மகத்தில் குளித்தால், மனம் பலமாகும்!

-

புனித தீர்த்தங்களில் நீராடுவதற்கென சில நாட்களை
முன்னோர் வகுத்துள்ளனர். அதில் ஒன்று, மாசி மகம். மகம்
நட்சத்திரத்திற்கென சில சிறப்புகள் உண்டு.

மகத்தில் பிறந்தால் ஜகத்தை ஆளலாம் என்கிறது, ஜோதிடம்.
இந்த நட்சத்திரம், மனிதனுக்கு ஆளுமைத்திறன், வலிமை,
தர்மசிந்தனை ஆகியவற்றைத் தருகிறது. இந்த மூன்றும்
இருந்தால் தலைவனாகலாம் என்பதால் இவ்வாறு சொல்லப்பட்டது.

பவுர்ணமி அல்லது அதற்கு மறுநாள் மாசி மகம் வரும். முழுநிலவு
இருக்கும் நேரத்தில், மனிதனின் மன வலிமை அதிகமாக இருக்கும்.
அமாவாசையன்று குறையும். குறிப்பாக, பெண்களுக்கு அன்று மன
வலிமை குறைவாக இருக்கும். இதனால் தான், தாம்பத்யத்துக்கு
அது ஆகாத நாள் ஆகிறது.

பவுர்ணமி மன வலிமையை அதிகப்படுத்தும். இதனால் தான்,
முழுநிலவன்று புதுமண தம்பதியரும், காதலர்களும் ஆற்றங்கரையில்
கூடும் நிகழ்வு, சித்ரா பவுர்ணமியன்று ஒரு காலத்தில் நிகழ்ந்தது.

மாசி மகத்தன்று நதிகள் அனைத்தும் விசேஷ சக்தி பெறுகின்றன.
அன்று, விண்ணுலக தேவர்களும், நம் முன்னோர்களும் ஒரு சேர இணைந்து,
புனித நதிகளுக்கு வருகின்றனர். அவர்கள், தாங்கள் செய்த பாவமும்,
ஊரில் வசிக்கும் தங்கள் வம்சாவளிகள் செய்த பாவமும் நீங்க, புனித
நதிகளில் நீராட வருகின்றனர்.

ஒருசமயம், வெள்ளத்தால் உலகம் அழிய இருந்த வேளையில், பிரம்மா
தன் படைப்புக் கலன்களை, சாகாவரம் தரும் அமிர்தம் நிறைந்த கும்பத்தில்
வைத்து மிதக்க விட்டார். உலகமே அழிந்தாலும், அந்தக் குடம் அழியவில்லை.
அந்த கும்பத்தை அம்பெய்து உடைத்தார், சிவன். அதிலிருந்த பொருட்கள்
சிதறி, லிங்கங்களாக மாறின.

அமிர்தம் கொட்டிய இடம், குளமாக மாறியது. மாசி மாதம் மகம்
நட்சத்திரத்தன்று இந்த நிகழ்வு நடந்ததால், அந்த குளத்துக்கு மகாமக குளம்
என, பெயர் ஏற்பட்டது. கும்பம் உடைந்து கோணல் ஆனதால், கும்பகோணம்
என்று அந்த தலத்துக்கு பெயர் வந்தது.

சூரியன் கும்ப ராசியில் இருந்த காரணத்தாலும், ஊரின் பெயரில் கும்பம்
இணைந்ததாக சொல்வர். அது புனித நகராக மாறியது. மாசி மகத்தன்று
அந்த அமிர்த குளத்தில் குளித்த மக்கள், தீர்க்காயுள் பெற்றனர்.
விண்ணுலகத்தினரும், முன்னோர்களும் அதில் நீராடினர். இதனால், அது
புனித நாள் ஆயிற்று.

திருநெல்வேலி மாவட்டம், பாபநாசம் அம்மன் படித்துறையின் புராணப்பெயர்,
பொங்கு மது கங்கை துறை. இந்த துறையிலிருந்து நேராக ஒரு கோடு
போட்டால், அது படித்துறையின் கரையிலுள்ள பாபநாசநாதர் கோவிலின்
உலகம்மன் பாதத்தைத் தொடும்.

அம்பாளின் பாதத்திலிருந்து இந்த தீர்த்தம் வருவதாக நம்பிக்கை. கடும் கோடை
வந்து ஆற்றில் தண்ணீர் வற்றினாலும் கூட, பொங்கு மது கங்கை ஊற்றிலிருந்து
தண்ணீர் பொங்கி வருவதைக் காணலாம். தண்ணீர் வற்றும் காலங்களில்
இதைத் தரிசிப்பது சிறப்பு.

இதுபோன்ற அதிசயங்களை உள்ளடக்கிய மாசி மக நன்னாளில், ஆறுகளைப்
பாதுகாப்பதன் அவசியத்தை புரிந்து கொள்வோம்.

-தி.செல்லப்பா
நன்றி- வாரமலர்