நித்தியானந்தா விடுதலையாவதில் தாமதம் - திங்களன்று வெளியாக வாய்ப்பு

ரபீக் · ரபீக் Sat Jun 12, 2010 4:45 pm

சாமியார் நித்தியானந்தாவை ஜாமீனில் விடுதலை செய்வதில் சட்டச் சிக்கல்கள் ஏற்பட்டுள்ளன. இதனால் நாளையும் அவர் சிறையில் இருக்க வேண்டிய நிலை ஏற்பட்டுள்ளது.

பல்வேறு நிபந்தனைகளை விதித்து நித்தியானந்தாவுக்கு கர்நாடக உயர்நீதிமன்றம் ஜாமீனில் விடுதலை செய்ய நேற்று உத்தரவிட்டது. இதையடுத்து நித்தியானந்தாவுக்காக இரு நபர் ஜாமீன் உத்தரவாதம் அளிக்கப்பட்டது.

இதையடுத்து இன்று அவர் விடுதலையாவார் என்று எதிர்பார்க்கப்பட்டது. ஆனால், அதில் சட்டச் சிக்கல்கள் ஏற்பட்டுள்ளன. ஜாமீன் கொடுக்கும் இரு நபர்களின் பின்னணி குறித்து விசாரிக்க வேண்டியது சட்ட நடைமுறையாகும். அதை மேற்கொள்வதில் ராம்நகர் கோர்ட்டில் தாமதம் ஏற்பட்டுள்ளது.

நாளை ஞாயிற்றுக்கிழமை என்பதால், அது இயலாத காரியமாகியுள்ளது. எனவே நாளையும் நித்தியானந்தா சிறையில் இருக்க வேண்டிய கட்டாயம் ஏற்பட்டுள்ளது.