மது குடிக்க பணம் தராததால் மனைவி அடித்துக்கொலை

மது குடிக்க பணம் தராததால் மனைவி அடித்துக்கொலை; மாநகராட்சி தொழிலாளி கைது

மது குடிக்க பணம் தராததால் மனைவியை அடித்துக்கொன்றதாக மாநகராட்சி ஒப்பந்த தொழிலாளியை போலீசார் கைது செய்தனர்.

இதுபற்றி போலீஸ் தரப்பில் கூறப்படுவதாவது:-

குடிப்போதையில் தகராறு

கோவை கவுண்டம்பாளையம் ஆர்.எஸ்.நகரைச் சேர்ந்தவர் சாமுவேல்(வயது48). கோவை மாநகராட்சியில் குப்பை அள்ளும் ஒப்பந்த பணியாளராக வேலைப்பார்த்து வருகிறார். இவரது மனைவி ஜான்சி(40). இவர்களுக்கு ஜெர்சி(14) என்ற 9-ம் வகுப்பு படிக்கும் மகள் இருக்கிறாள். சாமுவேலுக்கு குடிப்பழக்கம் இருந்து வந்ததாக தெரிகிறது.

இந்த நிலையில் கடந்த 4-ந்தேதி இரவு சாமுவேல் வழக்கம் போல குடிபோதையில் வீட்டுக்கு வந்ததாக கூறப்படுகிறது. மீண்டும் அவர் குடிப்பதற்காக, மனைவி ஜான்சியிடம் பணம் கேட்டார். அதற்கு அவர் பணம் இல்லை என்று கூறினார். உடனே சாமுவேல், தனது மனைவி மறைத்து வைத்து இருந்த பணத்தை எடுக்க முயன்றார். இதனால் கணவன்-மனைவி இடையே கடும் வாக்குவாதம் ஏற்பட்டது.

பரிதாப சாவு

அப்போது சாமுவேல் ஆத்திரத்தில் மனைவி ஜான்சியை அடித்து உதைத்தார். மேலும் அவரை பலமாக பிடித்து தள்ளியதாக கூறப்படுகிறது. இதில் கதவு மீது மோதிய அவருக்கு முகத்தில் பலத்த காயம் ஏற்பட்டது. உடனடியாக அக்கம் பக்கத்தினர் ஜான்சியை கோவை அரசு ஆஸ்பத்திரியில் சேர்த்தனர். அங்கு அவருக்கு தீவிர சிகிச்சை அளிக்கப்பட்டு வந்தது.இந்த நிலையில், நேற்று பகல் ஜான்சி சிகிச்சை பலனின்றி பரிதாபமாக இறந்தார். இதைத்தொடர்ந்து துடியலூர் போலீஸ் இன்ஸ்பெக்டர் சுகுமாறன், சப்-இன்ஸ்பெக்டர் அருண் ஆகியோர் கொலை வழக்காக பதிவு செய்து, தலைமறைவாக இருந்த சாமுவேலை கைது செய்தனர். தொடர்ந்து அவரிடம் போலீசார் விசாரணை நடத்தி வருகிறார்கள்.