இனிது… இனிது… இயற்கை இனிது !

-
மாத்தி யோசி

‘‘பஞ்சபூதங்களை முறையாகப் பயன்படுத்தினாலே
நோயின்றி நீண்ட காலம் ஆரோக்கியமாக வாழலாம்.
நோய்கள் ஏற்பட்டாலும் மருந்தில்லா மருத்துவத்தின்
மூலம் சிகிச்சை அளித்து குணப்படுத்தியும் விடலாம்’’
என்கிறார் யோகா மற்றும் இயற்கை மருத்துவர்
இந்திரா தேவி.

அது என்ன மருந்தில்லா மருத்துவம்?

‘‘இயற்கையில் என்னவெல்லாம் கிடைக்கிறதோ அவற்றைப்
பயன்படுத்தி அனைத்துவிதமான நோய்களுக்கும் சிகிச்சை
அளிப்பதையே ‘மருந்தில்லா மருத்துவம்’ எனக் கூறுவோம்.

மருந்துகள் இல்லாமலேயே முடக்குவாதம், கழுத்துத் தேய்மானம்,
உடல் பருமன் உட்பட பலவிதமான நோய்களுக்கு இதில் சிகிச்சை
அளிக்க முடியும்.

இயற்கை மருத்துவம் பிறந்த குழந்தை முதல் எந்த வயதினருக்கும்
பொருந்தக் கூடிய ஒன்று.

நமது உடலில் சேர்கிற கழிவுகள்தான் நோய். அவற்றை
வெளியேற்றுவதுதான் இதன் அடிப்படை சிகிச்சை முறை.

அன்றாட வாழ்வியலை முறையாக நடத்த வேண்டும்.
அப்படி இல்லையென்றால் இயற்கைக்கு எதிர்மாறாக
செயல்படுகிறோம் என்று அர்த்தம். அதுபோல் ஒருவர் என்ன
மாதிரியான பாதிப்புக்கு ஆளாகி உள்ளார், அந்த நோயின்
தன்மை ஆகியவற்றின் அடிப்படையில் சிகிச்சைகளுக்கான
கால அவகாசம் தேவைப்படும்’’ என்பவர், பஞ்சபூதங்களை
அடிப்படையாகக் கொண்டு அளிக்கப்படும் சிகிச்சைகள் பற்றித்
தொடர்ந்து விளக்குகிறார்.

‘‘நிலம், நீர், தீ, காற்று, ஆகாயம் ஆகிய பஞ்சபூதங்களை
அடிப்படையாக வைத்து மண் சிகிச்சை, நீர் சிகிச்சை,
பிராணாயாமம், நெருப்பு சிகிச்சை, ஆகாயம் போன்ற
சிகிச்சைகள் தரப்படுகின்றன.

நிலம் தொடர்பான சிகிச்சைக்கு மண் சிகிச்சை மற்றும் காந்த
சிகிச்சை, சூரியன் மூலம் தரப்படும் சிகிச்சை யில்
ஹீலியோதெரபி மற்றும் க்ரோமோதெரபி முக்கியமானவை
ஆகும். ஹீலியோதெரபி சூரியன் மூலம் கொடுக்கப்படும்
சிகிச்சை முறையாகும்.

க்ரோமோதெரபி என்பது வானவில் நிறங்களைப் பயன்படுத்தி
தரப்படும் சிகிச்சை ஆகும்.

பஞ்சபூதங்களில் இறுதியாக இடம்பெற்றுள்ள ஆகாயம் மூலம்
அளிக்கப்படுகின்ற சிகிச்சையில் திட உணவுக்கு இடமில்லை.
இதனை Fasting Therapy எனச் சொல்வோம்.
இந்த சிகிச்சை முறையில் பழச்சாறு, மோர், நீர், வெஜிடபிள் ஜூஸ்
குடிக்கலாம். இந்த மருத்துவத்தில் யோகாவுக்கும் இடம் உண்டு.
உடல் மற்றும் மனதை ஆரோக்கியமாகவும் கட்டுக்கோப்பாகவும்
வைத்துக்கொள்ள யோகா உதவுகிறது.

உடல், மனம், ஆத்மா இந்த மூன்றையும் ஒருநிலைப்படுத்துவது
யோகா. காலை 4 மணிமுதல் 6 மணிக்குள் காற்றோட்டமான
இடத்தில் செய்வது சிறந்தது.’’
--------------------------
பாலு விஜயன்
குங்குமம்-டாக்டர்