செப்.5-இல் அமைதிப் பேரணி: மு.க.அழகிரியின் அதிரடி திட்டம்

அரசியல் பலத்தை நிரூபித்துக் காட்டும் வகையில்
கருணாநிதியின் நினைவிடத்தை நோக்கி, பெரிய அளவில்
அமைதிப் பேரணி ஒன்றை செப்டம்பர் 5-ஆம் தேதி
முன்னாள் மத்திய அமைச்சர் மு.க.அழகிரி நடத்திக் காட்ட
உள்ளார்.

கருணாநிதியின் மறைவுக்குப் பிறகு மெரீனாவில் உள்ள
அவரது நினைவிடத்தில் மு.க.அழகிரி பேட்டி அளித்தார்.

அப்போது, கட்சி ரீதியான தன்னுடைய ஆதங்கத்தை
கருணாநிதியிடம் தெரிவித்ததாகவும், கருணாநிதியின்
விசுவாசிகள் அனைவரும் என் பக்கம்தான் உள்ளனர்'
என்றும் மு.க.அழகிரி பேட்டி அளித்தார்.

இது, திமுகவினர் மத்தியில் பெரும் சலசலப்பை
ஏற்படுத்தியது. திமுகவில் பிளவு ஏற்படும் என்றும்
பேசப்பட்டது.

இந்த நிலையில், திமுகவின் அவசரச் செயற்குழு கூட்டம்
அண்மையில் நடைபெற்றது. இதில், திமுகவின் முதன்மைச்
செயலாளர் துரைமுருகன் உள்பட முக்கிய நிர்வாகிகள்
அனைவரும் மு.க.ஸ்டாலின் தலைமையை ஏற்பதாக
உறுதி அளித்தனர்.

கூட்டத்துக்குப் பிறகு, மு.க.ஸ்டாலின் அளித்த அறிக்கையில்,
சலசலப்புகளுக்கு எல்லாம் அஞ்சமாட்டேன். சவால்களை
வென்று காட்டுவேன்' என்று அழகிரிக்கு பதில் அளித்திருந்தார்.

அமைதிப் பேரணி: கருணாநிதியின் நினைவிடத்தில்
அழகிரி பேட்டி அளிக்கும்போது, 'இன்னும் இரண்டொரு
நாள்களில் என்னுடைய மனத்தாங்கல்களைத் தெரிவிப்பேன்'
என்று கூறியிருந்தார்.

ஆனால், இதுவரை எந்தவிதக் கருத்தும் தெரிவிக்காமல்
இருந்து வருகிறார்.

இந்த நிலையில், இரண்டு தினங்களுக்கு முன்பு அழகிரி
அவருடைய முகநூல் பக்கத்தில், 'இந்தத் தேதி 5.9.2018 '
என்று மட்டும் பதிவு செய்திருந்தார்.

அந்தத் தேதியில் அழகிரி கட்சி தொடங்குவாரோ என்பது
போல செய்திகள் பரவி வருகின்றன.

ஆனால், தன்னுடைய அரசியல் பலத்தை நிரூபிக்கும்
வகையில் செப்டம்பர் 5-ஆம் தேதி சென்னையில் மிகப்
பெரிய பேரணி ஒன்றை நடத்திக் காட்ட அழகிரி
திட்டமிட்டுள்ளார்.

தென் மாவட்டங்களில் மட்டுமே அழகிரிக்குப் பலம் என்று
பேசப்படுகிறது. அதைத் தகர்த்து தமிழகம் முழுவதும்
தனது ஆதரவாளர்கள் இருக்கின்றனர் என்பதை நிரூபிக்கும்
வகையில் இந்தப் பேரணியை இருக்க வேண்டும் என்பதற்காக
தமிழகம் முழுவதும் ஆதரவாளர்களைத் திரட்டி வருகிறார்.

சுமார் ஒரு லட்சம் பேர் இந்தப் பேரணியில் பங்கேற்கச்
செய்யும் முயற்சியில் அவரது ஆதரவாளர்கள் ஈடுபட்டு
வருகின்றனர்.

பேரணியின் முடிவில் அழகிரி தனது ஆதங்கங்களைத்
தெரிவிப்பார் என அவரது ஆதரவாளர்கள் கூறுகின்றனர்.
-
----------------------------------
தினமண