பதிவுத்துறையில் மின்னணு கைரேகை பதிவுமுறை அறிமுகம்

ஆள் மாறாட்டம், போலி ஆவணப்பதிவுகளை தடுக்கும் வகையில் பதிவுத்துறையில்
மின்னணு கைரேகை பதிவுமுறை (பயோ-மெட்ரிக் முறை) அறிமுகப்படுத்தப்பட்டுள்ளது.
தற்போது பத்திரப்பதிவு அலுவலகங்களில் ஆவணங்களை பதிவு செய்ய
வேண்டுமானால் சொத்தை விற்பவரும், அதை வாங்குபவரும் நேரில் வந்து
கையெழுத்திட வேண்டும். இருவரின் போட்டோக்களும் ஆவணங்களில் ஒட்டப்பட்டு
அவர்களின் கைரேகையும் பதிவு செய்யப்படும். இந்த நிலையில், அவர்களின்
போட்டோக்களை வெப்-காமிரா மூலம் எடுத்து கைரேகையையும் கம்ப்யூட்டரில்
பதிவுசெய்யும் பயோ-மெட்ரிக் முறையை பதிவுத்துறை அறிமுகப்படுத்தி
இருக்கிறது. எனவே, பத்திரப்பதிவு செய்ய வருவோர் இனி போட்டோ எதையும்
எடுத்து வரத் தேவையில்லை. அதோடு கையில் மையை தடவிக்கொண்டு கைரேகையை பதிவு
செய்யவில்லை. ஒரே நொடியில் போட்டோவையும், கைரேகையை பதிவு செய்திடவும் வகை
செய்திருக்கிறது பயோ-மெட்ரிக் முறை.
இந்த புதிய வசதியை சென்னை சாந்தோமில் உள்ள பத்திரப்பதிவு தலைமை
அலுவலகத்தில் பதிவுத்துறை அமைச்சர் சுரேஷ்ராஜன் நேற்று தொடங்கி வைத்தார்.
பின்னர் அமைச்சர் சுரேஷ்ராஜன் நிருபர்களுக்கு பேட்டி அளித்தார். அப்போது
அவர் கூறியதாவது:-
தமிழகம் முழுவதும் 574 சார்-பதிவாளர் அலுவலகங்கள் உள்ளன. இதில்
முதல்கட்டமாக 250 சார்-பதிவாளர் அலுவலகங்களில் இந்த புதிய வசதி
தொடங்கப்படும்.
பத்திரப்பதிவில் மோசடியை தடுக்கும் வகையில்
இ-ஸ்டாம்பிங் வசதி அறிமுகப்படுத்தப்பட்டது. தற்போது சென்னை மாநகராட்சி
பகுதியில் 9 அலுவலகங்களில் இந்த வசதி செயல்படுத்தப்பட்டு வருகிறது.
விரைவில் மற்ற மாநகராட்சி பகுதிகளில் உள்ள அலுவலகங்களிலும்,
அதைத்தொடர்ந்து மாவட்டங்களில் உள்ள அலுவலகங்களிலும் இ-ஸ்டாம்பிங் வசதி
கொண்டுவரப்படும். இவ்வாறு அமைச்சர் சுரேஷ்ராஜன் கூறினார்.
பதிவுத்துறை ஐ.ஜி. ஆர்.சிவக்குமார் கூறுகையில், "இனிமேல் பத்திரப்பதிவு
செய்ய வருவோர் போட்டோ எதையும் கொண்டு வரத் தேவையில்லை. வெப்காமிரா மூலம்
அவர்களின் படங்களும், கைரேகையும் கம்ப்யூட்டரில் பதிவு
செய்யப்பட்டுவிடும். பயோ-மெட்ரிக் வசதி மூலம் இனிமேல் ஆவண விவரங்களை
கம்ப்யூட்டர் மூலம் ஒரே நிமிடத்தில் அறிந்து கொள்ளலாம்" என்றார்.
"பயோ-மெட்ரிக் வசதியை செயல்படுத்துவதற்காக தனி சாப்ட்வேர்
உருவாக்கப்பட்டிருப்பதாகவும், அது குறித்து அனைத்து ஊழியர்களுக்கும்
பயிற்சி அளிக்கப்படும்" என்று நேசனல் இன்பர்மேடிக்ஸ் சென்டர் (என்.ஐ.சி.)
தொழில்நுட்ப அதிகாரி கீதாராணி தெரிவித்தார்.