விமானம் ஏறும் முன் கழிவறை செல்ல அறிவுரை

செந்தில் · செந்தில் Wed Mar 17, 2010 9:22 am

விமானம் ஏறும் முன் கழிவறை செல்ல அறிவுரை

டோக்கியோ:விமானத்தில் ஏறுவதற்கு முன்பாக கழிப்பறைக்கு சென்று விட்டு வரும்படி ஜப்பான் விமான நிறுவனம் பயணிகளை வற்புறுத்தி வருகிறது.ஜப்பானின் "ஆல் நிப்பான் ஏர்வேஸ்' நிறுவனம் உள்நாட்டு மற்றும் வெளிநாட்டு விமான சேவையை நடத்தி வருகிறது. உள்நாட்டு விமானங்களில் பெண்கள் மட்டுமே பயன்படுத்தக்கூடிய கழிவறையை வைத்துள்ளது. முன்பெல்லாம் ஆண்களும், பெண்களும் ஒரே கழிப்பறையை பயன்படுத்தி வந்தனர். இந்த கழிப்பறையை பயன்படுத்தும் ஆண்கள் அந்த இடத்தை மிகவும் அசுத்தப்படுத்தி விடுவதாக பெண் பயணிகள் சார்பில் புகார் கூறப்பட்டு வந்தன. இதையடுத்து ஆண்கள், விமானத்தில் ஏறுவதற்கு முன்னதாக விமான நிலைய கழிப்பறைக்கு சென்று விட்டு வரும்படி அறிவுறுத்தப்பட்டுள்ளது. விமானத்தில் உள்ள கழிப்பறை பெண்களுக்கு மட்டும் தான், என அறிவித்துள்ளது.

முன்பெல்லாம் ஒரே கழிப்பறையை பயன்படுத்த பயணிகள் விமானத்திற்குள்ளேயே வரிசையில் காத்திருக்க வேண்டிய நிலை ஏற்பட்டது. கழிப்பறைக்காக காத்திருக்கும் பெண்கள் பின்னாலேயே ஆண்களும் நிற்பதால் பெண் பயணிகள் சங்கடப்பட்டனர். இந்த பிரச்னைக்கு முடிவு கட்ட தற்போது பெண்களுக்கு மட்டுமே கழிப்பறை, என, விமான நிறுவனம் அறிவித்து விட்டது.விமானத்தில் போதிய பெண் பயணிகள் இல்லாத பட்சத்தில், அவசரமான இயற்கை உந்துதலால் அவதிப்படும் ஆண்கள் இந்த கழிப்பறையை பயன்படுத்த அனுமதிக்கப்படும், என இந்த விமான நிறுவனம் தெரிவித்துள்ளது.கரியமிலவாயு வெளியேற்றத்தை கட்டுப்படுத்தவும், விமானத்தை தூய்மையாக வைத்து கொள்ளவும் இந்த நடவடிக்கை எடுக்கப்பட்டுள்ளதாக, இந்த விமான நிறுவன அதிகாரிகள் தெரிவித்துள்ளனர்.