ஜூலியன் அசாஞ் - விக்கிலீக்

ஆப்கானிஸ்தானில் அமெரிக்கா தலைமையிலான வட அத்திலாந்திக் ஒப்பந்த நாடுகளின் (நேட்டோ) படைகள் நடத்தி வருகின்ற போர் பற்றிய செய்திக் குறிப்புகளும் இரகசியச் செய்திப் பரிமாற்றங்களும் புலனாய்வுத் துறையின் தகவல்களும் அடங்கிய சுமார் 92 ஆயிரம் ஆவணங்களைக் கடந்த ஜூலை மாத இறுதியிலும் ஈராக்கில் ஆக்கிரமிப்புப் படைகளின் நடவடிக்கைகள் தொடர்பான சுமார் 4 இலட்சம் இரகசிய ஆவணங்களைக் கடந்த அக்டோபர் மாத இறுதியிலும் வெளியிட்டு சர்வதேச அரங்கில் பெரும் பரபரப்பையும் அதிர்ச்சியையும் ஏற்படுத்திய "விக்கிலீக்ஸ்' இணையத்தளம் இவ்வாரம் அமெரிக்காவின் அந்தரங்க இராஜதந்திர செய்திப் பரிமாற்றங்கள் அடங்கிய சர்ச்சைக்குரிய சுமார் 2 இலட்சத்து 50 ஆயிரம் ஆவணங்களை வெளியிட்டிருக்கிறது.ஒபாமா நிருவாகத்துக்குப் பெரும் நெருக்கடியைக் கொடுத்திருக்கும் விக்கிலீக்ஸின் நடவடிக்கையை அடுத்து ஏற்படக்கூடிய இராஜதந்திர ரீதியான பாதகவிளைவுகளை உடனடியாக மதிப்பிடுவது சிரமமான காரியம் என்ற போதிலும், வாஷிங்டனுடன் அந்தரங்கமான இராஜதந்திர மற்றும் பாதுகாப்புத் துறைத் தகவல்களைப் பரிமாறிக்கொள்வதில் தங்களுக்கு ஏற்படக்கூடிய சிக்கல்கள் குறித்து உலகநாடுகள் குறிப்பாக அமெரிக்காவின் நேச நாடுகள் பெரும் பீதியடைந்திருக்கின்றன என்பதில் சந்தேகமில்லை.குறுகிய நான்கு மாத கால இடைவெளிக்குள் இலட்சக்கணக்கான அந்தரங்க ஆவணங்களை வெளியிட்டிருக்கும் விக்கிலீக்ஸிடம் உலகின் சக்திவாய்ந்த நாடுகளின் தலைவர்களையும் அரசாங்கங்களையும் மாத்திரமல்ல, மூன்றாம் உலக நாடுகளின் அரசாங்கங்களையும் நெருக்கடிக்குள்ளாக்கக்கூடிய இன்னமும் எத்தனை இலட்சம் சர்ச்சைக்குரிய ஆவணங்கள் இருக்கின்றனவோ அவை எந்தெந்தத் தருணங்களில் வெளியிடப்படுமோ என்பதே தற்போது சர்வதேச அரசியல் அரங்கில் எழுந்திருக்கும் முக்கியமான கேள்வியாகும். விக்கிலீக்ஸ் இணையத்தளத்தின் ஸ்தாபகரான அவுஸ்திரேலியாவைச் சேர்ந்த 39 வயதான கம்பியூட்டர் விற்பன்னர் ஜூலியன் அசாஞ் உலகம் பூராவும் உளவுவேலைகளில் ஈடுபடுகின்ற அமெரிக்கப் புலனாய்வு நிறுவனங்களுக்கு சவால்விடும் வகையில் செயற்பட்டு அமெரிக்க ஆளும் வர்க்கத்தையும் புலனாய்வுத் துறைச் சமூகத்தையும் உலகின் முன் தலைகுனிய வைத்திருப்பதைக் காணக்கூடியதாக