வெற்றி கதையை சொல்வேன்!--தைரொ கேர் வேலுமணி

வெற்றி கதையை சொல்வேன்! --வேலுமணி



'தைரோகேர்' என்ற நாட்டின் மிகப்பெரிய ரத்த பரிசோதனை மைய குழுமத்தை 4,500 கோடி ரூபாய்க்கு, 'பார்ம்ஈசி' நிறுவனத்திற்கு விற்றுஉள்ளது பற்றி கூறும், தமிழரான வேலுமணி: கடந்த 27 ஆண்டுகளாக கஷ்டப்பட்டு நான் வளர்த்து வரும் தைரோகேர் நிறுவனத்தை இன்னொரு நிறுவனத்திடம் ஒப்படைக்கும் போது, ராணுவத்தில் சேரத் துடிக்கும் மகனை, நாட்டுக்கு அர்ப்பணித்த தாய் போன்ற மனநிலை தான் எனக்கும் இருந்தது. மேலும் எனக்கும் வயதாகி விட்டது. நிறுவனம் பெரிதாக வளர்ந்து விட்டது. அது குழந்தையாக இருந்த போது அதன் ஒவ்வொரு கட்ட வளர்ச்சியும் எனக்கு மகிழ்ச்சியாக இருந்தது.
இப்போது வாலிப வயதை எட்டி விட்டது. எனவே இந்த சமயத்தில் வேறொருவரிடம் இந்த நிறுவனத்தை ஒப்படைப்பது தான் சிறப்பானதாக இருக்கும் என கருதி கொடுத்து விட்டேன்.நான் வளர்த்த நிறுவனத்தை ஏற்று நடத்த என் மகன், மகள் முன்வரவில்லை. தன் குழந்தை போன்ற அழகோ, அறிவோ எந்த குழந்தைக்கும் கிடையாது என்று தான் எந்த தந்தையும் நினைப்பான். அது 99 சதவீதம் தவறு. அவர்களிடம் பேசிப் பார்த்தேன். அவர்களுக்கு ஆர்வம் இல்லை என்பது தெரிந்தது. 'அப்பா, நாங்கள் எப்படியும் பிழைத்துக் கொள்வோம். நீங்கள் வளர்த்த நிறுவனத்தை நடத்தி தான் நாங்கள் வெற்றி பெற வேண்டும் என்பதில்லை. நாங்களே ஒரு நிறுவனத்தை துவக்கி வெற்றி பெறுவது தான் எங்களுக்கு பெருமை' என்றனர். அவர்கள் இஷ்டப்படியே விட்டு விட்டேன்.மேலும், சாப்பாட்டுக்கு கஷ்டம் இல்லாத என் குழந்தைகள், என் நிறுவனத்தை என்னைப் போல, கண் போல காத்து இன்னும் உயர்த்துவரா என்பதும் சந்தேகம் தான். ஆனால் அதை வாங்க விரும்பும் நபர் அப்படி செய்வார் என்பதில் எனக்கு நம்பிக்கை உள்ளது.நம் நாட்டில் பல குடும்பங்களில், ஒரு நிறுவனத்தை அடுத்த தலைமுறைக்கு கொண்டு செல்லும் விதத்தை ஆராய்ந்து பார்த்து அறிந்த உண்மை இது.என் வாழ்க்கையின் முதல் 20 ஆண்டுகள் விவசாயியின் மகனாக இருந்து விட்டேன். அடுத்த 20 ஆண்டுகள் விஞ்ஞானியாகவும், அடுத்த 20 ஆண்டுகள் தொழிலதிபராகவும் இருந்து விட்டேன். இனி அடுத்த 20 ஆண்டுகளுக்கு கதை சொல்லியாக இருக்கப் போகிறேன். ஆம். என் வெற்றிக்கதையை சொல்லப் போகிறேன்.என் மனைவியை நான் காதலித்து திருமணம் செய்து கொள்ளவில்லை. ஆனால் திருமணத்திற்கு பின் காதலித்தேன். இந்த நிறுவனம் ஒவ்வொரு கட்டமாக உயர அவர் தான் காரணம். அவர் இறந்தபோதும் நான் அழவில்லை; ஆனால் ஒரு வலி இருந்தது. அதுபோலத் தான் இந்த நிறுவனத்தை விற்கும் போது அழவில்லை; வலி இருக்கிறது.அடுத்து சில மாதங்கள் ஓய்வு. அதன் பின் நாட்டுக்கும், என் குடும்பத்திற்கும் நன்மை தரும் நிறுவனங்களில் முதலீடு செய்வேன்!

நன்றி தினமலர்