-

'நதி நீர் இணைப்புத் திட்டம்' குறித்த நிகழ்ச்சி ஒன்றில்
பேசிய ஆளுங்கட்சி எம்.எல்.ஏ-வான இன்பதுரை,
''மக்கள் நலனில் அக்கறை இருந்தால், நதி நீர் இணைப்புக்கு
ரஜினிகாந்த் ஒரு கோடி ரூபாயை வழங்க வேண்டும்'' எனப்
பேசி சர்ச்சையைக் கிளப்பி உள்ளார்.

நெல்லையில், தாமிரபரணி ஆற்றின் வெள்ள நீரைக் கன்னடியன்
கால்வாயில் இருந்து வெள்ளநீர்க் கால்வாய் மூலமாக
திசையன்விளை, சாத்தான்குளம் ஆகிய வறட்சிப் பகுதிகளுக்கு
திருப்பும் திட்டம் செயல்படுத்தப்பட உள்ளது.

இதற்காக, தாமிரபரணி - கருமேனியாறு - நம்பியாறு ஆகிய
நதிகளை இணைக்கவும், அதற்குத் தேவைப்படும் நிலத்தை
கையகப்படுத்துவது தொடர்பாகவும் விவசாயிகளுடன் கருத்துக்
கேட்புக் கூட்டம் நடந்தது.

விவசாயிகள், அதிகாரிகள், மாவட்ட ஆட்சியர் கருணாகரன்,
ராதாபுரம் தொகுதி எம்.எல்.ஏ இன்பதுரை உள்ளிட்டோர் இந்தக்
கருத்தரங்கில் கலந்துகொண்டனர். கூட்டத்தில் பேசிய இன்பதுரை,
நடிகர் ரஜினிகாந்த்தைச் சீண்டும் விதமாகப் பேசியது சர்ச்சையைக்
கிளப்பி இருக்கிறது.

நடிகர் ரஜினியின் பரபர பேச்சு!

ரஜினிகாந்த்நடிகர் ரஜினிகாந்த், பல்வேறு மாவட்டங்களைச்
சேர்ந்த தனது ரசிகர்களை சந்தித்துப் பேசினார். கடந்த 19-ம்
தேதி ரசிகர்கள் மத்தியில் பேசிய ரஜினிகாந்த், ‘‘அரசியலில்
நல்ல ஆட்கள் இருக்கிறார்கள். ஆனால், சிஸ்டம் கெட்டுப்போய்
இருக்கிறதே. ஜனநாயகம் கெட்டுப்போய் உள்ளதே. அரசியல்
பற்றி, ஜனநாயகம் பற்றி மக்களின் எண்ண ஓட்டங்களே மாறிப்
போய் இருக்கிறதே.

எனவே சிஸ்டத்தை மாற்ற வேண்டும். மக்களின் எண்ண
ஓட்டத்தை மாற்ற வேண்டும். ஒரு மாற்றத்தை உண்டாக்க
வேண்டும். அப்போதுதான் நாடு உருப்படும். அது எல்லோரும்
சேர்ந்து செய்ய வேண்டியது’’ என்று தெரிவித்தார்.

மேலும், ‘‘நீங்கள் எல்லோரும் ஊருக்குச் செல்லுங்கள்.
உங்களின் கடமையை, தொழிலைச் செய்யுங்கள். போர்
வரும்போது பார்த்துக் கொள்ளலாம்" என பூடகமாகப் பேசி
முடித்தார் அவர்.

தமிழக மக்கள் நலனில் அக்கறை இருந்தால்..?

கருத்தரங்குநடிகர் ரஜினிகாந்தின் இந்தப் பேச்சு விமர்சனத்துக்கு
உள்ளாகி வரும் நிலையில், நெல்லையில் நடந்த கருத்தரங்கில்
பேசிய எம்.எல்.ஏ. இன்பதுரை, ‘‘தாமிரபரணி-நம்பியாறு-
கருமேனியாறு இணைப்புத் திட்டம் நிறைவேற்றப்பட்டால்,
திசையன்விளை, சாத்தான்குளம் உள்ளிட்ட வறட்சியானப் பகுதிகள்
மேம்படும். இந்தப் பகுதிகளில் நிலவும் கடுமையான வறட்சியால்,
விவசாயம் செய்ய முடியாத நிலை உள்ளது. எனவே,

இந்தத் திட்டம் நிறைவேறினால், விவசாயம் செழிக்கும்.
மக்களின் குடிநீர்த் தேவையும் பூர்த்தி செய்யப்படும்.

நாட்டுக்கே முன் உதாரணமாக உள்ள
தாமிரபரணி-நம்பியாறு-கருமேனியாறு இணைப்புத் திட்டத்துக்கு
முதல்வர் எடப்பாடி பழனிசாமி தலைமையிலான அரசு அதிக
முக்கியத்துவம் கொடுத்து செயல்படுத்தி வருகிறது.

நதிநீர் இணைப்புத் திட்டத்துக்கு ஒரு கோடி ரூபாய் தருவதாக
முன்பு நடிகர் ரஜினிகாந்த் அறிவித்து இருந்தார். நிஜமாகவே
அவருக்கு தமிழக மக்கள் நலனில் அக்கறை இருக்குமானால்,
அந்த ஒரு கோடி ரூபாயை நெல்லை மாவட்டத்தில், தற்போது
செயல்படுத்தப்பட்டு வரக்கூடிய தாமிரபரணி - நம்பியாறு -
கருமேனியாறு இணைப்புத் திட்டத்துக்கு உடனடியாக வழங்க
வேண்டும். அதனை அவர் செய்ய முன்வருவாரா?

தமிழக மக்கள் நலனில் அக்கறை இருந்தால் அவர்
இதனைச் செய்வார்’’ என்று பேசினார்.
-
ஆளுங்கட்சி எம்.எல்.ஏ ஒருவர், நடிகர் ரஜினிகாந்தை இப்படி
சவாலுக்கு இழுக்கும் வகையில் பேசி இருப்பது சர்ச்சையைக்
கிளப்பி இருக்கிறது.
----------------------------------
விகடன்