புனே பேக்கரியில் குண்டுவெடிப்பு; 9 பேர் பலி, 45 பேர் படுகாயம்!


புனே: புனே நகரில் புகழ்பெற்ற ஓஷோ ஆசிரமம் அருகே சக்திவாய்ந்த குண்டு வெடித்தது. இதில் 9 பேர் பலியானார்கள். 45 பேர் படுகாயமடைந்தனர். நால்வர் நிலை மிகவும் கவலைக்கிடமாக உள்ளது.




ஜெர்மன் பேக்கரி ரெஸ்டாரன்ட் என்ற பழம் பெருமை மிக்க உணவு விடுதியில் சனிக்கிழமை மாலை இந்த குண்டு வெடித்தது.
இந்த பேக்கரியில் கேட்பாரற்றுக் கிடந்த ஒரு பையைக் கண்ட சர்வர், அதை எடுத்து திறக்க முயன்றபோது அதிலிருந்த குண்டு வெடித்துள்ளது.
சம்பவம் நடந்த இடத்துக்கு வெகு அருகில்தான் ஓஷோ ஆசிரமம் உள்ளது. இங்கு ஏராளமான வெளிநாட்டவர் அடிக்கடி வந்து செல்கின்றனர்.
அப்படி ஒரு வெளிநாட்டுப் பயணி என்ற போர்வையில் சில தினங்களுக்கு முன் இங்கு வந்த அமெரிக்க தீவிரவாதிதான் டேவிட் ஹெட்லி என்பது குறிப்பிடத்தக்கது. அவன் செய்த வேலையாகவும் இது இருக்கக் கூடும் என்கிறார்கள் இந்திய உளவுத் துறை வட்டாரத்தில்.
“இது சந்தேகமில்லாமல் தீவிரவாத தாக்குதல்தான். மிகவும் உயர்ந்த தொழில்நுடபத் திறனைப் பயன்படுத்தி இந்த குண்டை வெடிக்கச் செய்துள்ளனர். சம்பவ இடத்துக்கு சிபிஐயின் தடயவியல்துறை நிபுணர்கள் ஆதாரங்களைச் சேகரித்து வருகின்றனர்…” என்றார் மத்திய உள்துறைச் செயலாளர் கோபால கிருஷ்ண பிள்ளை.
சந்தேகத்துக்கிடமான பைகளைத் தொடாதீர்கள்!
இந்த குண்டு வெடிப்பைத் தொடர்ந்து மத்திய உள்துறை அமைச்சகம் அனைத்து மாநிலங்களுக்கும் ஒரு சுற்றறிக்கை அனுப்பியுள்ளது.
அதில், “கேட்பாரற்ற நிலையில் கிடக்கும் பைகள், சூட்கேஸ்கள் போன்றவற்றைத் தொட முயற்சிக்க வேண்டாம். உடனடியாக போலீசாருக்கு தகவல் கொடுங்கள்” என்று குறிப்பிடப்பட்டுள்ளது.
தமிழகம் முழுக்க போலீசார் எச்சரிக்கையுடன் இருக்கும்படி தமிழக அரசும் குறிப்பு அனுப்பியுள்ளது காவல் துறைக்கு