கூப்பிட்ட குரல் எங்கே?

செல்ஃபி வித் சயின்ஸ்
-

--
மேஜிக் என்பது எல்லாம் மேடையில் மட்டுமே செய்வதல்ல. கண்கட்டி வித்தைக்கு கண்ணைக் கட்டிக்கொள்ள வேண்டியது இல்லை. ‘மாயமில்லை... மந்திரமில்லை...’ என்பார்களே, அது மாதிரியான ஓர் இயற்கைத் தந்திரம் இது.

மழைக் காலத்தில் வரும் சுவர்க்கோழியின் சப்தத்தை கவனித்திருக்கிறீர்களா? நிச்சயம் கவனித்திருப்பீர்கள். ஆனால் சுவர்க்கோழியைக் கண்டுபிடித்திருக்கிறீர்களா? வாய்ப்பே இல்லை. அந்த சப்தம் எங்கிருந்து வருகிறது என்பதை தேடித் தேடி அலுத்த வேடிக்கை கதைகள் வேண்டுமானால் நிகழ்ந்திருக்கலாம்!

கிராமங்களில் இந்த சுவர்க்கோழியினை ‘குருட்டு - ஈ’ (குருட்டி) என்று குறிப்பிடுவார்கள். அதாவது ‘கண் தெரியாமல் எங்கேயோ நின்று கத்திக் கொண்டிருக்கிற ஈ’ என்ற பொருளில் ‘குருட்டு ஈ’ என்று குறிப்பிடுவார்கள்.

குருட்டியின் சப்தத்தை மட்டுமல்ல, பல சமயங்களில் பல்வேறு சப்தங்களை அனுமானிப்பதிலும் இதுபோன்று தவறு செய்கிறோம். ஏதோ ஒன்று ெவடிக்கும்போது, அது என்னவிதமான சப்தம் என்றுகண்டுபிடித்துவிடுவோம்.

ஆனால் அது எந்தத் திசையில் இருந்து வந்தது என்பதைக் கண்டுபிடிப்பதில் நிச்சயம் குழப்பம் வரும்.அதே மாதிரிதான் சாலை நடுவில் நீங்கள் நடந்து கொண்டிருக்கும்போதும், பூங்காக்களில் பொழுது கழிக்கும்போதும், யாராவது உங்களைக் கூப்பிட்டால் ‘எந்தப் பக்கத்தில் இருந்து கூப்பிட்டார்கள்’ என்ற குழப்பம் கொஞ்ச நேரம் இருக்கும். இது ஒரு இயற்கை மேஜிக்.

இதற்கு ஒரு சிறிய சோதனைகூட செய்து பார்க்கலாம். உங்கள் நண்பனின் கண்களைத் துணியால் மறைத்துக் கட்டிவிட்டு, ஒரு பெரிய கூடத்தின் நடுவில் உட்கார வைத்துவிடுங்கள். அவர் எந்தப் பக்கமும் திரும்பக் கூடாது. ஆடாமல், அசையாமல் இருக்க வேண்டும்.அவருக்கு எதிரில் நேர்க்கோட்டு திசையில் நீங்கள் நின்று கொள்ளுங்கள்.

அவர் கண்களுக்கு நேர் திசையில் (ஓரளவுக்கு செங்குத்தாக இருக்கிற மாதிரி) நின்றுகொள்ள வேண்டும். இந்த சோதனையின்போது நீங்கள் முக்கியமாக கடைப்பிடிக்க வேண்டிய கண்டிஷன் ஒன்று உண்டு.

கண்ணைக் கட்டிக்கொண்டு உங்கள் நண்பர் உட்கார்ந்திருக்கிறார் அல்லவா? அவருக்கு எதிரில் நீங்கள் நகரும்போது, உங்கள் நடையின் அதிர்வுகளை வைத்து நீங்கள் எந்த திசையில் நடந்து ேபாகிறீர்கள் என்பதைக் கண்டுபிடித்து விடக்கூடாது. பூனை போல சத்தமின்றி அசைய வேண்டும்.

ஓகே! இப்போது அவருக்கு நேர் எதிரான திசையில் ஐந்து அல்லது ஆறு அடி தூரத்தில் (அதிகபட்சமாக 10 அடி தூரத்தில்) நின்று கொள்ளவும். உங்கள் கைகளில் இரண்டு நாணயங்களை வைத்துக் கொண்டு தட்டி ஒலி எழுப்பவும். இப்போது கண்ணைக் கட்டியிருக்கும் உங்கள் நண்பரிடம் சப்தம் எந்த திசையில் இருந்து வந்தது என்று கேட்கவும்.

நீங்கள் நிற்கும் திசையை மட்டும் விட்டுவிட்டு மற்ற எல்லா திசைகளையும் அவர் விடையாகக் கூறுவார். அதே இடத்தில் நின்று கொண்டு திரும்பத் திரும்ப நாணயத்தை தட்டி, நீங்கள் ஒலி எழுப்பி உங்கள் நண்பனிடம் கேள்வி கேட்கவும். அவர் தனது காதை இந்தப் பக்கமும், அந்தப் பக்கமும் திருப்பி ஒலி வரும் திசையைக் கண்டுபிடிக்க முயற்சி செய்வார். ஆனால் கண்டுபிடிப்பது கஷ்டமான காரியம்.

ஏனென்றால் அவர் எந்தப் பக்கம் திரும்பினாலும் ஒலி வரும் திசைக்கு சமச்சீரான அளவிலேயே காதைத் திருப்புகிறார். அதனால் ஒருபோதும், ஒலி வரும் திசையை சரியாகக் கண்டுபிடிக்க முடியாது.மழைக்காலங்களில் சுவர்க்கோழி கீச்சிடும்போதும் நாம் இதே தவறைத்தான் செய்கிறோம்.

அதாவது நாம் எழுந்து சென்று கண்டுபிடிக்க முயற்சி செய்வதில்லை. இருந்த இடத்தில் இருந்தே தலையை மட்டும், ஒலி வரும் திசைக்கு சமச்சீரான அளவில் திருப்புகிறோம். இங்கு ஓர் ஒலியியல் மாயத் தோற்றத்தால் நாம் ஏமாற்றப்படுகிறோம்.

சரியாகக் கண்டுபிடிக்க வேண்டும் என்றால், தலையைத் திருப்பாமல் குறைந்த பட்சம் தலையை பக்கவாட்டில் சாய்த்து திரும்ப வேண்டும். சுவர்க்கோழி சப்தம் தூரமாகக் கேட்டால் எழுந்து சென்று சமச்சீர் இடைவெளியைக் கூட்டியோ குறைத்தோ கேட்க வேண்டும்.‘காதைத் தீட்டிக் கொண்டு கேட்பது’ என்று சொல்கிறோமே... அது இதுதான்.
-
--------------------------------------------

டாக்டர் ஆதலையூர் சூரியகுமார்
நன்றி-முத்தாரம்- 06-06-2016