விண்வெளியில் ஒரு குறுங்கோளை ‘சிறை’ பிடிக்கும் பணிகளில் மும்முரமாக இறங்கி இருக்கிறது அமெரிக்காவின் ‘நாஸா’
‘ நா ன் வலை விரித்தால் விண்மீனும் தப்பாது!’ என்பது நம்மூர் ஹீரோக்களின் வெற்று அலட்டல். ஆனால், அதை உண்மையாக நடத்திக் காட்ட, களம் இறங்கிவிட்டது அமெரிக்கா.
-
‘நாஸா’ (NASA ) நிறுவனத்தின் எதிர்காலத் திட்டம் ஒன்றைப் பற்றி லண்டனில் இருந்து வெளிவரக்கூடிய , Daily Mail’ பத்திரிகை அண்மையில் வெளியிட்டிருந்த செய்தி இதை விவரிக்கிறது. விண்வெளியில் ஒரு குறுங்கோளை (Asteroid) ‘சிறை’ பிடிக்கும் எண்ணத்தில் இருக்கிறது அமெரிக்கா.
அது, பூமிக்கும் நிலவுக்கும் இடையே உள்ள சுற்றுவட்டப் பகுதியில் குறுக்கிட்டுச் செல்லும் ஒரு குறுங்கோளைப் பற்றி தற்போது NASA ஆய்வு செய்து வருகிறது. இந்தக் குறுங்கோள் 500 டன் எடையும்50 அடி குறுக்களவும் கொண்டது. அமெரிக்க வெள்ளை மாளிகையின் அறிவியல் மற்றும் தொழில்நுட்பப் பிரிவு இத்திட்டத்தைப் பரிசீலித்து ஒப்புதல் அளித்தவுடன் பணிகள் தொடங்கவுள்ளன. இதன் மொத்தச்செலவு இந்திய மதிப்பில் 14,155 கோடி ரூபாய்!
-
விண்ணில் ஒரு கோளை ‘சிறை’ பிடிப்பது முதலில் சாத்தியமா? ஆம் என்றால் அதுஎப்படி?
‘நாஸா’வும் கலிஃபோர்னிய தொழில்நுட்பக் கழகமும் ( Caltech ) இணைந்து இதற்கான செயல் விளக்கத்தைக் கொடுத்துள்ளன. -குறுங்கோளைப்பிடிப்பதற்கான ஒரு பிரத்யேகக் கலம் (Asteroid Capture Capsule) , அட்லஸ் 5 வகை ராக்கெட்டுகளுடன் பொருத்தப்படும். சுழன்று வரும் குறுங்கோளுக்கு அருகில் நெருங்கியவுடன் விண்கலத்திலிருந்து 50 அடி அகலமுள்ள ஒரு ராட்சதத் துணிப்பை வலையைப் போல விரியும். இந்தத் துணிப்பை, கோளைச் சுற்றி விரிந்தவுடன் சுருக்குப் பையைப் போல கயிறால் கட்டி இழுக்கப்படும். இப்படியாக குறுங்கோள், விண்கலத்தின் கட்டுப்பாட்டுக்குள் வந்துவிடும். சரியாக அப்பொழுது விண்கலத்தின் என்ஜின்கள் வேலை செய்யத் தொடங்கும். குறுங்கோளை அதன் சுற்றுவட்டப் பாதையிலிருந்து இழுத்து, புவியீர்ப்பு விசை மிகவும் குறைந்த இடத்துக்கு விண்கலம் இட்டுச் செல்லும்.இதற்கு 300 கிலோ எரிபொருள் பயன்படுத்தப்படும். இந்த ஈர்ப்பு விசை இல்லா இடத்தை (Gravitationally Neutral spot) அடைந்தவுடன் கோளின் சுழற்சி முழுமையாக நின்றுவிடும். ஆக, அது முதல்அந்தக் குறுங்கோள், மனிதனுக்கு அடிமையாகிறது. ஒரு விண்வெளிப் பொருள் செயற்கையாக நகர்த்தப்படுவது பிரபஞ்ச வரலாற்றிலேயே இதுதான் முதல் முறை. இத்திட்டதிற்குத் தேவையான தொழில்நுட்பம் இப்போது முழுமையாக இல்லாவிட்டாலும், 2020ல் இது சாத்தியம் என்கிறது நாஸா. இதற்குத் தேவையான தொழில்நுட்பத்தைத் தயாரிக்க அடுத்த பத்தாண்டுகள் மும்முரமாக செலவிடப்படும்.
-
இந்த ‘அடிமை’க் கோளினால் என்ன பயன்?
