மாநில கட்சிகள் நாட்டின் வளர்ச்சிக்கு எதிரானது - எடியூரப்பா!

"மாநில கட்சிகள் நாட்டின் வளர்ச்சிக்கு எதிரானது" என்று கர்நாடக முதலமைச்சர் எடியூரப்பா சட்டசபையில் பேசினார். இதற்கு ஜனதாதளம்(எஸ்) தலைவர் குமாரசாமி கடும் கண்டனம் தெரிவித்துள்ளார்.

அவர் நேற்று பெங்களூரில் செய்தியாளர்களிடம் பேசும்போது, "’நாட்டின் வளர்ச்சிக்கு மாநில கட்சிகள் விரோதமானவை என்று முதலமைச்சர் எடியூரப்பா சட்டசபையில் கூறியுள்ளார். ஆனால் பீகாரில் ஐக்கிய ஜனதாதளத்துடன் சேர்ந்து கூட்டணி அரசு அமைத்து இருப்பது ஏன்?. தமிழகத்தில் மாநில கட்சியுடன் பல தடவை கூட்டணி வைத்தது ஏன்?" என்று கேள்வி எழுப்பினார்.

"கர்நாடகத்தில் மாநில கட்சியான ஜனதாதளம்(எஸ்) ஐ ஒழித்துக்கட்ட எடியூரப்பா நினைக்கிறார். இது அவரது பகல் கனவாகவே முடியும். ஜனதாதளம்(எஸ்) கட்சியைச் சாதாரணமாக எடைபோடும் எடியூரப்பா, மக்களுக்குப் பதில் சொல்லும் காலம் வெகு தூரத்தில் இல்லை. கர்நாடக சட்டசபை நிலவரத்தைப் பார்க்கும்போது தேசிய கட்சிகள் தாம் மாநில வளர்ச்சிக்குத் விரோதமாக விளங்குகின்றன" என்று பதிலடி கொடுத்தார்.

"தேவேகவுடா குடும்பத்தினரைக் குறித்து சட்டசபையில் விவாதிக்காமல் எடியூரப்பா தப்பிக்க முயற்சிப்பது ஏன்? சட்டசபையைத் தவறாக பயன்படுத்தி கொண்டு ஜனதாதளம்(எஸ்) தலைவர்கள் மீது ஒருமையில் பேசி வருவதை வன்மையாக கண்டிக்கிறேன். எனக்கு எதிராக உரிமை மீறல் பிரச்சினையைக் கொண்டு வர எடியூரப்பா நடவடிக்கை எடுத்து உள்ளார். இதையும் வரவேற்கிறேன். உரிமை மீறல் குழு முன்பு நான் எனது வாதத்தை வைக்க தயாராக இருக்கிறேன்.

எடியூரப்பா மீது தனிப்பட்ட முறையில் எனக்கு எந்த விருப்பு, வெறுப்பும் இல்லை. அவர் எடுக்கும் தவறான முடிவுகளுக்கு எதிராகவே போராடி வருகிறேன். ஜனதாதளம்(எஸ்) கட்சி மாநில வளர்ச்சிக்கு எதிராக என்றுமே நடந்தது இல்லை. அரசு சட்டவிரோதமாக நடந்து கொள்வதால் போராடி வருகிறோம்" என்று அவர் மேலும் தெரிவித்தார்

அப்போ நீங்க மாநிலதில ஆட்சிய பிடிக்க போராட்றீங்க தேயசிய அளவுள்ள யே ஆட்சிய பிடிக்க வேண்டியது தானே