திருப்பரங்குன்றத்தில் பிச்சைக்காரர்கள் தொல்லை

திருப்பரங்குன்றம் : திருப்பரங்குன்றம் சுப்பிரமணிய சுவாமி
கோயிலுக்குவரும் பக்தர்களை, பிச்சைக்காரர்கள் பெரும் தொந்தரவு
செய்கின்றனர். அவர்களுக்கு வேண்டிய மறுவாழ்வு நடவடிக்கைகளை மேற்கொள்ள,
தொண்டு நிறுவனங்களும், போலீசாரும் முன்வரவேண்டும். கோயிலுக்கு உள்ளூர்,
வெளியர்களில் இருந்து ஏராளமான பக்தர்கள் வருகின்றனர். அவர்களுக்கு பெரும்
தலைவலியாக இருப்பது, பிச்சைக்காரர்கள்தான். அங்கு நூற்றுக்கும் அதிகமான
பிச்சைக்காரர்கள் உள்ளனர். இவர்கள் பக்தர்களிடம் பிச்சை கேட்கின்றனர்.
பக்தர்களில் சிலர் பரிதாபப்பட்டு 50 காசு அல்லது ஒரு ரூபாய்
கொடுக்கின்றனர். ""இதை கொடுக்கவா நீ சாமி கும்பிட வந்தே. இதை நீயே
வைத்துக்கொள்'' என கூறி, காசை பக்தர்கள்மீது வீசி எறிகின்றனர்.

காசு கொடுக்காமல் செல்லும் பக்தர்களை திட்டுகின்றனர். கார்,
வேன்களில்வரும் பக்தர்களை சூழ்ந்துகொண்டு, காசு கொடுக்கும்வரை
துரத்துகின்றனர். மொத்தமாக கொடுக்கும் பணத்தை பிரிப்பதில் அவர்களுக்குள்
அடிதடி ஏற்பட்டு சில சமயம் மண்டை உடைப்பும் நடக்கிறது. பரிகாரத்திற்காக
ஓட்டல்களில் சாப்பாடு கொடுப்பவர்களிடம் காலை 10 மணிக்குள் சாப்பாடு தவிர,
இலைக்கு 15 ரூபாயும், 11 மணிக்கு 20 ரூபாயும், ஒருமணிக்குமேல் 25 ரூபாயும்
வைத்தால்தான் சாப்பிடுகின்றனர். இல்லையெனில் சாப்பிடாமல், சாபமிட்டு
செல்கின்றனர்.
ஒரு கோஷ்டியின் எல்லைக்குள் மற்றவர் வந்துவிட்டால் அடிதடிதான். மாலை
ஆறுமணிக்கு மேல் ஏராளமான பிச்சைக்காரர்கள் போதையில் சண்டையிடுவது
வழக்கமாகிவிட்டது. சிலர் நல்ல உடல்நிலையில் இருந்தும் உழைக்க மனமின்றி
பிச்சை எடுக்கின்றனர். குழந்தைகளை பிச்சை எடுக்கவிட்டு, ஓரத்தில் ஒதுங்கி
நின்று, கலெக்சனை பெற்று வயிற்றை நிரப்பும் பெண்களின் எண்ணிக்கை
அதிகரித்து வருகிறது. இவர்களுக்கு மறுவாழ்வு கிடைக்க நடவடிக்கை எடுக்க
வேண்டும்.