திருச்சியில் 14-ந்தேதி ஜெயலலிதா ஆர்ப்பாட்டம்; எஸ்.எம்.எஸ். மூலம் ஆதரவு திரட்டும் அ.தி.மு.க.வினர்

விலைவாசி உயர்வு, மின் கட்டணம்
உயர்வு, மீனவர் பிரச்சினை உள்பட பல பிரச்சினைகள் தொடர்பாக தி.மு.க. அரசை
கண்டித்து திருச்சியில் வருகிற 14-ந்தேதி ஜெயலலிதா ஆர்ப்பாட்டம்
நடத்துகிறார். கோவையை அடுத்து திருச்சியில் நடக்கும் ஆர்ப்பாட்டத்தை
திருச்சியே திணறும் அளவுக்கு மக்கள் வெள்ளத்தை கூட்ட அ.தி.மு.க.வினர்
முடிவு செய்து உள்ளனர்.

அதற்கான
ஏற்பாடுகளில், அ.தி.மு.க.வினர் மும்முரமாக ஈடுபட்டு உள்ளனர். முதலில்
24-ந்தேதி என ஆர்ப்பாட்டம் தேதி அறிவிக்கப்பட்டிருந்த நிலையில் தற்போது
14-ந்தேதி என அறிவிக்கப்பட்டதால் குறைந்த நாட்களே உள்ளது.

எனவே
திருச்சி அ.தி.மு.க.வினர் ஆர்ப்பாட்ட ஏற்பாடுகளில் மும்முராகி உள்ளனர்.
100 அடி, 200 அடி என பிரமாண்ட சுவர் விளம்பரங்களை எழுதி வருகின்றனர்.

மேலும்
சட்டமன்ற தொகுதி பகுதி, வட்டம், கிளைகள், சார்பிலும் ஒவ்வொரு அணிகள்
சார்பிலும் தினமும் கூட்டங்கள் நடத்தப்பட்டு ஆர்ப்பாட்டத்தை வெற்றிகரமாக
நடத்துவது குறித்து ஆலோசித்து வருகின்றனர். நாளை திருச்சியில் மாநில
ஜெ.பேரவை செயலாளர் நயினார் நாகேந்திரன் தலைமையில் ஜெ.பேரவை நிர்வாகிகள்
ஆலோசனை கூட்டம் காந்திமார்க்கெட், மீனாட்சி மகாலில் நடக்கிறது.

ஒரு
புறம் சுவர்களை பிடித்து விளம்பரங்கள் எழுதி, வரும் நிலையில்
ஆர்ப்பாட்டத்துக்கு குறைந்த நாட்களே உள்ளதால் அ.தி.மு.க.வினர்
செல்போன்களையும், பயன்படுத்த தொடங்கி விட்டனர்.

செல்போன்களில்
எஸ்.எம்.எஸ். மூலமாகவும், அ.தி.மு.க.வினர் ஆதரவு திரட்டுகிறார்கள்.
“ஆகஸ்டு14, திருச்சி புரட்சித் தலைவி அம்மா அழைக்கிறார் வாரீர்” என
எஸ்.எம்.எஸ். சில் அழைப்பு விடுக்கப்படுகிறது.

பிரம்மாண்ட
சுவர் விளம்பரங்கள், போட்டி போட்டு எழுதப்படுவதால் பெயிண்டர்களுக்கு நல்ல
வேலை வாய்ப்பு கிடைத்து உள்ளது. நீண்ட நாட்களுக்கு பிறகு நல்ல சம்பளம்
கிடைக்கிறது என சுவர் விளம்பரம் எழுதுகிறவர்கள் சுறுசுறுப்புடன் எழுதி
வருகிறார்கள்.
எங்கு
பார்த்தாலும் ஆகஸ்டு - 14 ஆர்ப்பாட்டம் வாரீர் என எழுதி ஆர்ப்பாட்டகளையை
திருச்சியில் அமர்க்களப்படுத்தி வருகின்றனர் அ.தி.மு.க. வினர்.