக்க நினைத்தவர்கள் மன்னிப்புக்
கேட்டார்கள். அப்படிப்பட்ட பெருமை கொண்ட
மகான்தான் அய்யா வைகுண்டர்.

நடந்தது நடந்து கொண்டிருந்தது மட்டுமின்றி
நடக்கப்போவதையும் துல்லியமாகச் சொல்லி
மக்களின் நன்மைக்காக பல அற்புதங்களை
நிகழ்த்திக் காட்டியவர்
-
அவர் ஒரு புரட்சியாளர். கீழ்ச்சாதியின் அடிமைப்
படுத்தப் பட்டவர்களின் வாழ்விற்காக பல
சீர்திருத்தங்களை அரசுக்கு எதிராக செயல்
படுத்தியவர்.
-
ஆண் பெண்களை ஏரில் பூட்டி வயலில் உழுதது,
தாடி மீசை வளர்ந்தால் வரி, சொந்தமாக பனை
மரம் வைக்கக்கூடாது. பெண்கள் தோள்சீலை
அணியக்கூடாது போன்ற கொடுமைகளை எதிர்த்து
ஆண்கள் தலைப்பா கட்ட வைத்து, பெண்களை
தோள் சீலை அணிய வைத்தவர்.
-
ஒரு சாதாரண பனை ஏறும் தொழிலாளியின்
மகனாகப் பிறந்து சாதி மதக் கொடுமைகளுக்கு
எதிராகப் போராடியதால் மக்கள் அவர் வழியில்
செல்ல ஆரம்பித்தனர்.
-
கடந்த வாரம் அய்யா வைகுண்டரின் அவதாரத்
திருவிழா நாகர்கோயிலில் நடந்தேறியது.
அவர் அவதரித்த சுவாமித் தோப்புப் பதி இன்று
உலகமே வணங்கும் ஒரு ஸ்தலமாக காட்சி
அளிக்கும் அளவிற்கு கட்டுக்கடங்கா கூட்டம்
-
கலி எனும் மாய அரக்கனை அழித்து மக்களை
தர்மயுக வாழ்வுக்கு அழைத்துச் செல்ல அவதரித்த
நாராயணன் என்றே மக்கள் அவரை
வணங்குகின்றனர்.
-
'இங்கே கண்ணாடி வழிபாடு நடக்கிறது.
அதன்மூலம் நீ தேடும் இறைவன் உனக்குள்ளே
இருக்கிறான் என்பதை உணர்த்துவது தான்
அய்யா வைகுண்டரின் சித்தாந்தம்' என்கின்றனர்
சுவாமித் தோப்பு அறக்கட்டளைக் குழுவினர்.
-
---------------------------------

- திருவட்டாறு சிந்துகுமார்
குமுதம்