ஒரு வழியாக எத்தனால் விலை நிர்ணயம்; மத்திய அமைச்சரவை முடிவு

புதுடில்லி:

பெட்ரோலில் கலப்பதற்கான எத்தனால் விலை, லிட்டர் 27 ரூபாய்
என, மத்திய அரசு நிர்ணயித்துள்ளது. இது இடைக்கால விலையே, நிபுணர் குழுவின்
பரிந்துரைக்குப் பின், இறுதி விலை நிர்ணயிக்கப்படும் என, அரசு
அறிவித்துள்ளது. பெட்ரோலில் 5 சதவீதம் எத்தனால் கலந்து விற்க வேண்டும் என,
2007 அக்டோபரில் மத்திய அமைச்சரவை முடிவு செய்தது. ஜம்மு - காஷ்மீர்,
வடகிழக்கு மாநிலங்கள் மற்றும் சில பகுதிகள் தவிர இதர மாநிலங்களில்
எத்தனால் கலந்த பெட்ரோல் விற்கவும் தீர்மானிக்கப்பட்டது. ஆனால்,
உற்பத்தியாளர்களிடம் இருந்து போதிய அளவுக்கு எத்தனால் கிடைக்காததால், இந்த
முடிவை, மத்திய பெட்ரோலிய அமைச்சகம் அமல்படுத்த முடியவில்லை. அதே
நேரத்தில், பெட்ரோலில் எத்தனால் கலக்க மத்திய ரசாயனத்துறை அமைச்சகமும்
எதிர்ப்புத் தெரிவித்தது. அப்படி கலந்தால், எரிசாராய தயாரிப்புக்கு
பயன்படும் மொலாசஸ் என்ற கருப்பஞ்சாறு கழிவு விலை அதிகரிக்கும் என்று
கூறியது. மொலாசஸில் இருந்துதான் எத்தனாலும், எரிசாராயமும்
தயாரிக்கப்படுகிறது. பெட்ரோலில் எத்தனால் கலக்கும் பிரச்னை தொடர்பாக
ஏற்பட்ட கருத்து வேறுபாடுகளை தீர்ப்பதற்காக, கடந்த மார்ச் மாதத்தில்
அமைச்சர்கள் குழு ஒன்று அமைக்கப்பட்டது. இக்குழுவினர் தீவிரமாக
பரிசீலித்து, எண்ணெய் நிறுவனங்களுக்கு சர்க்கரை ஆலைகள் வழங்கும்
எத்தனாலுக்கு லிட்டர் ஒன்றுக்கு 27 ரூபாய் வழங்க வேண்டும் என, கடந்த மாதம்
நிர்ணயித்தனர். ஆனால், ரசாயன தொழிற்சாலைகளும், எண்ணெய் நிறுவனங்களும்
எத்தனால் விலையை லிட்டருக்கு 18 ரூபாயாக நிர்ணயிக்க வேண்டும் என, கோரின.
காரணம் மதுபான தயாரிப்புக்கும், சிலவகை ரசாயனக் கலவைகளுக்கும்
தேவைப்படும் மூலப் பொருள் விலை அதிகரிக்கும் என்பதால் எதிர்ப்பு
தெரிவித்தன. அதை குழுவினர் நிராகரித்து விட்டனர். இந்நிலையில், மத்திய
அமைச்சரவைக் கூட்டம் நேற்று நடைபெற்றது. அதில், சர்க்கரை ஆலைகள் வழங்கும்
எத்தனாலுக்கு எண்ணெய் நிறுவனங்கள் லிட்டருக்கு 27 ரூபாய் வழங்க வேண்டும்
என, தீர்மானிக்கப்பட்டது. தற்போது வழங்கப்படும் விலை லிட்டருக்கு
ரூ.21.50. மேலும், இந்த 27 ரூபாய் என்பது இடைக்கால விலையே. நிபுணர்கள்
குழுவின் பரிந்துரைகளுக்குப் பின், இறுதி விலை நிர்ணயிக்கப்படும் என்றும்
அரசு அறிவித்துள்ளது. திட்ட கமிஷன் உறுப்பினர் சவுமித்ரா சவுத்ரி
தலைமையிலான குழுவினர் எதிர்காலத்தில் எத்தனால் விலையை நிர்ணயிப்பதற்கான
வழிமுறைகளை தயாரித்து வழங்குவர் என்றும் அரசு வட்டாரங்கள் கூறியுள்ளன.
மத்திய அரசின் இந்த அறிவிப்பை தொடர்ந்து, நேற்று பங்குச் சந்தைகளில்
சர்க்கரை ஆலைகளின் பங்குகள் விலை உயர்ந்தன. எத்தனாலுக்கு உரிய விலை தருவது
என்பது கரும்புத் தொழிலில் ஈடுபட்டிருக்கும் விவசாயிகளுக்கு நம்பிக்கை
தரும் செய்தியாகும். அதே சமயம் மதுபானத் தொழிற்சாலைகள் பாதிக்கப்பட
மாட்டாது. ஆனால் மதுபான விலை உயர்வு ஏற்படும் என்பது இவர்கள்
எதிர்ப்புக்கான காரணம். ரசாயனம், மதுபான தொழிற்சாலைகள் எதிர்ப்பு
எத்தனால் விலை லிட்டருக்கு 27 ரூபாய் என, மத்திய அரசு நிர்ணயித்ததை ரசாயன
தொழிற்சாலைகளும், மதுபான நிறுவனங்களும் கடுமையாக எதிர்த்துள்ளன. இதனால்,
சர்க்கரை ஆலைகள் பெருத்த லாபம் அடையும் என்றும் கூறியுள்ளன. இந்திய மதுபான
தயாரிப்பு நிறுவனங்கள் மற்றும் இந்திய ரசாயன கவுன்சில் சம்மேளனம்
இதுதொடர்பாக வெளியிட்டுள்ள அறிக்கையில் மேலும் கூறியுள்ளதாவது: பெட்ரோலில்
எத்தனால் கலக்க முடிவெடுத்ததன் மூலம், அதற்கு விலை நிர்ணயித்ததன் மூலம்
மதுபான ஆலைகள் மற்றும் ரசாயன ஆலைகள் பெரும் பாதிப்புக்கு ஆளாகும். தேவை
மற்றும் சப்ளைக்கு இடையேயான இடைவெளி அதிகரிக்கும். நாட்டின் தற்போதைய
எரிசாராய தேவை 250 கோடி லிட்டர். ஆனால், கிடைப்பதே 162 கோடி லிட்டர்தான்.
பெட்ரோலில் எத்தனால் கலக்கப்படும் போது, மதுபான ஆலைகள் தங்களின்
தேவைகளுக்கு எத்தனாலை கூடுதல் விலை கொடுத்து வாங்க நேரிடும். மேலும்,
எண்ணெய் நிறுவனங்களும் தங்களுக்கு தேவையான எத்தனால் பெற முடியாமல்
சிரமப்படும். கூடுதல் விலைக்கு விற்பதால், சர்க்கரை ஆலைகள் அதிக லாபம்
பெறும். இவ்வாறு அறிக்கையில் தெரிவிக்கப்பட்டுள்ளது.