பாரதம் - பாரத தேசமென்று பெயர் சொல்லு வார்...

இந்திய பாராளுமன்றத்தின் சிறப்பு கூட்டத்தொடர் இம்மாதம் 18 அன்று தொடங்கி 22 வரை நடக்க இருக்கிறது.

"அவசியமான சில மசோதாக்கள் தாக்கல் செய்வது குறித்து விவாதிக்கப்படும். அவை குறித்து விரைவில் அனைத்து கட்சி உறுப்பினர்களுக்கும் சுற்றறிக்கை அனுப்பப்படும்" என பாராளுமன்ற விவகாரங்களுக்கான மத்திய அமைச்சர் பிரகலாத் ஜோஷி, ஆகஸ்ட் 31 அன்று இதனை அறிவிக்கும்போது தெரிவித்திருந்தார்.

எந்தெந்த பிரச்சனைகள் மற்றும் முடிவுகள் குறித்து விவாதிக்கப்பட இருக்கிறது என்றும் என்னென்ன தீர்மானங்கள் முன்மொழியப்படும் அல்லது மசோதாக்கள் தாக்கல் செய்யப்படும் என்பது குறித்தும் அதிகாரபூர்வமாக தகவல்கள் வெளியாகவில்லை.

இந்நிலையில், இக்கூட்டத்தொடரில், நமது நாட்டின் பெயரை "இந்தியா" என்பதற்கு பதிலாக "பாரத்" என மாற்றுவது குறித்து மசோதா தாக்கல் செய்யப்படலாம் என நம்பத்தகுந்த வட்டாரங்களில் இருந்து தகவல்கள் வெளிவந்துள்ளன.

இச்செய்திக்கு ஆதாரம் சேர்க்கும் விதமாக இந்திய தலைநகர் புதுடெல்லியில் செப்டம்பர் 9 மற்றும் 10 தேதிகளில் நடைபெறவுள்ள ஜி20 உச்சி மாநாட்டிற்கு வரும் உலக தலைவர்களுக்கு இந்திய ஜனாதிபதி திரவுபதி முர்மு அளிக்கும் விருந்திற்கான அழைப்பிதழில் அவர் பெயரை குறிப்பிடும் இடத்தில், "இந்தியாவின் ஜனாதிபதி" என்பதற்கு பதிலாக "பாரத்தின் ஜனாதிபதி" என குறிப்பிடப்பட்டுள்ளதை விமர்சகர்கள் சுட்டி காட்டுகின்றனர்.

இதற்கிடையே, இந்தியா-பாரத் பெயர் மாற்ற சர்ச்சை குறித்து சமூக வலைதளங்களில் பல கருத்து பரிமாற்றங்கள் நடைபெறுகின்றன.

பிரிட்டிஷாரிடமிருந்து இந்தியா ஆகஸ்ட் 15, 1947ல் சுதந்திரம் பெற்றது. இதனையடுத்து இந்தியாவிற்கென ஒரு அரசியலமைப்பு சட்டத்தை உருவாக்க 389 பேர் உறுப்பினர் கொண்ட "அரசியலமைப்பு சபை" ஒன்று உருவாக்கப்பட்டது. இச்சபை உருவாக்கிய இந்திய அரசியலமைப்பு சட்டம், 1950 ஜனவரி 26 அன்றுதான் செயலாக்கம் பெற்றது.

அரசியலமைப்பு சட்டத்தின் சட்டப்பிரிவு 1ல், 'பாரத்' எனும் பெயரும் 'இந்தியா' எனும் பெயரும் இடம் பெறுகிறது.

4 நாட்கள் விவாதம் செய்த இந்திய அரசியலமைப்பு சபை, 1949 செப்டம்பர் 18 அன்று "இந்தியா, அதாவது பாரத், மாநிலங்களின் யூனியனாக இருக்கும்" என தொடங்கும் வரைவை ஏற்று கொண்டது.

இதை குறிப்பிட்டு தற்போதைய சிறப்பு கூட்டத்தொடர் இம்மாதம் (செப்டம்பர்) 18 அன்று தொடங்க போவதையும் தொடர்பு படுத்தி சமூக வலைதளங்களில் விவாதிக்கின்றனர்.

மெட்ராஸ் என்பதை சென்னை என்று மாற்றியது சரி என்றால் இந்தியாவை பாரத் என்று மாற்றுவது சரிதானே...

பாரதம் என மாற்றினால்.. இந்தியா பெயருக்கு பாகிஸ்தான் உரிமை கொண்டாடும்?...

ஏற்கனவே இந்தியா என்ற பெயரை பாரதம் என மாற்றுவதற்கு உள்நாட்டில் பல்வேறு எதிர்க்கருத்துகள் எழுந்துள்ள நிலையில், பாரதம் என பெயரை மாற்றினால், இந்தியா பெயருக்கு பாகிஸ்தான் உரிமை கொண்டாடும் என்ற தகவல் வெளியாகியிருக்கிறது.

ஜி 20 உச்சி மாநாட்டில் பங்கேற்கும் தலைவர்களுக்கான விருந்து அழைப்பிதழில், இந்திய குடியரசுத் தலைவர் என்பதற்கு பதிலாக பாரத குடியரசுத் தலைவர் என்று அச்சிடப்பட்டிருந்தது, பெரும் சர்ச்சையை ஏற்படுத்தியிருக்கிறது.

