பன்றிக் காய்ச்சல் தடுப்பூசி விலை ரூ.25 உயர்வு

சென்னை, செப்.23: தமிழக அரசு அளித்து வரும் பன்றிக் காய்ச்சல் தடுப்பூசி மருந்தின் விலை ரூ.200-லிருந்து ரூ.225-ஆக உயர்த்தப்பட்டுள்ளது. பன்றிக் காய்ச்சல் தடுப்புக்கு மூக்கில் விடப்படும் தடுப்பு மருந்தின் விலையும் ரூ.100-லிருந்து ரூ.115 ஆக அதிகரிக்கப்பட்டுள்ளது.

"வறுமைக் கோட்டுக்குக் கீழ் உள்ளோருக்கு பன்றிக் காய்ச்சல் தடுப்பூசி இலவசமாக போடுவதை உடனடியாக நடைமுறைப்படுத்த ஆணை பிறப்பிக்கப்படும்' என்ற முதல்வர் கருணாநிதி கடந்த வாரம் அறிவித்திருந்தார். அது இன்னும் நடைமுறைக்கு வரவில்லை. ஏழைகளுக்கு இலவச தடுப்பூசியைப் பொருத்தவரை அரசு ஆணைக்காகக் காத்திருப்பதாகவும், நிதி இலாகாவில் பரிசீலனையில் உள்ளதாகவும் சுகாதாரத் துறை உயர் அதிகாரிகள் தெரிவித்தனர்.

பன்றிக் காய்ச்சல் பாதிப்புக்கு அரசு புள்ளிவிவரங்களின்படி இதுவரை மொத்தம் 11 பேர் உயிரிழந்துள்ளனர். காய்ச்சல் அறிகுறிகளுடன் இதுவரை 912 பேர் சிகிச்சை பெற்றுள்ளனர். சென்னை, கோவை, கன்னியாகுமரி, வேலூர், புதுவை ஆகிய இடங்களில் பலர் சிகிச்சை பெற்று வருகின்றனர்.

தடுப்பூசி, தடுப்பு மருந்து: பன்றிக் காய்ச்சல் தடுப்பு நடவடிக்கைகளை தமிழக அரசு தீவிரப்படுத்தியுள்ளது. சென்னை கிண்டியில் உள்ள கிங் ஆய்வு மையத்தில் கடந்த செப்டம்பர் 13-ம் தேதி பன்றிக் காய்ச்சலுக்கான தடுப்பு மருந்து (மூக்கில் ஸ்பிரே செய்தல்) அல்லது தடுப்பூசி ஆகியவற்றை கட்டண அடிப்படையில் அரசு அமல்படுத்தியது. அதாவது, தடுப்பு மருந்துக்கு (ஸ்பிரே) ரூ.150-ம், தடுப்பூசிக்கு ரூ.250-ம் கட்டணமாக நிர்ணயிக்கப்பட்டது.

தொடர்ந்து சென்னை மாநகராட்சியின் ஆறு பரிசோதனைக்கூடங்களில் போடப்படும் பன்றிக் காய்ச்சல் தடுப்பு மருந்து (ஸ்பிரே) ரூ.100, தடுப்பூசி ரூ.200 என குறைத்து நிர்ணயிக்கப்பட்டு, பொது மக்களுக்கு போடப்பட்டு வந்தது. இந்த நிலையில் தடுப்பு மருந்து மற்றும் தடுப்பூசி விலையைக் குறைத்தால் கட்டுப்படியாகாது என மருந்துக் கம்பெனிகள் தமிழக அரசிடம் முறையிட்டன. இதனால் பன்றிக் காய்ச்சலுக்கான தடுப்பு மருந்தின் (ஸ்பிரே) விலையை ரூ.115-ஆகவும் தடுப்பூசியின் விலையை ரூ.225-ஆகவும் அதிகரித்து அரசு உத்தரவிட்டுள்ளது.

சித்த மருந்துகள்: பன்றிக் காய்ச்சல் தடுப்புக்கு "கபசுரக் குடிநீர்' (தூள்), பிரம்மானந்த பைரவம் மாத்திரை, அமுக்கரா மாத்திரை ஆகிய சித்த மருந்துகள் உள்ளன. தாம்பரம் சானடோரியம் தேசிய சித்த மருத்துவ நிறுவனம், சென்னை அரும்பாக்கம் அறிஞர் அண்ணா இந்திய மருத்துவ முறை மருத்துவமனை ஆகியவற்றில் இந்த சித்த மருந்துகள் இலவசமாக வழங்கப்படுகின்றன. சித்த மருந்துக்கடைகளிலும் இந்த மருந்துகள் கிடைக்கும். மருத்துவரின் ஆலோசனைப்படி தொடர்ந்து மூன்று தினங்கள் காலையில் வெறும் வயிற்றில் இந்த மருந்துகளைச் சாப்பிடலாம்.

தகவலுக்கு நன்றி குணா!