தமிழகத்தில் காங்கிரஸ் தலைமையில் கூட்டணி : மருத்துவர் ராமதாஸ்

தமிழகத்தில் காங்கிரஸ் தலைமையில் கூட்டணி அமைய வேண்டும் என்று பாட்டாளி மக்கள் கட்சி நிறுவனர் மருத்துவர் ராமதாஸ் தெரிவித்தார்.
சனிக்கிழமையன்று மதுரையில் செய்தியாளர்களிடம் பேசியபோது ராமதாஸ் கூறியதாவது: நாங்கள் முதலில் அ.தி.மு.க. கூட்டணியில் இருந்தோம். பின்னர் அங்கிருந்து வெளியேறி தி.மு.க. கூட்டணியில் இணைந்தோம். அப்போது எங்கள் கட்சியை சேர்ந்த குரு, தி.மு.க.வைப்பற்றி தவறாக பேசினார் என்று தி.மு.க. கூட்டணியில் இருந்து வெளியேற்றப்பட்டோம்.

அதே நேரத்தில் பென்னாகரம் இடைத்தேர்தலில் அ.தி.மு.க. கூட்டணி குறித்து பேசியது. ஆனால் நாங்கள் யாருடன் சேராமல் தனித்து போட்டியிட்டோம். அதில் நாங்கள் 2வது இடத்தையும் பெற்றோம்.

இந்த நேரத்தில் தான் தி.மு.க. நிர்வாக குழு கூட்டத்தில் பா.ம.க.வை கூட்டணியில் சேர்ப்பது பற்றிய தீர்மானம் நிறைவேற்றப்பட்டது. அது சம்பந்தமாக எங்கள் கட்சி தரப்பில் கோ.க.மணி தலைமையில் 5 பேர் கொண்ட எம்.எல்.ஏ.க்கள் குழுவினர் முதல்வர் கருணாநிதியை சந்தித்து கூட்டணி குறித்து பேச்சுவார்த்தை நடத்தினோம். ஆனால் செம்மொழி மாநாடு முடிந்த பிறகு கூட்டணி பற்றி பேசுவதாக தெரிவித்தார்.

அதனால் இப்போது வரை நாங்கள் எந்த கூட்டணியிலும் இல்லை. மீண்டும் முதல்வர் பேச்சுவார்த்தைக்கு அழைத்தால் ஐவர் குழுவை அனுப்புவோம்.

தமிழகத்தில் மீண்டும் மேல்-சபை வருவதற்கு நாங்கள் தான் காரணம். நாங்கள் ஆதரவு தரவில்லை என்றால் மேல்-சபை தீர்மானத்தை நிறைவேற்றி இருக்க முடியாது. இதன் மூலம் கருணாநிதியின் 25 ஆண்டு கால கனவு பலித்துள்ளது. அதற்கு எங்களுக்கு கிடைத்த பரிசு ராஜ்ய சபாவில் ஒரு சீட் தருவதாக கூறி விட்டு தரவில்லை.

கடந்த 91, 96 தேர்தல்களில் தி.மு.க., அ.தி.மு.க. கட்சிகள் அல்லாத கட்சிகளை இணைத்து சமூக நீதி கூட்டணி என்ற பெயரில் தனித்து போட்டியிட்டோம். 96-ல் நாங்கள் 4 இடத்தில் வெற்றி பெற்றோம். அ.தி.மு.க. 2 இடத்தில் வெற்றி பெற்றது.

91ஆம் ஆண்டில் நாங்கள் ஒரு இடத்தில் வெற்றி பெற்றது போல், தி.மு.க.வும் ஒரு இடத்தில் வெற்றி பெற்றது. அதே போன்று மீண்டும் எங்கள் தலைமையில் சமூகநீதி கூட்டணி அமையும் வாய்ப்புள்ளது. அப்படி அமையுமானால் நாங்கள் 20 இடங்களில் வெற்றி பெறுவோம். எனவே அரசியலில் எதுவும் நடக்கலாம்.

தமிழகத்தில் தேசிய கட்சியான காங்கிரஸ் 1949 முதல் 67 வரை ஆட்சி நடத்தியது. 67-ல் காங்கிரசை எதிர்த்து அண்ணா, ராஜாஜி, காயிதேமில்லத், மா.பொ.சி. அடங்கிய கூட்டணியினர் ஒன்றாக இணைந்து காங்கிரஸ் கட்சியை வீழ்த்தினார்கள். அன்றிலிருந்து இன்று வரை 43 ஆண்டுகளாக காங்கிரஸ் கட்சி தமிழகத்தில் தனித்து ஆட்சியை பிடிக்க முடியவில்லை.

தமிழகத்தில் மீண்டும் காங்கிரஸ் ஆட்சி அமைவதற்கு, காங்கிரஸ் தலைமையில் கூட்டணி அமைய வேண்டும். அந்த கூட்டணி தி.மு.க., அ.தி.மு.க. இல்லாத கூட்டணியாக இருக்க வேண்டும். அந்த கூட்டணியில் பா.ம.க. கட்சி இருக்குமா என்று உறுதியாக கூறமுடியாது. அரசியலில் எந்த நேரத்திலும் எதுவும் நடக்கலாம்.

ஐ.ஏ.எஸ். அதிகாரி உமாசங்கர் மீது தமிழக அரசு நடவடிக்கை எடுத்துள்ளது. ஆனால் அவர் மீதான குற்றச்சாட்டிற்கு இது வரை அரசு விளக்கம் அளிக்கவில்லை.

மின் கட்டணம் 1,650 கோடி ரூபாய்க்கு உயர்த்தப்பட்டு, இந்த சுமை மக்கள் மீது ஏற்றப்பட்டுள்ளது. இலவச மின்சாரம் மூலம் அரசு 5 ஆயிரத்து 828 கோடி ரூபாய் மின்சார வாரியத்திற்கு வழங்க வேண்டும். ஆனால் அரசு 267 கோடி ரூபாய் தான் கொடுத்துள்ளது. இந்த பணம் முழுவதையும் அரசு மின்வாரியத்திற்கு வழங்கி இருந்தாலே, தற்போது மின்கட்டண உயர்வு தேவையில்லை. அந்த பணத்தை கட்டாததால் மின்சார கட்டணம் உயர்ந்துள்ளது.

டாஸ்மாக் ஊழியர்களின் கோரிக்கையான 8 மணி நேர வேலை, வார விடுமுறை, பணிநிரந்தரம் உள்ளிட்ட பல கோரிக்கைகளை வலியுறுத்தி ஆகஸ்டு 11ஆம் தேதி முதல் வேலை நிறுத்த போராட்டத்தில் ஈடுபட உள்ளனர். இதற்கு பா.ம.க. ஆதரவு தரும்.

இவ்வாறு அவர் தெரிவித்தார்.