பிரெஞ்ச் ஓபன் டென்னிஸ் : பெடரர் காலிறுதியில் - வீனஸ் வில்லியம்ஸ் வெளியேற்றம்

பிரெஞ்ச் ஓபன் கிராண்ட் ஸ்லாம் டென்னிஸ் போட்டியில் உலகின் நம்பர் 1 வீரரான சுவிட்சர்லாந்தின் ரோஜர் பெடரர் காலிறுதிச் சுற்றுக்கு முன்னேறினார். டென்மார்க்கின் நட்சத்திர வீராங்கனை கரோலின் வோஸ்னியாக்கி கால்இறுதிக்கு முன்னேறினார். வீனஸ் வில்லியம்ஸ் 4-வது சுற்றோடு வெளியேற்றப்பட்டார்.

கிராண்ட்ஸ்லாம்' அந்தஸ்து பெற்ற பிரெஞ்ச் ஓபன் டென்னிஸ் போட்டி பிரான்ஸ் தலைநகர் பாரிசில் நடந்து வருகிறது. இதில் நேற்று நடந்த ஆண்கள் ஒற்றையர் பிரிவின் 4-வது சுற்றில் நடப்பு சாம்பியனும், நம்பர் ஒன் வீரருமான சுவிட்சர்லாந்தின் ரோஜர் பெடரர் சக நாட்டவரான வாவ்ரின்காவை 6- 3, 7- 6 (5), 6- 2 என்ற நேர் செட் கணக்கில் வீழ்த்தி கால்இறுதிக்கு தகுதி பெற்றார்.

பெண்கள் ஒற்றையர் பிரிவில் நடந்த 4-வது சுற்று ஆட்டம் ஒன்றில் இத்தாலி வீராங்கனை பிரான்செஸ்கா ஷியவோன்னும், ரஷியாவின் மரியா கிரிலென்கோவும் மோதினார்கள். தனது முந்தைய சுற்றில் நடப்பு சாம்பியன் குஸ்னட்சோவாவுக்கு அதிர்ச்சி அளித்த கிரிலென்கோவினால், சியோவோனின் அனுபவத்துக்கு முன்னால் ஈடுகொடுக்க முடியவில்லை. 6- 4, 6- 4 என்ற நேர் செட் கணக்கில் சியோவோன் வெற்றி பெற்றார். இதன் மூலம் 9 ஆண்டுகளுக்கு பிறகு முதல் முறையாக சியோவோன் பிரெஞ்ச் ஓபனில் கால்இறுதிக்கு முன்னேறினார்.

மற்றொரு ஆட்டத்தில் ஒலிம்பிக் சாம்பியன் ரஷியாவின் எலினா டெமன்டிவா 6- 1, 6- 3 என்ற நேர் செட் கணக்கில் தென்ஆப்பிரிக்காவின் சானெல்லே ஸ்சீபர்சை எளிதாக வீழ்த்தி கால்இறுதியை எட்டினார்.

3-ம் நிலை வீராங்கனை டென்மார்க்கின் கரோலினே வோஸ்னியாக்கி-இத்தாலியின் பிளவியா பென்னட்டா இடையிலான ஆட்டத்தில் அனல் பறந்தது. 3 மணி நேரம் நீடித்த பரபரப்பான இந்த ஆட்டத்தில் வோஸ்னியாக்கி 7- 6 (7- 5), 6- 7 (4- 7), 6- 2 என்ற செட் கணக்கில் வெற்றி பெற்று முதல்முறையாக கால்இறுதிக்குள் நுழைந்தார்.

இன்னொரு ஆட்டத்தில் 2-ம் நிலை வீராங்கனையான அமெரிக்காவின் வீனஸ் வில்லியம்ஸ் அதிர்ச்சி தோல்வியை தழுவினார். அவரை 19-ம் நிலை வீராங்கனை ரஷியாவின் நாடியா பெட்ரோவா 6- 4, 6- 3 என்ற செட் கணக்கில் மண்ணை கவ்வ வைத்தார். இதுவரை 14 முறை பிரெஞ்ச் ஓபனில் பங்கேற்றும் ஒரு முறை கூட வீனஸ் பட்டம் வென்றதில்லை என்பது குறிப்பிடத்தக்கது. பெட்ரோவா கால்இறுதியில் சக நாட்டவரான டெமன்டிவாவுடன் பலப்பரீட்சை நடத்த உள்ளார்.

முன்னதாக முந்தைய நாள் போதிய வெளிச்சம் இல்லாததால் 3-வது செட்டுடன் நிறுத்தப்பட்டிருந்த ரஷியாவின் மரிய ஷரபோவா, பெல்ஜியத்தின் ஜஸ்டின் ஹெனின் இடையிலான 3-வது சுற்று ஆட்டம் நேற்று தொடர்ந்து நடந்தது. முன்னாள் நம்பர் ஒன் வீராங்கனைகள் மோதிய இந்த ஆட்டத்தில் முதல் 2 செட்களில் இருவரும் தலா ஒன்று வீதம் கைப்பற்றி இருந்தனர். இதனால் 3-வது செட்டில் விறுவிறுப்பு அதிகமானது. கடைசி செட்டில் முதல் 2 கேம்களை ஷரபோவா வென்றதுடன், 3-வது கேமையும் தன்வசப்படுத்தும் நிலையில் இருந்தார்.

அதன் பிறகு சரிவில் இருந்து மீண்டு பதிலடி கொடுத்த ஹெனின், ஷரபோவாவின் ஆதிக்கத்தை முறியடித்து வெற்றிக்கனியை பறித்தார். 2 மணி 10 நிமிடங்கள் நீடித்த இந்த ஆட்டத்தின் முடிவில் ஹெனின் 6- 2, 3- 6, 6- 3 என்ற செட் கணக்கில் வெற்றியை ருசித்தார்