"ஐ.ஐ.டி., கட்டணம் உயர்த்தும் முன்; அடிப்படை நடவடிக்கை தேவை'

மும்பை:


"ஐ.ஐ.டி., மாணவர்களுக்கான கட்டணத்தை உயர்த்துவதற்கு முன்,
மாணவர்களுக்கு ஆதரவாக சில நடவடிக்கைகளை எடுக்க வேண்டும்' என, மும்பை
ஐ.ஐ.டி., இயக்குனர் தேவாங் காகார் கூறினார். மும்பை ஐ.ஐ.டி.,யின்
இயக்குனரும், ஐ.ஐ.டி., மற்றும் ஜே.இ.இ., சீர்திருத்த கமிட்டியின்
உறுப்பினருமான தேவாங் காகார் கூறியதாவது: ஐ.ஐ.டி.,யில் படிப்பதற்கான
கல்விக் கட்டணம் உயர்த்தப்பட உள்ளதா என்பது குறித்து, பல்வேறு தரப்பிலும்
இருந்து கேள்விகள் கேட்கப்படுகின்றன. முன்னர், ஐ.ஐ.டி.,யில் சேரும்
மாணவர்கள், சற்று வசதியுடைய குடும்பங்களில் இருந்து வந்தனர். அதுபோன்ற
மாணவர்களின் எண்ணிக்கை தற்போது குறைந்துள்ளது. தற்போது வசதி இல்லாத
குடும்பங்களைச் சேர்ந்த மாணவர்கள் அதிக அளவில் ஐ.ஐ.டி.,க்களில்
சேருகின்றனர். கல்விக் கடன் பெறுவது தற்போது அத்தனை எளிதான விஷயமல்ல.
கட்டணத்தை உயர்த்தினால், ஏழைக் குடும்பங்களைச் சேர்ந்த மாணவர்கள்
ஐ.ஐ.டி.,க்களில் சேர்வது, எட்டாக் கனியாகவே போய் விடும். கட்டணத்தை
உயர்த்துவதற்கு முன், மாணவர்களுக்கு ஆதரவாக இது தொடர்பாக சில நடவடிக்கைகளை
மேற்கொள்ள வேண்டும். தற்போதுள்ள சூழ்நிலையில் புதிதாக ஐ.ஐ.டி.,க்களை
அமைப்பது என்பது மிகவும் சவாலான விஷயம். குஜராத்தின் காந்தி நகரில் புதிய
ஐ.ஐ.டி.,யை அமைத்துள்ளோம். இதைத் தொடர்ந்து, மேலும் சில ஐ.ஐ.டி.,க்கள்
அமைக்க முயற்சித்து வருகிறோம். ஆனால், அதற்கான வாய்ப்புகள் மிகவும்
குறைவு. அதிகமான ஐ.ஐ.டி.,க்கள் துவங்கப்பட்டால், கல்வித் தரம்
பாதிக்கப்படும். ஐ.ஐ.டி.,க்களை நடத்துவோர், மிகவும் திறமையானவர்களாக
இருக்க வேண்டும். இவ்வாறு தேவாங் காகார் கூறினார்.