தற்போது இந்த சர்ச்சை, எல்லைத் தாண்டி எதிரொலித்திருக்கிறது. பாகிஸ்தான் நாட்டின் உள்ளூர் ஊடகம், இந்தியா, தனது நாட்டின் பெயரை பாரதம் என மாற்றினால், பாகிஸ்தான் அந்த பெயரை உரிமை கொண்டாடலாம் என்று கூறியிருப்பதாக எக்ஸ் பக்கத்தில் பதிவிடப்பட்டிருக்கிறது.

பாகிஸ்தான், இந்துஸ் மாகாணம் என்று அடையாளப்படுத்தும் விதமாக இந்தியா என்ற பெயரை உரிமை கோருவதற்கு வாய்ப்பு இருப்பதாகவும் இந்த பதிவை ஆதரிப்போர் தெரிவித்துள்ளனர்.

இதுவரை மத்திய அரசிடமிருந்து, இந்தியா என்ற பெயரை பாரதம் என மாற்றுவது குறித்து அதிகாரப்பூர்வ தகவல்கள் வெளியாகாத நிலையில், இந்தியா என்ற பெயருக்கு பாகிஸ்தான் உரிமை கோரும் என்ற அளவுக்கு விவாதங்கள் சென்றுள்ளன.

பாரதம் எனப் பெயர் மாற்றினால் அது அகண்ட பாரதமாக மாறும். அப்பொழுது பாகிஸ்தான் பாரதத்தின் அங்கமாக மாறும்.

செப்டம்பர் 18ஆம் தேதி நாடாளுமன்ற சிறப்புக் கூட்டத் தொடர் தொடங்கவிருப்பதும், இந்தியா என்பது பாரதம் என பெயர் மாற்றம் செய்யப்படலாம் என்ற சந்தேகங்களும் தற்போது வேகமாகப் பரவி வருகிறது.

இந்தியா என்ற பெயரை மாற்றி #பாரதம் என சூட்டுவதற்கு இரு வேறு கருத்துகள் நிலவி வருகிறது.

இதற்கிடையே, தங்கள் நாட்டின் பெயர்களை தாங்களே மாற்றி அமைத்துக் கொண்ட நாடுகளின் பட்டியல் ஒன்று வெளியாகியிருக்கிறது.

அதன்படி, உலக நாடுகளில் 11 நாடுகள் தங்களது பெயர்களை பல்வேறு காலக்கட்டங்களில் மாற்றியமைத்துக் கொண்டுள்ளன.

2022 - துர்க்கியே (பழைய பெயர் துருக்கி)

துருக்கி என்ற பெயர் வான்கோழி இன பறவையுடன் தொடர்புடையது என்பதாலும், சில எதிர்மறையான கருத்துகளைக் கொண்டிருப்பதாலும் இந்தப் பெயரை அந்நாடு மாற்றியதாகக் கூறப்படுகிறது. துர்க்கியே என்ற பெயரே, அந்நாட்டு மக்களின் கலாசாரம், நாகரீகத்தை சிறப்பாக எடுத்தியம்புகிறது என்றும் தெரிவிக்கப்பட்டுள்ளது.

2019 - மியான்மர் (பழைய பெயர் பர்மா)

மியான்மர் பை என்பது அந்நாட்டின் எழுத்துப்பூர்வ மற்றும் இலக்கியப் பெயராகவும், பர்மா என்பது பேச்சு வழக்காகவும் இருந்துள்ளது. அந்நாட்டின் ராணுவ ஆட்சியின்போது மியான்மர் என்பது அதிகாரப்பூர்வ பெயராக மாற்றப்பட்டுள்ளது.

2018 - எஸ்வாத்தினி (பழைய பெயர் ஸ்வாஸிலாந்து)

2002 - டிமோர் லாஸ்டி (பழைய பெயர் ஈஸ்ட் டிமோர்)

1997 - காங்கோ ஜனநாயகக் குடியரசு (பழைய பெயர் ஜைர்)

1972 - ஸ்ரீலங்கா - (பழைய பெயர் சிலோன்)

பிரட்டிஷ் ஆட்சியில் வைக்கப்பட்ட சிலோன் என்ற பெயரை மாற்றி, சிங்கள மொழியில் பிரகாசமான நிலம் என பொருள் தரும் ஸ்ரீலங்கா என்ற பெயரை அந்நாடு சூட்டிக்கொண்டது.

1935 - ஈரான் - (பழைய பெயர் பெர்சியா)

1939 - தாய்லாந்து (பழைய பெயர் சியாம்)

நாடு, மக்கள் மற்றம் தேசியம் தாய் என அழைக்கப்பட வேண்டும் என்பதால், நாட்டின் பெயரை தாய்லாந்து என மாற்றியதாகத் தகவல்கள் தெரிவிக்கின்றன.

1949 - ஜோர்டான் (பழைய பெயர் டிரான்ஸ்ஜோர்டான்)

1957 - கானா (பழைய பெயர் கோல்டு கோஸ்ட்)

1966 - போட்ஸ்வானா (பழைய பெயர் பெச்சுவான்லாந்து) என 11 நாடுகள் இதுவரை தங்களது பெயர்களை மாற்றிக்கொண்டுள்ளன.

இது மட்டுமல்லாமல், சில நாடுகள் போரின்போது பிரிந்து, ஒரு நாடு இரண்டு நாடாக பிரியும் போதும் புதிய பெயர்கள் சூட்டப்பட்ட வரலாறும் இருந்துள்ளது.