காலம் மாறிப்போச்சு! - கவிதை

**ayyasamy ram** · **ayyasamy ram** Sun Apr 08, 2018 7:01 am

-

ஒற்றை ஊதியத்தில்
ஒன்பது பிள்ளைகள்
ஒற்றுமையாய் வாழ்ந்தது
அந்தக் காலம்!
-
ஒற்றைப் பிள்ளைக்கு
இருவர் ஊதியம்
பற்றாக்குறையானது
இந்தக் காலம்!
-
வாசல், நடை, கூடம், முற்றம்
வாழும் வீட்டின் அடையாளம்
நேசமுடன் கூடி மகிழ்ந்தது
அந்தக் காலம்!
-
ஒன்று, இரண்டு, மூன்று என
படுக்கையறையே குறியீடாய்
அடிமைப்படுத்திடும் அந்நிய பண்பாடு
இந்தக் காலம்!
-
பாய் விரித்துப் படுத்து
களைப்புடன்
வாய் திறந்து துாங்கியது
அந்தக் காலம்!
-
வராத துாக்கத்தை வரவழைக்க
மருந்து, மாத்திரை தேடுவது
இந்தக்காலம்!
-
ஒழுக்கமுடன் பண்பும் கலந்து
எழுத்தறிவித்த கோவில்களாய்
பழுதில்லா கல்விச் சாலைகள் இருந்தது
அந்தக் காலம்!
-
கற்றை கற்றையாய் வசூலித்து
எழுத்தையும், அறிவையும் விற்கும்
கேவலமான கல்விச் சந்தைகள்
இந்தக் காலம்!
-
காசு, பணம் வேண்டி
மாசிலா மனதுடன், பக்தர்கள்
ஆலயத்தில் ஈசனைத் தொழுதது
அந்தக் காலம்!
-
காசு, பணம் இருந்தால் தான்
கடவுளே தரிசனம் தருவார்
ஆண்டவனும் விலை போன அதிசயம்
இந்தக் காலம்!
-
கர்ம வீரராய், கறை படாத
கைகளுடன், நேர்மையாய் வாழ்ந்த
ஆட்சியாளர்...
தர்ம நெறியுடன்
இருந்த அரசியல்வாதிகள்
அந்தக் காலம்!
-
மக்கள் நலனை சற்றும் சிந்தியாமல்
எக்கணமும் தன்னலமே குறிக்கோளாய்
வக்கணையாய் வாய் பேசும் தலைவர்கள்
இந்தக் காலம்!
-
-----------------------------------
— மீனாட்சி பட்டாபிராமன், மதுரை.
வாரமலர்

_________________

krishnanramadurai · krishnanramadurai Mon Apr 09, 2018 7:40 am

அன்றைய சமூகம்
நன்கு நெருக்கமாக தொடுக்கப்பட்ட மலர்மாலை.
இன்றைய சமூகம்
உதிரிப்பூ குவியல்.
மாலையை அதில் வாடிய சில பூக்களால் தூக்கி எரிந்தோம்.
இன்றைய பூக்குவியலின் உள் அழுகும் பூக்கள் இன்னும் நம் கண்ணில் படவில்லை.
- தங்கள் கவிதை அருமை.

காலம் மாறிப்போச்சு! - கவிதை

காலம் மாறிப்போச்சு! - கவிதை

Re: காலம் மாறிப்போச்சு! - கவிதை

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக