அந்நியன் : ஒரு பக்க கதை

**ayyasamy ram** · **ayyasamy ram** Fri May 19, 2017 11:31 am

-
‘உங்க ஊர்க்காரங்க, ஜாதிக்காரங்க எது கேட்டாலும்
பணம் வாங்கிட்டு உடனே செய்து கொடுக்கறீங்க.
ஆனா, இப்ப வந்துட்டுப் போன பையன், சென்னையில
ஒரு வேலைக்காக இதோட பத்து தடவை உங்களை
வந்து பார்த்துட்டான்.

ஆயிரக்கணக்கில் பணம் தர்றதா சொல்லி கெஞ்சறான்.
உங்க ஜாதிக்கார பையன்தான். உங்களால முடியாத
வேலை இல்ல. எவ்வளவோ அரசியல் செல்வாக்குள்ள
நீங்க முடியாதுன்னு திருப்பி அனுப்பிட்டீங்க.

‘குடும்பத் தொழிலை பண்ணிக்கிறேன்’னுட்டு அவனும்
விரக்தியா கிளம்பிட்டான். ஏன் தலைவரே இப்படி பண்ணீங்க?’’
- பூமிநாதனிடம் தன் சந்தேகத்தைக் கேட்டான் உதவியாளன்
சாமி.

‘‘விவசாயப் படிப்பு படிச்ச அந்தப் பையன்,
குடும்ப நிலபுலன்களை வித்துட்டு, நகரத்துக்கு மாறணும்னு
பார்க்கறான். அவன் படிப்பு விவசாயத்துக்குப் பயன்பட்டா,
அது நம்ம கிராமத்தில் பலருக்கும் வழிகாட்டியா இருக்கும்.

விவசாயம் படிச்சவங்களே அந்தத் தொழிலில் ஈடுபடத்
தயங்கினா, எப்படி அந்தத் துறை வளரும்? நாம எவ்வளவு
பணம் சம்பாதிச்சாலும், நாட்டில் விவசாயம் இல்லைன்னா,
நாம சம்பாதிக்கிற அந்தப் பணக்கட்டை சாப்பிட்டா உயிர்
வாழ முடியும்?’’

எதிலும் பணம் பண்ண வேண்டும் என்று அலையும்
தலைவருக்குள், இப்படி ஒரு ‘அந்நியன்’ இருக்கிறானா..?

ஆச்சரியத்தில் மூழ்கினான் சாமி.
-
-------------------------------
குங்குமம்