ரிப்பன் கட்டிடம் புனரமைப்பு

சென்னை,

சென்னை மாநகராட்சி சார்பில் ரூ.7.70 கோடியில் ரிப்பன் கட்டிடம்
புனரமைக்கும் பணி அடுத்த ஆண்டு மார்ச் மாதத்திற்குள் முடிக்கப்படும் என்று
மாநகர மேயர் மா.சுப்பிரமணியம் கூறியுள்ளார்.

சென்னை
மாநகராட்சி சார்பில் ரிப்பன் கட்டிடம் புனரமைக்கும் பணி மற்றும் கூடுதல்
கட்டிடம் கட்டுமானப் பணிகளை மேயர் மா.சுப்பிரமணியன் இன்று நேரில் ஆய்வு
செய்தார்.
தொடர்ந்து அவர் கூறுகையில், சென்னை மாநகரில் புராதான கட்டிடங்களில் சென்னை மாநகராட்சி ரிப்பன் கட்டிடமும் ஒன்றாகும்.

இந்த
கட்டிடம் 1913ம் ஆண்டு கட்டப்பட்டதாகும். நூற்றாண்டை நெருங்கிக்
கொண்டிருக்கும் ரிப்பன் கட்டிடம் முதல் முறையாக புனரமைக்கும் பணிகள்
சென்னை மாநகராட்சி சார்பில் ஜவஹர்லால் நேரு தேசிய நகர்புற புனரமைப்பு
திட்டத்தின் கீழ் பணி மேற்கொள்ளப்படுகிறது.

இக்கட்டிடம் தொன்மை
மாறாமல் கலையம்சத்தை பேணும் வகையில் முழுமையாக புதுப்பிக்கும் பணி
நடைபெற்று வருகிறது. கட்டிடக் கலைஞர்கள் கொண்டு திட்டம் தயாரிக்கப்பட்டு,
ரூபாய் 7 கோடியே 70 லட்சம் செலவில் பணிகள் நடைபெறுகிறது.

இப்பணிகள்
அடுத்த ஆண்டு மார்ச் மாதத்தில் முடிக்கப்படும். ரிப்பன் கட்டிடத்தில்
மேயர் அலுவலகம், ஆணையாளர் அலுவலகம், மன்றக்கூடம், துறைத் தலைவர்கள்
ஆகியோர் இருக்கும் வகையில் வடிவமைக்கப்படுகிறது. தரைத்தளத்தில் பொதுமக்கள்
அறியும் வகையில் சென்னை மாநகரின் சிறப்புக்களையும், பழங்கால
வரலாற்றுக்களையும் தெரிந்து கொள்வதற்காக அருங்காட்சியகம் அமைக்கப்படும்.

ரிப்பன்
கட்டிட வளாகத்தில் 6 தளங்களுடன் கூடிய நிர்வாகக் கட்டிடம் ஒரு லட்சத்து 35
ஆயிரம் சதுர அடியில் கட்டப்படுகிறது. ரூ.18 கோடியே 15 லட்சம் செலவில்
நடைபெறும் இப்பணிகள் 10 மாதங்களில் முடிக்கப்படும் என்றார். இந்த ஆய்வின்
போது தலைமை பொறியாளர் விஜய்குமார், மேற்பார்வை பொறியாளர் குமரேசன் ஆகியோர்
உடன் இருந்தனர்.