சென்னை அணி மூன்றாவது வெற்றி: 20 ரன்னில் ஐதராபாத்தை வீழ்த்தியது

-

துபாய்:
ஐ.பி.எல்., தொடரில் மூன்றாவது வெற்றியை பதிவு செய்தது
சென்னை. நேற்று நடந்த ஐதராபாத் அணிக்கு எதிரான
லீக் போட்டியில் 20 ரன்கள் வித்தியாசத்தில் வெற்றி பெற்றது.

ஐ.பி.எல்., தொடரின் 13வது சீசன் ஐக்கிய அரபு எமிரேட்சில்
நடக்கிறது. துபாயில் நடந்த லீக் போட்டியில் தோனியின்
சென்னை அணி, வார்னரின் ஐதராபாத்தை சந்தித்தது.

முதன் முறை

'டாஸ்' வென்ற சென்னை அணி கேப்டன் தோனி பேட்டிங்
தேர்வு செய்தார். இத்தொடரில் முதல் 7 போட்டிகளில் தொடர்ந்து
இரண்டாவதாக பேட்டிங் செய்த சென்னை அணி, நேற்று முதன்
முறையாக முதலில் பேட்டிங் செய்தது.

புதிய துவக்கம்

சென்னை அணிக்கு இம்முறை டுபிளசியுடன் இணைந்து
சாம் கர்ரான் துவக்கம் கொடுத்தார். டுபிளசி, தான் சந்தித்த
முதல் பந்தில் 'டக்' அவுட்டாக்கி அதிர்ச்சி கொடுத்தார்.

கலீல் அகமது வீசிய 4வது ஓவரில் கர்ரான் இரண்டு பவுண்டரிகள்,
இரண்டு சிக்சர் அடிக்க, 22 ரன்கள் கிடைத்தன. அடுத்த சில
நிமிடத்தில் கர்ரான் (31) போல்டானார்.

அம்பதி ராயுடு (41), வாட்சன் (42) கைகொடுத்தனர்.
நடராஜன் ஓவரில் இரண்டு பவுண்டரி அடித்த தோனி, 21 ரன்
எடுத்தார். சென்னை அணி 20 ஓவரில் 6 விக்கெட்டுக்கு 167 ரன்கள்
எடுத்தது. ஜடேஜா (25), தீபக் சகார் (2) அவுட்டாகாமல் இருந்தனர்.

வில்லியம்சன் அரைசதம்

ஐதராபாத் அணிக்கு வார்னர் (9), பேர்ஸ்டோவ் ஜோடி சுமாரான
துவக்கம் தந்தது. மணிஷ் பாண்டே (4), பேர்ஸ்டோவ் (23),
பிரியம் கார்க் (16), விஜய் சங்கர் (12) நீடிக்கவில்லை.
வில்லியம்சன் (57) அரைசதம் அடித்தார். கரண் சர்மா வீசிய 18 வது
ஓவரில் 19 ரன்கள் எடுக்கப்பட, 'டென்ஷன்' எகிறியது.

19வது ஓவரை வீசிய ஷர்துல் 5 ரன் மட்டும் கொடுத்து ரஷித் கானை
(14) அவுட்டாக்க, சென்னை பக்கம் வெற்றி திரும்பியது.
கடைசி ஓவரில் ஐதராபாத் வெற்றிக்கு 22 ரன் தேவை என்ற நிலையில்,
சென்னையின் பிராவோ 1 ரன் மட்டும் விட்டுக் கொடுத்தார்.

ஐதராபாத் அணி 20 ஓவரில் 8 விக்கெட்டுக்கு 147 ரன்கள் மட்டும் எடுத்தது.
சென்னை அணி 20 ரன்னில் வெற்றி பெற்றது.

தினமலர்