பிறரிடம் நீங்கள் எப்படி பழகுகிறீர்கள்?

நீங்கள் பிறரிடம் எப்படிப் பழகுகிறீர்கள் என்பதை வைத்தே உங்களை மற்றவர்கள் மதிப்பிடுவார்கள். நீங்கள் நல்லவரா? கெட்டவரா? என்பதை நீங்கள் பழகும் விதம், உங்களது செயல்பாடு, சொல், உங்களது நடத்தை இதை வைத்தே அமைந்திருக்கும்.

உங்களிடம் சிலர் கடுமையாக நடந்து கொள்ளும்போது உங்கள் பங்களிப்பு என்ன?

1. அவரது நடத்தையால் பாதிக்கப்பட்டு மனச்சோர்வு அடைகிறீர்களா?

2. பதிலுக்கு அவரிடம் நீங்களும் கடுமையாக நடந்து கொள்கிறீர்களா?

3. அவரது போக்கு உங்களுக்கு ஏமாற்றத்தை தருகிறதா?

4. அவரை நேரில் சந்திக்க முடியாமல் தப்பித்தால் போதும் என்று அந்த இடத்திலிருந்து ஓடி விடுவீர்களா?

5. இனி இந்த மாதிரி நடைபெறாவண்ணம் முன் ஜாக்கிரதையாக நடந்து கொள்ள வேண்டும் என்று நினைக்கிறீர்களா?

6. அவரை வாய்க்கு வந்தபடி திட்டித் தீர்த்து விடுவீர்களா?

7. இப்படி எல்லாம் நடந்து கொள்ளக்கூடாது என்று அவருக்கு அட்வைஸ் செய்வீர்களா?

இவை எதுவுமே உங்கள் பிரச்சனைக்குத் தீர்வாகாது.

அந்த நபரின் கடுமையான போக்கை இப்படி எதிர்கொள்ளப் பாருங்கள்.

1. உங்களைக் கடுமையாக விமரிசனம் செய்வதாக நினைத்துக் கொண்டு அவர் இப்படி நடந்து கொண்டிருக்கலாம்.

2. ஏன் அவரது இந்த விமரிசனத்தைப் பெரிதாக நினைத்துக் கொள்கிறீர்கள்?

3. அவருக்கு மன இறுக்கமோ, அல்லது ஏமாற்றமோ ஏற்பட்டிருக்கலாம். அந்த மனநிலையில் உங்களைச் சந்திக்கும்போது உங்களிடம் அவர் கடுமையாக நடந்து கொண்டிருக்கலாம் அல்லது விவேகம் இல்லாமல் நடந்து கொண்டிருக்கலாம்.

4. அவர் வாழ்ந்த முறை அப்படி இருக்கலாம்.

5. எப்போதுமே அவர் இப்படித்தான். பிறரிடம் கடு, கடு, சிடு, சிடென என்றே நடந்து கொள்வார்.

6. அந்த நபர் மற்றவர்களைச் சரியாகப் புரிந்து கொள்ளாமல் இருக்கலாம்.

7. தங்களது மனப் போக்கு, சூழ்நிலை பற்றிய தெளிந்த அறிவு இல்லாமல் நடந்து கொண்டிருக்கலாம்.

8. மற்றவர்களின் கடுமை யான போக்கை சமாளிக்க, எதிர்கொள்ள உங்களுக்குக் கிடைத்த வாய்ப்பாக அதனைக் கருதுங்கள்.

9. “போற்றுவார் போற்றட்டும் தூற்றுவார் தூற்றட்டும்
போகட்டும் கண்ணனுக்கே”

என்ற மனநிலையை நீங்கள் வளர்த்துக் கொண்டு, எதிராளியின் இந்தக் கடுமையான போக்கினை லேசாக எடுத்துக் கொள்ளும் மனப் பக்குவத்தை வளர்த்துக் கொள்ளுங்கள்.

10. “பகைவனுக்கு அருள்வாய் நன் நெஞ்சே”

என்று பாரதியார் சொன்னதுபோல, உங்களிடம் கடுமையாக நடந்து கொள்பவரிடம் அன்பு காட்டுங்கள். அன்பு அனைத்தையும் சாதிக்கும். மற்றவர்களை உங்கள் பால் ஈர்க்கும் கடுமையான சக்தி.

இனி யாராவது உங்களிடம் கடுமையாக நடந்து கொள்ளும் போது அதனால் விரக்தி அடையாமல், கோபப்படாமல், லேசாகச் சிரித்து விட்டுப் போங்கள். உங்கள் புன்சிரிப்பு உங்களுக்கும் நல்லது. அவரது நடத்தை உங்களை ஒருபோதும் பாதிக்காது. அவரும் தன் தவறை உணர்ந்து திருத்திக் கொள்ள வாய்ப்பு கிட்டும்.

பிறரது கடுமையான போக்கை ஜீரணிக்கக் கற்றுக் கொண்டு விட்டீர்களானால், உங்களை யாராலும் அசைக்க முடியாது. நீங்கள் ஜிதேந்திரியனாக (புலன்களை வென்றவர்) ஆகிவிடுவீர்கள்.