தூத்துக்குடியில் கப்பலையா எதிர்க்கிறீர்? இதோ வருகிறது, கார்!” -ஸ்ரீலங்கா

Viruvirupu, Friday 08 July 2011, 12:59 GMT

கொழும்பு, ஸ்ரீலங்கா: தூத்துக்குடிக்கும் கொழும்புக்கும் இடையே செல்லும் கப்பல் சேவை பற்றி சில வாரங்களுக்குமுன் சர்ச்சைகள் அடிபட்டது ஞாபகமிருக்கின்றதா? இந்தக் கப்பல் சேவையை நிறுத்த வேண்டும் என தமிழகத்தில் எதிர்ப்புக் குரல்கள் எழுந்தன. தமிழக முதல்வர் ஜெயலலிதாவும், இந்தக் கப்பல் சேவை நிறுத்தப்பட வேண்டும் என்று கருத்து தெரிவித்திருந்தார்.

இப்படியாக தமிழகத்தில் அரசியல் சர்ச்சைகள் அடிபட்டுக் கொண்டிருக்க, கொழும்பில் என்ன நடக்கிறது?

இந்தக் கப்பல் சேவையை புரொமோட் செய்யும் ஏற்பாடுகள் தீவிரமாக நடந்துகொண்டிருக்கின்றன. அதற்காக புதிய வசதி ஒன்றைப் பயணிகளுக்குச் செய்து கொடுக்கிறார்கள்.

இந்தியாவிலிருந்து கொழும்பு வரும் பயணிகள், தமது இந்திய வாகனங்களை தம்முடன் எடுத்து வரலாம் என அறிவிக்கப்பட்டுள்ளது. ஸ்ரீலங்கா போக்குவரத்து அமைச்சு இதற்கான நடைமுறைகள் அனைத்தையும் பூர்த்தி செய்து கொடுத்துவிட, சகல ஏற்பாடுகளும் ரெடி.

பயணிகள், தாம் வசிக்கும் இந்திய நகரத்திலிருந்து தமது கார் அல்லது SUV வண்டியில் தூத்துக்குடி துறைமுகம்வரை பயணம் செய்யலாம். துறைமுகத்தில் கப்பல் ஏறும்போது, தமது வண்டியை தம்முடன் கப்பலில் ஏற்றிச் செல்லலாம். (இலவசமாக என்று கூறப்படுகிறது) கப்பல் கொழும்புத் துறைமுகத்தில் பயணிகளுடன் வண்டியும் இறக்கப்படும்.

சொந்த வண்டியிலேயே ஸ்ரீலங்காவைச் சுற்றிப் பார்த்துவிட்டு, மறுபடியும் இந்தியா திரும்பும்போது கப்பலில் வண்டியுடன் போய்விடலாம்.

இதற்கு தேவையெல்லாம், பயணிகள் தமது வண்டிகளுக்கு இந்தியாவில் ஒரு பாஸ் (Carnet de Passage) எடுக்க வேண்டும். வெளிநாடுகளில் பயணம் செய்வதற்கும், டிரைவ் செய்வதற்கும் இந்த பாஸ் அவசியம். இந்தியாவில் இதை வழங்குவது, Automobile Association of India (AAI)

இந்த பாஸ் மற்றும் இந்திய டிரைவிங் லைசென்ஸ் இருந்தால், ஸ்ரீலங்காவில் வண்டியை டிரைவ் செய்யலாம்! பாஸ் கட்டணம் 5,000 இந்திய ரூபா.

இந்த சேவை தற்போதுதான் அறிமுகமாகியுள்ளது. இதுவரை இரண்டு பயணிகள்தான் தமது வண்டிகளுடன் கொழும்பில் போய் இறங்கியுள்ளனர். இதுபற்றிய விளம்பரங்கள் விரைவில் கொழும்பில் வெளியிடப்படவுள்ளதாகத் தெரிய வருகின்றது.

கப்பலில் செல்லும்போது வண்டிகள் புகையைக் கிளப்பாதுதான். ஆனால், கொழும்பு செல்லும் கார்கள் தமிழகத்தில் அரசியல் சர்ச்சைகளைக் கிளப்புமா?

அரசியல்வாதிகளைத்தான் கேட்க வேண்டும்! (இன்னமும் யாருக்கும் தகவல் கிடைக்கவில்லை போலிருக்கே!)

தகவல் கிடைத்தது பகிர்ந்தமைக்கு நன்றி...