வடகொரியாவின் மிரட்டலைத் தொடர்ந்து அமெரிக்க கப்பலுக்கு பாதுகாப்பு அளிக்க ஜப்பான் போர்க்கப்பல் விரைந்தது

டோக்கியோ,

வடகொரியாவின் மிரட்டலைத் தொடர்ந்து அமெரிக்க
கடற்படை கப்பலுக்கு பாதுகாப்பு அளிக்க ஜப்பான் போர்க்கப்பல்
விரைந்தது.

போர் பதற்றம்
-
ஒரு குறிப்பிட்ட குடும்பத்தின் ஆட்சி நடந்து வரும் வடகொரியாவின் தலைவராக கிம் ஜாங் அன் உள்ளார். அவர், தனது அண்டை நாடான தென்கொரியாவை அச்சுறுத்தும் விதமாக எல்லையில் படைகளை குவித்து வைத்து இருக்கிறார். தென்கொரியாவுக்கு ஆதரவு கரம் நீட்டும் அமெரிக்காவையும் கிம் ஜாங் அன் அரசாங்கம் மிரட்டுகிறது.

தவிர, ஐ.நா.வின் எதிர்ப்பையும் மீறி அது அணுகுண்டு சோதனைகளை நடத்தி வருகிறது. அருகில் உள்ள மற்றொரு நாடான ஜப்பானை வம்புக்கு இழுக்கும் விதமாக அந்த நாட்டின் கடல் பகுதியில் ஏவுகணைகளை செலுத்தி சோதனை நடத்துவதையும் வடகொரியா அவ்வப்போது மேற்கொண்டு வருகிறது. இதனால் அண்மைக்காலமாக இப்பிராந்தியத்தில் போர் பதற்றம் நிலவி வருகிறது.

அமெரிக்காவுக்கு மிரட்டல்
-
இதையடுத்து ஜப்பானிய கடல் பகுதியில் கார்ல் வின்சன் என்னும் விமானம் தாங்கி போர்க்கப்பலையும், ஒரு அதிநவீன நீர்மூழ்கி கப்பலையும் இப்பகுதிக்கு அமெரிக்கா அனுப்பி வைத்து உள்ளது. இந்த கப்பல்களில் உள்ள அமெரிக்க வீரர்கள் தென்கொரிய ராணுவத்தினருடன் கூட்டு ராணுவ பயிற்சியில் ஈடுபட்டு வருகின்றனர்.

ஆனால் எங்கள் எல்லைக்குள் நுழைந்தால் இந்த கப்பல்களை
தூள் தூளாக்குவோம் என்று அமெரிக்காவுக்கு வடகொரியா
பகிரங்க மிரட்டல் விடுத்துள்ளது.

இந்த நிலையில் ஜப்பானிய கடல் பகுதியில் நிறுத்தி வைக்கப்பட்டு
இருக்கும் கார்ல் வின்சன் உள்ளிட்ட அமெரிக்க போர் கப்பல்களுக்கு
எரிபொருள் வினியோகம் செய்வதற்காக தனது கடற்படை கப்பல்
ஒன்றை அமெரிக்கா அனுப்பி வைத்து இருக்கிறது.

ஜப்பான் கப்பல் விரைந்தது
-
இந்த கப்பலுக்கு வடகொரியாவால் ஆபத்து ஏற்படலாம் என்பதால்
பாதுகாப்பு அளிப்பதற்காக ஜப்பான் அரசாங்கம் இசுமோ என்னும்
போர்க்கப்பலை நேற்று அனுப்பியது. இது ஜப்பானின் மிகப்பெரிய
போர்க்கப்பல் ஆகும்.

நவீன போர் ஹெலிகாப்டர்களை கொண்ட இந்த கப்பல் ஜப்பானின்
யோகோசுகா துறைமுகத்தில் இருந்து நேற்று புறப்பட்டுச் சென்றது.
-
இரண்டாம் உலகப் போருக்கு பின்பு எந்த போரிலும் ஈடுபடுவதில்லை
என்பதில் ஜப்பான் அரசு உறுதியாக உள்ளது. அதேநேரம் தற்போதைய
சூழ்நிலையை கருத்தில்கொண்டு ராணுவம் தனது விருப்பத்திற்கு
ஏற்ப செயல்பட ஜப்பான் அரசு சட்ட விதிகளை திருத்தி உள்ளது.

இந்த திருத்தம் செய்யப்பட்ட பிறகு இன்னொரு நாட்டின் கப்பலின்
பாதுகாப்பிற்காக போர்க்கப்பல் ஒன்றை அனுப்ப ஜப்பான் எடுத்த
முதல் நடவடிக்கை இதுவாகும்.

இசுமோ கப்பலில் உள்ள வீரர்கள் தேவைப்பட்டால் குறைந்தபட்ச
ஆயுத பிரயோகத்தில் ஈடுபடுவதற்கும் அதிகாரம் அளிக்கப்பட்டு உள்ளது.
-
தினத்தந்தி

நிஜமாகவே மூன்றாம் உலகப்போர் வரப்போகிறதா????