குலோத்துங்க சோழன் கட்டி நின்றுபோன கோயம்பேடு குறுங்காலீஸ்வரர் கோவில் ராஜகோபுர வாசற்கால் வைக்கும் விழா

குலோத்துங்க சோழன் கட்டி நின்றுபோன கோயம்பேடு குறுங்காலீஸ்வரர் கோவில் ராஜகோபுர வாசற்கால் வைக்கும் விழா இன்று நடைபெறுகிறது


சென்னை, நவ.18- குலோத்துங்க சோழன் கட்டி நின்றுபோன கோயம்பேடு குறுங்காலீஸ்வரர் கோவில் ராஜகோபுர வாசற்கால் வைக்கும் விழா இன்று (வியாழக்கிழமை) நடைபெறுகிறது.

வால்மீகி தவம் இருந்த இடம்

சென்னை கோயம்பேட்டில் பிரசித்தி பெற்ற குறுங்காலீஸ்வரர் கோவில் உள்ளது. சிவன் கோவிலான இந்த கோவில் 900 ஆண்டுகளுக்கு முன்பு குலோத்துங்க சோழன் காலத்தில் திருப்பணி செய்யப்பட்டுள்ளது. ஆனால் ராஜகோபுரம் கட்டும் பணி தொடங்கப்பட்டு அது நின்றுபோய் மொட்டையாக காட்சி அளிக்கிறது. இந்த கோவில் மிகவும் பிரசித்தி பெற்று விளங்கியதாக 21 கல்வெட்டுகள் உள்ளன.

இந்த கோவில் அமைந்துள்ள இடத்தில், முன்பு வால்மீகி முனிவர் ஆசிரமம் அமைத்து தவமிருந்து உள்ளார். ராமர் மனைவி சீத்தாதேவி கர்ப்பிணியாக அங்கு வந்து தங்கி லகுவன்-குசலவனை பெற்று இருக்கிறார். அங்கு தான் ராமனுக்கும், தந்தை என்று தெரியாமல் லகுவன்-குசலவன் ஆகியோருக்கும் இடையே போர் நடந்து பின்னர் தந்தை என்று தெரிந்த பின்னர் அதற்காக சிவலிங்கத்தை அவர்கள் இருவரும் வழிபட்டதும் அந்த லிங்கமே குறுங்காலீஸ்வரர் ஆகும் என்றும் தலவரலாறு கூறுகிறது.

நின்றுபோன ராஜகோபுர திருப்பணியை செய்வது தொடர்பாக முதல் அமைச்சர் கருணாநிதி 2007-2008-ம் ஆண்டு அறிவிப்பு வெளியிட்டார். அதைத் தொடர்ந்து அமைச்சர் பெரிய கருப்பன் கடந்த 2008-ம் ஆண்டு ஆகஸ்டு மாதம் 1-ந் தேதி திருப்பணி தொடங்கப்பட்டது. அஸ்திவாரம் அமைக்கும் பணி முடிந்துவிட்டது.

வாசற்கால்

ராஜகோபுர நுழைவு வாயில் அமைக்கும் பணி நடந்து வருகிறது. இந்த பணியில் தமிழர்கள் வழக்கப்படி நிலை வாசற்கால் வைக்கும் விழா இன்று (வியாழக்கிழமை) காலை 9-30 மணிக்கு நடைபெறுகிறது. இதையொட்டி மூலவருக்கு சிறப்பு பூஜை நடைபெறுகிறது. பூஜைகள் விஜயகுமார் குருக்கள் தலைமையில் நடைபெற்று வருகிறது.

விழாவையொட்டி 7 நிலைகள் கொண்ட ராஜகோபுரம் பக்தர்களின் நன்கொடையால் கட்டப்பட உள்ளது.

விழா ஏற்பாடுகளை இந்து சமய அறநிலையத்துறை இணை ஆணையர் பி.வாசுதேவன், துணை ஆணையர் த.காவேரி, கோவில் நிர்வாக அதிகாரி த.மோகனசுந்தரம் ஆகியோர் செய்து வருகிறார்கள்.