ஒற்றுமையுடன் பணியாற்ற இளைஞர் காங்கிரஸாருக்கு ராகுல் காந்தி அறிவுரை

ஒற்றுமையுடன் இணைந்து பணியாற்றுமாறு இளைஞர் காங்கிரஸ் நிர்வாகிகளுக்கு ராகுல் காந்தி அறிவுரை வழங்கியுள்ளதாக இளைஞர் காங்கிரஸ் மாநிலத் தலைவர் எம். யுவராஜா தெரிவித்தார்.

தமிழக இளைஞர் காங்கிரஸில் உள்ள 12.5 லட்சம் உறுப்பினர்களுக்கும் புகைப்படத்துடன் கூடிய அடையாள அட்டை வழங்க முடிவு செய்யப்பட்டுள்ளது. அடையாள அட்டை வழங்கும் விழா ஜூலையில் நடைபெற உள்ளது. இது குறித்து தமிழக காங்கிரஸ் தலைமை அலுவலகமான சத்தியமூர்த்தி பவனில் எம். யுவராஜ் செய்தியாளர்களிடம் புதன்கிழமை கூறியது:
தமிழக இளைஞர் காங்கிரஸில் 12.5 லட்சம் உறுப்பினர்கள் உள்ளனர். அவர்கள் அனைவருக்கும் புகைப்படத்துடன் கூடிய அடையாள அட்டை வழங்க இருக்கிறோம். 12.5 அடையாள அட்டைகளும் தயாராக உள்ளன. அவை அனைத்து மாவட்டங்களுக்கும் விரைவில் அனுப்பி வைக்கப்படும். அடையாள அட்டை வழங்குவதற்கான தொடக்க விழா தென் தமிழகத்தில் உள்ள ஏதாவது ஒரு முக்கிய நகரில் ஜூலை மாதத்தில் நடைபெறும். அதில் பங்கேற்குமாறு காங்கிரஸ் பொதுச்செயலாளர் ராகுல் காந்தியிடம் தேதி கேட்டுள்ளோம். அவரும் வருவதாக உறுதி அளித்துள்ளார். அடையாள அட்டை வழங்கும் விழா கிராமம், நகரம், மாவட்டவாரியாக நடைபெறும். ஜூன் முதல் வாரத்தில் சென்னை, ஈரோடு இரண்டு இடங்களில் இளைஞர் காங்கிரஸ் நிர்வாகிகளுக்கான பயிற்சி முகாம் நடைபெற்றது. சென்னையில் நடைபெற்ற பயிற்சி முகாமில் ராகுல் காந்தி கலந்து கொண்டது எங்களை மிகவும் உற்சாகப்படுத்தியுள்ளது. தமிழகத்தில் காங்கிரஸ் கட்சியை பலப்படுத்த வேண்டும் என்று அவர் எங்களுக்கு கட்டளையிட்டுள்ளார்.

அதற்காக கட்சி நிர்வாகிகளுடன் இணைந்து ஒற்றுமையுடன் பணியாற்ற வேண்டும். இளைஞர் காங்கிரஸ் தேர்தலில் வெற்றி பெற்ற நிர்வாகிகள் களத்தில் மக்களுடன் பணியாற்ற வேண்டும். அப்படி பணியாற்றும்போது ஏற்படும் அனுபவங்களை அனுப்புமாறு ராகுல் காந்தி எங்களைக் கேட்டுக் கொண்டுள்ளார். கட்சிக்காக சிறப்பாக பணியாற்றுபவர்களுக்கு மட்டுமே தேர்தலில் போட்டியிட வாய்ப்பு வழங்கப்படும் என்று ராகுல் காந்தி அறிவித்துள்ளார். அதனால், இளைஞர் காங்கிரஸ் நிர்வாகிகள் கடுமையாக உழைக்க வேண்டும். அடுத்த கட்டமாக தமிழகத்தில் 12 இடங்களில் பயிற்சி முகாம்கள் நடைபெறும் என்றார் யுவராஜா.

முன்னதாக முன்னாள் பிரதமர் சஞ்சய் காந்தியின் நினைவு நாள் சத்தியமூர்த்தி பவனில் அனுசரிக்கப்பட்டது. அலங்கரித்து வைக்கப்பட்டிருந்த அவரது உருவப்படத்துக்கு இளைஞர் காங்கிரஸ் தலைவர் எம். யுவராஜா, காங்கிரஸ் நிர்வாகிகள் தாமோதரன், சிவலிங்கம் உள்ளிட்டோர் மலர்தூவி மரியாதை செலுத்தினார்கள்.