கடைசி பக்கம் – ஒரு பக்க கதை

உறவுகள் யாருமற்ற தனிமையில் வாழ்ந்துகொண்டிருந்த
அந்த மூதாட்டிக்கு ஒவ்வொரு நாளும் ஒரு யுகமாகக்
கழிந்தது. அவரின் ஒரே ஆறுதல், தொலைக்காட்சிப்
பெட்டிதான்!
–
டி.வி. தொடர்களில், சினிமாக்களில் வரும் அத்தனை
கேரக்டர்களையும் தனக்கு நெருக்கமானவர்களாக நினைத்து
ஒன்றிப் போய் விடுவார்.
–
திடீரென நேற்று இடியும் மின்னலுமாக மழை கொட்டிய
நேரத்தில் டி.வி. ஏதோ ஆகிவிட்டது. ‘‘இனி இது தேறாது.
புதிதுதான் வாங்க வேண்டும்’’ என சொல்லிவிட்டார்
மெக்கானிக்.
–
மூதாட்டி கடைக்குப் போனார். எல்.சி.டி, எல்.இ.டி என அகன்ற
திரைகளில் திரைப்படம் போலவே காட்சிகளைக் காட்டும்
ஏராளமான டி.வி. மாடல்களைப் பார்த்து பரவசப்பட்டார்.
ஆனால் விலைதான் கொஞ்சம் அதிகமாக இருந்தது.
–
‘‘இந்த விலைக்கு வாங்கினீங்கன்னா, ஒரு வருஷத்துக்கு
வாரன்டி உண்டு. கூடுதலா ஐயாயிரம் ரூபாய் கொடுத்தீங்கன்னா,
அஞ்சு வருஷ வாரன்டி தர்றோம். என்ன பிரச்னை என்றாலும்
பார்த்துக்குவோம்’’ என்றார் சேல்ஸ்மேன்.
–
‘‘நான் வயசான கிழவி. மெக்கானிக்கை தேடி அலைய
முடியாது. அஞ்சு வருஷ வாரன்டி கொடுங்க, விலையைக்
கொஞ்சம் குறைச்சுக்குங்க’’ என்றார் மூதாட்டி.
–
‘‘அதெல்லாம் முடியாது’’ என சேல்ஸ்மேன் கறாராகப் பேச,
அந்த மூதாட்டி சோகமாக வெளியேற முயன்றார்.
–
இதைப் பார்த்ததும் மேனேஜர் எழுந்து வந்தார். மூதாட்டியை
அக்கறையோடு விசாரித்தவர், சேல்ஸ்மேனை முறைத்து
விட்டு, ‘‘அம்மா! உங்களுக்கு வயசு என்ன ஆகுது?’’
என்றார்.

‘‘90’’ என்றார் மூதாட்டி. அந்திமத்தை நெருங்கும் வயதில்
அவர் இருப்பதை அறிந்தவர், ‘‘அஞ்சு வருஷம் என்னம்மா?
உங்களுக்கு ஆயுள்பூரா வாரன்டி தர்றேன். நீங்க கூடுதலா
பணமே தர வேண்டாம்’’ என்றார்.

ஆளுக்குத் தகுந்ததுபோல் யுக்தியை மாற்றுபவனே
நிஜ சேல்ஸ்மேன்!
–
——————————
–
நிதர்ஸனா
குங்குமம்

ஆளுக்குத் தகுந்ததுபோல் யுக்தியை மாற்றுபவனே
நிஜ சேல்ஸ்மேன்!