இருக்கிறது. துரோகியென்றும் பயங்கரவாதியென்றும் அமெரிக்காவில் வர்ணிக்கப்படுகின்ற அசாஞ்சைக் கைது செய்து விசாரணைக்குட்படுத்துவதற்கான முழு அளவிலான முயற்சிகளில் அமெரிக்க அதிகாரிகளும் அரசியல்வாதிகளும் இறங்கியிருக்கிறார்கள். ஜூலையில் முதற்தடவையாக ஆப்கான் போர் நடவடிக்கைகள் தொடர்பான இரகசிய ஆவணங்களை இணையத்தளத்தில் வெளியிட்ட தருணம் முதலிருந்தே மேற்குலகில் ஒரு தலைமறைவு வாழ்க்கையை நடத்தி வரும் அசாஞ்சுக்கு எதிராக பிரான்ஸைத் தலைமையகமாகக் கொண்டியங்கும் சர்வதேச பொலிஸ் அமைப்பான "இன்ரர்போல்' பிடியாணையைப் பிறப்பித்திருக்கிறது.பிரிட்டனுக்கும் சுவீடனுக்கும் இடையே அந்தரங்கமாகப் பயணம் செய்துவருவதாக நம்பப்படும் அசாஞ் தற்போது லண்டனில் இருப்பதாக சந்தேகிக்கப்படுகின்ற போதிலும், மேற்குலகப் புலனாய்வுச் சேவைகளினாலேயே அவரின் நடமாட்டங்கள் குறித்த திட்டவட்டமான தகவல்களைத் தரமுடியாமல் இருக்கிறது. தனது மகனால் சவாலுக்குட்படுத்தப்பட்டிருக்கும் சக்திகள் மிகவும் பிரமாண்டமானவை என்பதால் அவரது உயிருக்கு ஏற்படக்கூடிய அச்சுறுத்தல் குறித்து அவுஸ்திரேலியாவில் இருக்கும் தாயார் கிறிஸ்ரீன் அசாஞ் நேற்றைய தினம் பெருங்கவலை வெளியிட்டிருக்கிறார். பாலியல் வல்லுறவு மற்றும் பாலியல் துன்புறுத்தல் களில் ஈடுபட்டோர் என்ற சந்தேகத்தின் பேரில் சுவீடன் நீதிமன்றமொன்று இருவாரங்களுக்கு முன்னர் ஜூலியன் அசாஞ்சை தடுப்புக்காவலில் வைக்குமாறு உத்தரவிட்டது. அந்த உத்தரவின் பேரிலேயே தற்போது "இன்ரர்போல்' அவரைக் கைது செய்வதற்காக அதன் உறுப்பு நாடுகளை உஷார்ப்படுத்தியிருக்கிறது. அசாஞ் மீது வழக்குத் தொடுப்பதற்கான நடவடிக்கைகளைப் பொறுத்தவரை, அமெரிக்க அரசியலமைப்பில் உத்தரவாதப்படுத்தப்பட்டுள்ள கருத்து வெளிப்பாட்டுச் சுதந்திரம் உட்பட பல்வேறு வகையிலான சட்டச் சிக்கல்களை ஒபாமா நிருவாகம் எதிர்நோக்க வேண்டியிருக்கும் என்று அவதானிகள் அபிப்பிராயம் தெரிவித்திருக்கிறார்கள். அசாஞ் விவகாரத்தைக் கையாளுவதில் அமெரிக்காவும் மேற்குலகமும் அடுத்துவரும் நாட்களில் கடைப்பிடிக்கக்கூடிய அணுகுமுறைகள் சர்வதேச குடியியல் மற்றும் ஜனநாயக உரிமைகள் தொடர்பிலான உடன்படிக்கைகள், சாசனங்களைப் பொறுத்தவரையில் உலகின் வல்லாதிக்க நாடுகளுக்குப் பெரும் அமிலப் பரிசோதனையாக அமையும் ஆபத்தைக் கொண்டிருக்கின்றன!