அணு ஆயுத விரிவாக்கம்: இந்தியா, பாக்., சீனா தீவிரம்

புதுடில்லி :
இந்தியா, பாக்., சீனா ஆகிய நாடுகள், அணு ஆயுதங்களை
அதிகரிப்பதில் தீவிரமாக ஈடுபட்டு உள்ளதாக, ஆய்வறிக்கை
ஒன்றில் தெரிவிக்கப்பட்டுள்ளது.

ஐரோப்பாவின் ஸ்வீடன் நாட்டைச் சேர்ந்த ஸ்டாக்ஹோம்
அமைதி ஆராய்ச்சி மையம், உலக நாடுகளின் அணு ஆயுதங்கள்
தொடர்பான ஆய்வறிக்கையை வெளியிட்டுள்ளது.

ஒன்பது நாடுகள்:

அதில் கூறப்பட்டு உள்ளதாவது: இந்தாண்டு ஜன., நிலவரப்படி,
அமெரிக்கா, ரஷ்யா, பிரிட்டன், பிரான்ஸ், இந்தியா, இஸ்ரேல்,
பாக்., சீனா, வட கொரியா ஆகிய ஒன்பது நாடுகளிடம்,
13 ஆயிரத்து, 80 அணு ஆயுதங்கள் உள்ளன;

அவற்றில், 90 சதவீதம் அமெரிக்கா மற்றும் ரஷ்யாவிடம் உள்ளது.
உலகின் மொத்த அணு ஆயுதங்களில், 2,000 அணு ஆயுதங்கள்
எந்த நேரத்திலும் உத்தரவை செயல்படுத்தும் வகையில் தயார்
நிலையில் வைக்கப்பட்டுள்ளன.

இந்தியாவிடம் 150 அணு ஆயுதங்களும், பாகிஸ்தானிடம் 160 அணு
ஆயுதங்களும் உள்ளன. சீனா, 320 அணு ஆயுதங்களை வைத்துள்ளது.
அணு ஆயுதங்களை தயாரிக்க, செறிவூட்டப்பட்ட யுரேனியம் மற்றும்
புளுட்டோனியம் பயன்படுத்தப்படுகின்றன

ஏவுகணை சோதனை:

இதில் இந்தியா, இஸ்ரேல் ஆகியவை புளுட்டோனியம் மூலம்
அணு ஆயுதங்களை தயாரிக்கின்றன. பாக்., செறிவூட்டப்பட்ட
யுரேனியத்தில் அணு ஆயுதங்களை தயாரிக்கிறது.

இந்தியா, பாக்., சீனா ஆகிய மூன்று நாடுகள் அணு ஆயுதங்களை
அதிகரிப்பதில் தீவிரம் காட்டி வருகின்றன. அமெரிக்கா, ரஷ்யா,
சீனா, பிரான்ஸ், பிரிட்டன் ஆகிய நாடுகள் செறிவூட்டப்பட்ட
யுரேனியம் மற்றும் புளுட்டோனியத்தை பயன்படுத்தி அணு
ஆயுதங்கள் தயாரிக்கின்றன.

இந்தியாவும், பாகிஸ்தானும், அவற்றின் ஏவுகணை சோதனைகள்
குறித்த விபரங்களை தான் வெளியிடுகின்றன. அணு ஆயுதங்கள்
குறித்த தகவல்களை வெளியிடுவதில்லை. கடந்த, 2016 - 20ம் ஆண்டு
வரை, உலகில் அதிக ஆயுதங்களை இறக்குமதி செய்த நாடுகளில்,
சவுதி அரேபியா, இந்தியா, எகிப்து, ஆஸ்திரேலியா, சீனா ஆகிய
நாடுகள் முன்னணியில் உள்ளன. இவ்வாறு அதில் கூறப்பட்டுள்ளது.

தினமலர்