கண்ணாடி

**சிவா** · **சிவா** Sat Mar 19, 2011 11:56 am

ஒரு உருவத்தை ஏறக்குறைய நூறு சதவீதம் எதிரொளிக்கக் கூடிய பொருளை `ஆடி' அல்லது `கண்ணாடி' என்பார்கள். வீட்டு உபயோகத்திற்குப் பயன்படும் கண்ணாடிகள், சமதளமானவை. சாதாரணக் கண்ணாடியின் பின்புறத்தில் வெள்ளி உலோகத்தை மெல்லிய படலமாக படியச்செய்து, முகம் பார்க்கும் கண்ணாடியாக மாற்றுகிறார்கள். பேருந்து, மகிழுந்து மற்றும் மோட்டார் சைக்கிள் களில் பயன்படுத்தப்படுபவை `குவி ஆடிகள்' எனப்படும். இவை, அதிகப் பரப்பிலுள்ள பொருள்களை சிறிய பிம்பங்களாகக் காட்டும் இயல்புடையன.

உலோகங்கள் அதிக எதிரொலிப்புத் தன்மையைக் கொண்டு விளங்குவதால், நம் முன்னோர்கள் அவற்றையே ஆடிகளாகப் பயன்படுத்தினர். ஏசு பிறப்பதற்கு முன்பே எகிப்தியர்கள், கிரேக்கர்கள், ரோமானியர்கள், இந்தியர்கள் ஆகியோர் வெண்கலத்தால் ஆன ஆடிகளைப் பயன்படுத்தியதாகத் தெரிகிறது. அதிக விலைமிக்கதும், வேலைப்பாடுகளும் கொண்ட ஆடிகள், நன்கு மெருகூட்டப்பட்ட வெள்ளியால் செய்யப்பட்டன.

கண்ணாடியில் வெள்ளியை மெல்லிய பூச்சாகப் படியவைக்கும் முறையைக் கண்டுபிடித்தவர், வான் லைபிக். நாம் தினமும் பயன்படுத்தும் கண்ணாடிகளை உருவாக்க இந்த முறை தான் இன்றும் கடைப்பிடிக்கப்படுகிறது.