பிரதமர் நரேந்திரமோடி வருகைக்கு எதிர்ப்பு தெரிவித்து சென்னை விமான நிலையத்தில் போராட்டத்தில் ஈடுபட்ட இயக்குநர்கள் பாரதிராஜா, அமீர் உள்ளிட்ட இயக்குநர்கள் கைது செய்யப்பட்டனர்.
காவிரி மேலாண்மை வாரியம் அமைக்காத மத்திய அரசைக் கண்டிக்கும் விதமாக தமிழகத்தில் பல்வேறு கட்ட போராட்டங்கள் நடைபெற்று வருகின்றன. இந்நிலையில் இன்று (வியாழக்கிழமை) சென்னையில் நடைபெறும் ராணுவ கண்காட்சியை துவக்க விழா, அடையாறு புற்றுநோய் மருத்துவமனையின் வைர விழா ஆகிய நிகழ்ச்சிகளில் பங்கேற்பதற்காக பிரதமர் நரேந்திர மோடி வருகை தந்தார்.
 
பிரதமர் மோடியின் வருகைக்கு எதிர்ப்பு தெரிவிக்கும் விதமாக இன்றைய தினம் அனைவரும் கருப்பு உடை அல்லது கருப்பு பேட்ஜ் அணிய வேண்டும் எனவும், அனைவரது வீடுகளிலும் கருப்பு கொடியேற்றி துக்க நாளாக அனுசரிக்க வேண்டும் எனவும், திமுக தலைமைக் கழகம் ஏற்கனவே அறிவித்திருந்தது.
நன்றி
தி இந்து

இந்நிலையில், பிரதமர் மோடியின் வருகைக்கு எதிர்ப்பு தெரிவித்து பல்வேறு இடங்களில் போராட்டங்கள் நடைபெற்று வருகிறது. அதன்படி, சென்னை விமான நிலையத்தில் பிரதமர் மோடி வந்திறங்கிய சமயத்தில் அப்பகுதியை சுற்றி கருப்பு பலூன்கள் பறக்க விடப்பட்டன.
 
மேலும், பலத்த பாதுகாப்பையும் மீறி விமான நிலையத்திற்குள் கருப்புக் கொடியுடன் முற்றுகை போராட்டத்தில் ஈடுபட்ட இயக்குநர்கள் பாரதிராஜா, அமீர், வெற்றிமாறன், ராம், கவுதமன் ஆகியோர் காவிரி மேலாண்மை வாரியம் அமைக்காத மத்திய அரசைக் கண்டித்து முழக்கமிட்டனர்.
இதையடுத்து அவர்கள் அனைவரும் கைது செய்யப்பட்டனர்.
அதேபோல், விமான நிலையத்தில் போராட்டத்தில் ஈடுபட்ட தமிழக வாழ்வுரிமைக் கட்சி தலைவர் வேல்முருகன், காவிரி உரிமை மீட்புக்குழு ஒருங்கிணைப்பாளர் மணியரசன், சட்டப்பேரவை உறுப்பினர் தமிமுன் அன்சாரி ஆகியோரும் கைது செய்யப்பட்டனர்.