பகரைனில் போராட்டக்காரர்களை போலீசார் அடித்து விரட்டியதில் 2 பேர் பலி, முகாம்கள் சேதப்படுத்தப்பட்டன

அரபு நாடுகளுள் ஒன்றான பகரைனில் போராட்டக்காரர்களை கலவர தடுப்பு போலீஸ் அடித்து விரட்டியது. இதில் 2 பேர் பலியானார்கள். அவர்களின் முகாம்கள் சேதப்படுத்தப்பட்டன.

மத்திய கிழக்கு நாடுகளில்

எகிப்து, துனிஷியா ஆகிய நாடுகளில் நீண்ட காலமாக ஆட்சியில் இருக்கும் அதிபர்களை எதிர்த்து மக்கள் புரட்சியில் ஈடுபட்டனர். இதில் மக்கள் சக்திக்கு முன்னால் நிற்க முடியாத அதிபர்கள் நாட்டை விட்டு ஓடினார்கள். இந்த வெற்றி மற்ற நாடுகளிலும் புரட்சியை தூண்டி விட்டு உள்ளது.

மத்திய கிழக்கு நாடுகளில் பெரும்பாலானவற்றில் இன்னும் மன்னர் ஆட்சிகளும், சர்வாதிகார ஆட்சிகளும் நடப்பதால் மக்கள் அதை எதிர்த்து கிளர்ந்து எழுந்து உள்ளனர். பகரைன், லிபியா, ஏமன், ஈரான், அல்ஜீரியா என பல்வேறு நாடுகளில் புரட்சி வெடித்து உள்ளது.

மன்னர் சன்னி, மக்கள் ஷியா

பகரைன் நாட்டு மக்களில் பெரும்பாலானவர்கள் ஷியா பிரிவு முஸ்லிம்கள் ஆவார்கள். ஆனால் அந்த நாட்டில் மன்னராக இருக்கும் ஹமாத் பின் இசா அல் கலீபா சன்னி பிரிவு முஸ்லிம் ஆவார். இதனால் ஷியா முஸ்லிம்கள் நாட்டு நிர்வாகத்தில் தங்களுக்கும் பங்கு வேண்டும் என்று கேட்டு போராட்டத்தில் ஈடுபட்டு உள்ளனர். கடந்த திங்கட்கிழமை முதல் ஆட்சிக்கு எதிராக போராட்டம் நடந்து வருகிறது.

தலைநகர் மனாமா நகரில் உள்ள பேர்ல் திடலில் மக்கள் திரண்டு முகாம்கள் அமைத்து தங்கி இருக்கிறார்கள். அங்கிருந்தபடி அவர்கள் போராட்டத்தை நடத்தி வருகிறார்கள்.

2 பேர் பலி

நேற்று காலை பொழுது விடிந்ததும், கலவரத்தடுப்பு போலீசார் 50 கவச வாகனங்களுடன் அந்த திடலுக்குள் அதிரடியாக நுழைந்தனர். அவர்கள் போராட்டக்காரர்களை அடித்து விரட்டினார்கள். கண்ணீர் புகைக்குண்டுகளை வீசினார்கள். ரப்பர் குண்டுகளால் சுட்டனர்.

அதோடு முகாம்களை அடித்து நொறுக்கினார்கள். முகாம்களை துவம்சம் செய்வதற்கு கவசவாகனங்கள் பயன்பட்டன. அவை சேதப்படுத்தப்பட்டன. இந்த சம்பவத்தில் 2 பேர் பலியானார்கள். இவர்களையும் சேர்த்து மொத்தம் இதுவரை 4 பேர் பலியானார்கள்.

கண்டனம்

போராட்டக்காரர்கள் மீது தாக்குதல் நடத்த உத்தரவிட்டதை எதிர்க்கட்சிகள் கண்டித்து உள்ளன. இது தான் உண்மையான தீவிரவாதம் என்று பாராளுமன்ற உறுப்பினர் அப்துல் ஜலீல் கலீல் தெரிவித்து இருக்கிறார். அவர் ஷியா முஸ்லிம்களின் எதிர்க்கட்சியை சேர்ந்தவர் ஆவார்.

பேர்ல் திடல் முழுவதையும் காலி செய்து விட்டு தான் கலவரத்தடுப்பு போலீசார் அங்கு இருந்து வெளியேறினார்கள். போலீஸ் நடவடிக்கையில் 12-க்கும் மேற்பட்டவர்கள் காயம் அடைந்ததாக எதிர்க்கட்சி எம்.பி.யான சயீத் ஹாதி குறிப்பிட்டார். அவர் மேலும் கூறுகையில், இது ஏதோ எதிரி நாட்டினர் மீது நடத்தப்பட்ட தாக்குதல் போல இருக்கிறது என்றும் குறிப்பிட்டார்.

இதற்கிடையில் மன்னர் ஹமாத் இறந்தவர்களின் குடும்பத்துக்கு தன் ஆழ்ந்த இரங்கலை தெரிவித்து கொண்டார்.