நீண்டதூர விண்வெளி ஆராய்ச்சிக்கு செல்கையில் இந்தக் கோளை ஒரு பேருந்து நிறுத்தம்போல பயன்படுத்தலாம். நீண்டகால ஆராய்ச்சியின்போது விண்வெளி வீரர்கள் செல்லும் விண்கலத்தை இங்கே நிறுத்திவிட்டு தேவையான எரிபொருளை நிரப்பிக் கொள்ளலாம்; பழுது ஏற்பட்டாலும் இங்கே இடை நிறுத்தி சரிசெய்து கொள்ளலாம். முக்கியமாக, செவ்வாக்கு ஆராய்ச்சிக் கலம் அனுப்பும்போது இது பெரிதும் உதவும். அடுத்த 10-12 ஆண்டுகளில் தொழில்நுட்ப வளர்ச்சி வேற்றுக் கோள்களில் உள்ள கனிம வளத்தை அகழ்வாராய்ந்து எடுக்க உதவும் என்கிறது ‘நாஸா’. சில கோள்களில் உள்ள இரும்பு வளத்தை புதிய விண் நிலையங்கள் (Space station) அமைக்கப் பயன்படுத்தலாம். இன்னும் சிலவற்றில் நீராதாரங்கள் உண்டு. நீரை ஹைட்ரஜன் (Hrdrogen) மற்றும்ஆக்ஸிஜன் (Oxygen) வாயுக்களாகத் தனியாகப் பிரித்து எரிபொருள் செய்யலாம். இத்தகைய ஆராய்ச்சிகள் விண்வெளியைப்பற்றிய நமது புரிதலை மேலும்செம்மைப்படுத்தும். உலகில் உயிரின் தோற்றம் பற்றிய அதிசய உண்மைகளைக் கண்டறிய பெரிதும் உதவும்.
இது மட்டுமல்ல, மாயன் நாட்காட்டியை அடிப்படையாகக் கொண்டு 2012 டிசம்பர் 21ல் உலகம் அழியும் என்று சொல்லப்பட்டதற்குக் கூட, ஒரு குறுங்கோள் பூமியின் மீது வந்து மோதும் என்று நம்பப்பட்டது தான் காரணம். அது வெறும் புரளியாக முடிந்திருந்தாலும் இனிமேல் அப்படி, கோள்கள் வந்து மோத வாய்ப்புகள் இல்லாமல் இல்லை. பல்லாயிரம்ஆண்டுகளுக்கு முன்னர், உலகிலிருந்து டைனோசர்கள் அழிந்து போனதற்குக் கூட இப்படி ஒரு கோள் மோதியதும் ஒரு காரணம் என்று ஓர் ஆய்வு கூறுகிறது. எது எப்படி இருந்தாலும் சரி, இனிமேல் நமக்கு அந்தப் பயம் வேண்டாம். நாஸாவின் இந்தத் திட்டம் வெற்றியடைந்தால் வருங்காலத்தில், ஹாலிவுட் திரைப்படங்களில் வருவது போல மோத வரும் கோள்களை விண்ணிலேயே ‘கேட்ச்’ செய்து திசைதிருப்பி விடலாம்!
-
இத்தகைய ஆராய்ச்சிகளை மேற்கொள்ள 3 அம்சங்கள் முக்கியம்.
*. பூமிக்கு அருகில் இருக்கக் கூடிய குறுங்கோள்களைக் கண்டறிந்து ஆராய்வது.
*. விண்வெளியில் குறுங்கோளை வழிநடத்த சூரிய ஒளி ஆற்றலில் இயங்கக் கூடிய கலங்கள்.
*. விஞ்ஞானிகள் விண்வெளியில் தங்கி, ஆராய்ச்சி மேற்கொள்ளத் தேவையான வசதிகள்.
இவை சாத்தியமானால், வருங்காலத்தில் நம் தேவைக்கு பூமியின் இயற்கை வளங்களையும் தாண்டி மற்ற கோள்களின் வளங்களையும் பயன்படுத்த முடியும். பல நூற்றாண்டுகளுக்கு முன்பிருந்தே வேற்றுக் கோள்களின் வளங்களைப் பயன்படுத்தும் எண்ணம் மனிதனுக்கு இருந்திருந்தாலும், அது ‘நாஸா’வின் இத்திட்டம் வழியாக முதல் முறையாய் 2020ல்தான் நிறைவேற இருக்கிறது.
-
இப்பூவுலகைச் சூறையாடியது போதாதென்று தற்போது பிரபஞ்சத்தையும் பதம் பார்ப்பது சரிதானா என்ற கேள்வி விரைவில் எழும். ஆனால், அறிவியல் விளையாட்டுகளில் எந்த விதிமுறைகளும் இல்லை என்பதே நிதர்சனம்.
-
புதிய தலைமுறை

என்னமா சிந்திக்கிறாங்கப்பா - அபாரம்

வான்வெளியில் ஒரு சர்வீஸ் ஸ்டேஷன் விண்கலங்களுக்கு

அய்யய்யோ இதப் படிச்சுட்டே பாருங்க ரோட்டில் இருந்த பள்ளத்தை கவனிக்கல - விழுந்துட்டேன் - நம்ம ஊரு இன்னும் இப்படியேதான் இருக்குமோ?

//இப்பூவுலகைச் சூறையாடியது போதாதென்று தற்போது பிரபஞ்சத்தையும் பதம் பார்ப்பது சரிதானா//

யினியவன் wrote:என்னமா சிந்திக்கிறாங்கப்பா - அபாரம்

வான்வெளியில் ஒரு சர்வீஸ் ஸ்டேஷன் விண்கலங்களுக்கு

அய்யய்யோ இதப் படிச்சுட்டே பாருங்க ரோட்டில் இருந்த பள்ளத்தை கவனிக்கல - விழுந்துட்டேன் - நம்ம ஊரு இன்னும் இப்படியேதான் இருக்குமோ?

எப்படியெல்லாம் சிந்திக்கராங்கப்பா.............