தாக்கப்பட்ட கர்ப்பிணி மாது 30 வினாடிகளில் பெண் போலீஸ்காரரை அடையாளம் காட்டினார்

சுங்கை பூலோவில் கடந்த வாரம் சாதாரண உடை அணிந்திருந்த போலீஸ் அதிகாரிகளினால் தாம் அறையப்பட்டு கொள்ளை அடிக்கப்பட்டதாகக் கூறிக் கொண்ட சௌ சூ மெங், தமது கைப்பையிலிருந்து 20,000 ரிங்கிட்டை எடுத்ததாக கூறும் பெண் போலீஸ்காரரை அடையாளம் காட்டியுள்ளார்.

பெட்டாலிங் ஜெயா போலீஸ் தலைமையகத்தில் இன்று பிற்பகல் மணி 12.05 வாக்கில் எட்டு பெண்கள் கலந்து கொண்ட அணி வகுப்பு ஒன்றில் அந்த போலீஸ் அதிகாரியை 38 வயதான சௌ அடையாளம் காட்டினார். அந்த அதிகாரி கான்ஸ்டபிள் தகுதி உடையவர் என நம்பப்படுகிறது.

எட்டு மாத கர்ப்பிணியான சௌவுடன் வழக்குரைஞரும் சிகாம்புட் நாடாளுமன்ற உறுப்பினருமான லிம் லிப் எங்கு சென்றிருந்தார்.

“தமக்கு கைவிலங்கிட்டு தமது பணத்தை எடுத்துக் கொண்ட பெண் அதிகாரியை சுட்டிக் காட்டுவதற்கு அவர் 30 வினாடிகள் மட்டுமே எடுத்துக் கொண்டார்”, என லிம் சொன்னார்.

முதலில் சௌவின் கடையிலிருந்து எந்தப் பொருளையும் எடுப்பதற்கு போலீசாருக்கு உரிமை இல்லை என அவர் வலியுறுத்தினார்.

“மதுபானம், சிகரட்டுகள் ஆகியவற்றை மட்டுமே சுங்கத் துறை கைப்பற்ற முடியும். போலீசார் அல்ல”, என்றும் லிம் தெரிவித்தார்.

“அந்தப் போலீசார், போலீஸ் போதைப் பொருள் தடுப்புப் பிரிவைச் சேர்ந்தவர்கள். அவர்கள் போதைப் பொருட்களைத் தேடினர். ஆனால் அந்த இடத்தில் எதுவும் கண்டு பிடிக்கப்படவில்லை.”

கடத்தப்பட்ட சிகரட்டுக்களை வைத்திருந்ததற்காக 15,000 ரிங்கிட் அபராதம் செலுத்துவதற்கும் தாம் தயாராக இருந்ததாக சௌ சொன்னார்.

“ஆனால் எனக்கு 20,000 ரிங்கிட் மீண்டும் கிடைக்க வேண்டும் என நான் விரும்புகிறேன். நியாயம் கிடைப்பதைக் காணவும் விரும்புகிறேன். இது வரை போலீசார் எனக்கு எதிராக எந்தக் குற்றச்சாட்டையும் சுமத்தவில்லை. அந்த அதிகாரிகள் தண்டிக்கப்படுவர் என நான் நம்புகிறேன்”, என்றும் அவர் கூறினார்.

இதனிடையே தொடர்பு கொள்ளப்பட்டபோது அந்த விவகாரம் பற்றிக் கருத்துரைக்க பெட்டாலிங் ஜெயா ஒசிபிடி அர்ஜுனாய்டி முகமட் மறுத்து விட்டார்.

தாக்கப்பட்டதாக சௌ செய்த புகார் விசாரிக்கப்படுகிறது

சௌ கடந்த சனிக்கிழமை மேலும் ஐந்து போலீஸ் அதிகாரிகளை அணி வகுப்பு ஒன்றின்போது அடையாளம் காட்டினார்.

பிப்ரவரி 2ம் தேதி மாலை மணி 6.30 அளவில் சௌ, தமது கடையின் கதவுகளைத் திறக்க மறுத்த பின்னர் அந்தக் கடையின் இரும்புக் கதவை சாதரண உடை அணிந்திருந்த போலீசார் வெட்ட வேண்டியிருந்தது.

போலீசார் அவரது கடையிலிருந்து பல வகையான சிகரெட்டுக்கள், ஆறு போத்தல் மதுபானம், மண்டெரின் ஆரஞ்சு மற்றும் மூன்று பெட்டி டின்னில் அடைக்கப்பட்ட பானங்கள், 30 மோபைல் சிம் அட்டைகள், கடையில் பதிக்கப்பட்டிருந்த டிவி கேமரா ஆகியவற்றை போலீசார் எடுத்துச் சென்றனர்.

அந்த நடவடிக்கையின்போது தான் அறையப்பட்டதாக் கூறிக் கொண்ட சௌ, 20,000 ரிங்கிட் ரொக்கத்தையும் திருடியதாகவும் சொன்னார். பின்னர் அவர் கெப்போங் போலீஸ் நிலையத்தில் புகார் செய்தார்.

அந்தப் பணத்தையும் மற்ற பொருட்களையும் அதிகாரிகள் எடுத்ததாகக் கூறப்படுவதை பெட்டாலிங் ஜெயா போலீஸ் மறுத்துள்ளது.

போலீசார் தங்கள் விசாரணைகளில் ஒரு பகுதியாக 15,900 ரிங்கிட்டை மட்டுமே கைப்பற்றினர் என்றும் அதுவும் தீய வழிகளில் கிடைத்த வருமானமாக இருக்கலாம் என்றும் அது கூறிக் கொண்டது.

தாம் தாக்கப்பட்டதாக சௌ கூறியுள்ள குற்றச்சாட்டு மீதான விசாரணை நடைபெற்று வருகின்றது.

மலேசியாஇன்று

அந்த பெண் மீது தவறு இருந்தாலும் கற்பிணி என்பதால் அவரை அடிக்காமல் சட்டப்படி நடவடிக்கை எடுதுருக்கலாம்

SK wrote:அந்த பெண் மீது தவறு இருந்தாலும் கற்பிணி என்பதால் அவரை அடிக்காமல் சட்டப்படி நடவடிக்கை எடுதுருக்கலாம்

இங்கு இனத்துவேஷம் தலைவிரித்தாட ஆரம்பித்துவிட்டது செந்தில்! இன்னும் சில ஆண்டுகளில் விஸ்பரூபமெடுக்க ஆரம்பித்துவிடும்.

சிங்கப்பூரில் இனத்துவேஷம் இருப்பதாக கேள்வி பட்டு இருக்கிறேன் மலேஷியாவிலுமா உலகம் அழிவை நோக்கி நகர்ந்து கொண்டு இருக்கிறது என்று சுருக்கமாக சொல்லலாம்