போலி சான்றிதழ் வழக்கு: சப்-இன்ஸ்பெக்டர், 2 போலீசார் பிள்ளைகள் சிக்கினார்கள்

போலி சான்றிதழ் வழக்கில் அதிரடி திருப்பமாக சப்-இன்ஸ்பெக்டர், 2
போலீசாரின் பிள்ளைகளும் சிக்கினார்கள், அவர்களிடம் விசாரணை
மேற்கொள்ளப்பட்டு, போலீஸ் காவல் முடிந்து குற்றவாளி ஏகாம்பரத்தை மீண்டும்
புழல் மத்திய சிறையில் அடைத்தனர்.
போலி பிளஸ்-2 மார்க் சான்றிதழ் வழக்கை சென்னை மத்திய குற்றப்பிரிவு
போலீசார் விசாரித்து வருகிறார்கள். துணை கமிஷனர் ஸ்ரீதர், கூடுதல் துணை
கமிஷனர் வெங்கடேஸ்வரன் ஆகியோர் தலைமையில் 5 தனிப்படையினர் இந்த வழக்கு
விசாரணையை மேற்கொண்டுள்ளனர். போலி மார்க் சான்றிதழ் மூலம் என்ஜினீயரிங்
மற்றும் மருத்துவ கவுன்சிலிங்கிற்கு வந்ததாக மொத்தம் 25 மாணவ-மாணவிகள்
மீது புகார் கொடுக்கப்பட்டது. அவர்களில் 12 பேர் மாணவிகள், 13 பேர்
மாணவர்கள் ஆவார்கள். புகார் கொடுக்கப்பட்ட 25 பேரில் நேற்று வரை 23
மாணவ-மாணவிகளிடம் விசாரணையை முடித்து விட்டனர்.
திருவள்ளூர் மாவட்டம் பள்ளிப்பட்டைச் சேர்ந்த மாணவி அபிராமிதான்
முதன்முதலாக போலி சான்றிதழ் விவகாரத்தில் சிக்கினார். அவர் இன்னும்
விசாரணைக்கு வரவில்லை. இதுவரை நடந்த விசாரணையில் சப்-இன்ஸ்பெக்டர் மற்றும்
2 போலீஸ்காரர்களின் பிள்ளைகளும் போலி சான்றிதழ் வழக்கில் சிக்கி உள்ளனர்.
ஒரு போலீஸ்காரரும், சப்-இன்ஸ்பெக்டரும் ஆரணியை சேர்ந்தவர்கள். இன்னொரு
போலீஸ்காரர் சென்னையை சேர்ந்தவர்.
அவர்களிடம் தீவிர விசாரணை நடைபெற்றது. விசாரணையில் போலி சான்றிதழ்
என்று தெரியாமல், மறுமதிப்பீட்டு சான்றிதழ் என்று நினைத்து வாங்கி
விட்டதாக அவர்கள் விசாரணையில் தெரிவித்தார்கள். போலீசார் குடும்பமே போலி
சான்றிதழ் விவகாரத்தில் சிக்கியது விசாரணை அதிகாரிகளுக்கு கடும்
அதிர்ச்சியை கொடுத்துள்ளது.
இந்த வழக்கில் கைது செய்யப்பட்டு 3 நாள் போலீஸ் காவலில் வைத்து
விசாரிக்கப்பட்ட ஏகாம்பரத்தை விசாரணை முடிந்து போலீசார் மீண்டும் புழல்
ஜெயிலில் அடைத்து விட்டனர்.
ஏகாம்பரம் வீட்டில் நடந்த சோதனையில் ஏராளமான போலி சான்றிதழ்களின்
ஜெராக்ஸ் நகல்கள் சிக்கியுள்ளது. தற்போது விசாரணை பிடியில் உள்ள 25
மாணவ-மாணவிகளும் குற்றவாளியாக கருதப்படுவார்களா? என்பது விசாரணை முடிந்த
பிறகுதான் முடிவு செய்யப்படும் என்று போலீஸ் அதிகாரி ஒருவர் தெரிவித்தார்.