குப்பை அழுகிய துர்நாற்றம் ஒரே மாதிரி இருப்பது ஏன்?

நம்மில் பலர் ஒரு டீக்கடைக்கோ, குளிர்பானக் கடைக்கோ போகிறோம். நமக்குப் பிடித்த பானத்தைப் பெற்றுக் குடித்துவிட்டு காகிதக் கோப்பை அல்லது பிளாஸ்டிக் கோப்பையைக் கசக்கி தூக்கி எறிகிறோம். பிஸ்கட் சாப்பிட்ட பிறகு, பிஸ்கட் சுற்றி வரும் பேப்பரை அல்லது அட்டையைத் தூக்கி எறிகிறோம். இப்படி நமது வாழ்க்கையில் பயன்படாதவை, தேவையற்றவை என்று எத்தனையோ விஷயங்களைக் குப்பை, கழிவு என்று தூக்கி எறிகிறோம்.

ஆனால் பெருநகரங்களில் வாழ்பவர்கள் குப்பைத் தொட்டிகள் அருகே செல்லும்போது, பொதுவாக என்ன செய்கிறார்கள் என்று பார்த்திருக்கிறீர்களா? மூக்கைப் பிடித்துக்கொண்டு வேகமாக அந்த இடத்தைக் கடந்து செல்வார்கள். குப்பைத் தொட்டியிலிருந்து வெளிவரும் சகிக்க முடியாத துர்நாற்றமே இதற்குக் காரணம். அதேபோல குப்பைகள் ஓரிடத்தில் அகற்றப்படாமல் தொடர்ச்சியாகக் கொட்டப்பட்டுக்கொண்டிருந்தால் அவை அழுகி, அங்கிருந்து ஒருவித துர்நாற்றம் ஏற்படுகிறது. வீட்டிலுள்ள குப்பைத் தொட்டியில் குப்பையை அகற்றாமல் சில நாட்கள் விட்டுவிட்டாலும்கூட துர்நாற்றம் வீச ஆரம்பித்துவிடுகிறது. ஏன் இப்படி நடக்கிறது?

இந்த நாற்றம் அனைத்தும் கிட்டத்தட்ட ஒரே மாதிரி இருக்கிறது. இப்படி துர்நாற்றம் வருவதற்கான காரணம் என்ன? குப்பை அழுகுவது எப்படி?

காற்றில் நிறைய பாக்டீரியாக்கள், பூஞ்சைகள் இருக்கின்றன. எந்த ஒரு திடக் கழிவிலும் மக்கும் குப்பை, மக்காத குப்பை என்று இரண்டு வகை இருக்கும். காய்கறி, பழம், உணவுப் பொருட்கள் உள்ளிட்டவை மக்கும் கழிவுகள். பிளாஸ்டிக், கண்ணாடி, உலோகப் பொருட்கள்போன்றவை உடனடியாக மக்காத குப்பைகள். மக்கும் குப்பைகளில் தாவரப் பொருள் இருக்கிறது. இது அழுகுவதே துர்நாற்றத்திற்குக் காரணம். பெரும்பாலும் வெதுவெதுப்பான, அதேநேரம் ஈரப்பதம் அதிகமுள்ள இடங்களில்தான் இந்த அழுகுதல் விரைவாக நடைபெறுகிறது.

பாக்டீரியாக்களும் பூஞ்சைகளும் தாவரப்பொருளை சாப்பிடுவதால் ஏற்படும் வேதியியல் சிதைவுதான் அழுகுதல். உண்ணும் உணவு, அதை உட்கொள்ளும் பாக்டீரியாவின் வகையைப் பொருத்து இந்த துர்நாற்றம் மாறுபடுகிறது.

ஒரு ஆரஞ்சுப் பழக் கழிவின் மேல் உருவாகும் பென்சிலின் பாக்டீரியாவும், ஆய்வகத்தில் உருவாக்கப்படும் பென்சிலின் பாக்டீரியாவும் ஒரே மாதிரி துர்நாற்றத்துடனே இருக்கின்றன. அவற்றின், மூக்கைத் துளைத்து எரிச்சலூட்டும் தன்மை கொண்ட துர்நாற்றம் நாம் ஏற்கனவே சுவாசித்தது போலவே இருக்கும்.

வீட்டிலுள்ள குப்பைகளில் சில நேரம், நோய் உருவாக்கும் பாக்டீரியாக்களும் இருக்கக்கூடும். இவற்றில் மிகவும் மோசமானது "பாஸ்டுரெல்லா பெஸ்டிஸ்'. இந்த பாக்டீரியா ஆட்கொல்லியான பிளேக் நோயைப் பரப்பக் கூடியது. எலிகளின் மூலம் பரவும் தன்மை கொண்டது. எனவே, அழுகிய குப்பைகள் குறித்து எப்பொழுதும் எச்சரிக்கையாக இருங்கள். அதிகம் முகர்ந்து பார்த்துவிடாதீர்கள்.

இந்த இடத்தில் ஒரு விஷயத்தை நினைவுபடுத்திக்கொள்ள வேண்டும். நம்மையெல்லாம் இவ்வளவு காலம் வாழ வைத்துக்கொண்டிருப்பதும், எதிர்காலத்தில் வாழ வைக்கப் போவதுமான இயற்கை எவ்வளவு பெரிய விஞ்ஞானி தெரியுமா? இயற்கை, எதையுமே கழிவு என்று வீணாக்குவது இல்லை. இயற்கையில் எல்லாமே மூலப்பொருட்கள்தான். இயற்கையில் ஓர் உயிரினத்திற்குத் தேவையற்றதாகக் கருதப்படுவது, மற்றொரு உயிரினத்திற்கு உணவாகக்கூட மாறலாம். இறந்த ஒரு உயிரினம், புழு பூச்சிகளுக்கு உணவாக மாறுகிறதல்லவா? அது போலத்தான் இதுவும். எல்லாமே இயற்கை சுழற்சியின் பகுதிகள்தான்.

அமிதா

நல்ல பதிவு அண்ணா