அன்னா ஹசாரேக்கு ஆதரவாக 80 அடி உயர பேனரில் ஏறி வாலிபர் நூதன போராட்டம்

சென்னை : திருவான்மியூர் ரயில் நிலையம் அருகே 80 அடி உயர விளம்பர பேனரில்
ஏறி நின்று, அன்னா ஹசாரேக்கு ஆதரவாக உயிர் விடப்போவதாகவும், தனது உடலை
வைத்து குரல் கொடுக்கும்படியும் ஒரு வாலிபர் போராட்டத்தில் ஈடுபட்டார்.
வலுவான லோக்பால் மசோதாவை தாக்கல் செய்ய மத்திய அரசை வலியுறுத்தி சமூக
சேவகர் அன்னா ஹசாரே உண்ணாவிரதம் இருந்து வருகிறார். இதற்கு நாடு முழுவதும்
ஆதரவு பெருகி வருகிறது.

இந்நிலையில், நேற்று காலை 9 மணியளவில்,
திருவான்மியூர் ரயில் நிலையம் அருகே சக்திவேல் என்ற வாலிபர், கையில் தேசிய
கொடியுடன் வந்து அங்கிருந்தவர்களிடம் துண்டு பிரசுரம் ஒன்றை
வினியோகித்தார். அதில் எழுதப்பட்டிருந்ததாவது:

இந்திய ஊழல் எதிர்ப்பு இயக்கம்!
மத்திய அரசை வன்மையாக கண்டிக்கிறேன்.
மத்திய அரசே, மத்திய அரசே இன்னும் ஏன் மவுனமாக இருக்கிறாய், மக்களின் உயிர் வேண்டுமா உனக்கு,
அன்னா ஹசாரே உயிர் துறக்கும் முன்னால் என் உயிரை தருகிறேன்.

நான் சிந்தும் ஒவ்வொரு துளி ரத்தமும் என் தேசிய உணர்வை வெளிப்படுத்தும். நான் தேசத்துக்காக என் உயிரை கொடுக்கிறேன்.
மக்களே
மக்களே நீங்கள் என் ரத்தத்தை வைத்து உரிமைக்குரல் கொடுங்கள். அது மத்திய
அரசின் காதில் கேட்கட்டும். மத்திய அரசை வன்மையாக கண்டிக்கிறேன்.
இவ்வாறு எழுதப்பட்டிருந்தது.

துண்டுபிரசுரங்களை
வினியோகித்து முடிந்ததும் அங்கிருந்து 80 அடி உயர விளம்பர பேனரில் மின்னல்
வேகத்தில் ஏறினார் அந்த வாலிபர். கையில் தேசிய கொடியை பிடித்தபடி மேலே
நின்று கீழே குதிக்கப்போகிறேன் என்று சத்தம் போட்டார். இதனால் அப்பகுதியில்
பெரும் பரபரப்பு ஏற்பட்டது. தகவல் அறிந்து திருவான்மியூர் போலீசார்,
ரயில்வே போலீசார் மற்றும் தீயணைப்பு படை வீரர்கள் சம்பவ இடத்துக்கு
விரைந்து வந்தனர். சக்திவேலை சமாதானப்படுத்தும் முயற்சியில் ஈடுபட்டனர்.
அப்போது அவர் முதல் அமைச்சர் ஜெயலலிதா இங்கு வந்தால்தான் கீழே இறங்குவேன்
என்றார்.

உடனே போலீசார், “உனது கோரிக்கையை அவரிடம் தெரிவிக்கிறோம்
கீழே இறங்கி வந்து விடு“ என்றனர். ஆனால் அவர், ‘எனக்கு சமமாக பேசுவதற்கு
கமிஷனர் அல்லது உதவி கமிஷனரையாவது வரச் சொல்லுங்கள். அவர்களிடம்தான் நான்
பேச முடியும்“ என்றார். இதை கேட்டதும் ஒரு எஸ்.ஐ., மற்றொரு எஸ்.ஐ.யை
காண்பித்து ‘இவர்தான் உதவி கமிஷனர், பேசு‘ என்றார்.

உடனே கோபமடைந்த
வாலிபர், “உதவி கமிஷனருக்கு எத்தனை ஸ்டார் இருக்கும் என்று எனக்குத்
தெரியாதா? என்னை ஏமாற்றாதீர்கள்“ என்று கத்தினார்.
இதையடுத்து,
திருவான்மியூரில் உண்ணாவிரதம் இருந்து வரும் ஊழல் எதிர்ப்பு இயக்கத்தை
சேர்ந்த வெங்கட நாராயணன், சம்பவ இடத்துக்கு வந்து அவருடன் பேச்சுவார்த்தை
நடத்தினார். இதில் சமாதானம் அடைந்த சக்திவேல், பகல் பனிரெண்டரை மணிக்கு
கீழே இறங்கி வந்தார்.

மூன்றரை மணி நேரம் நடந்த இந்த சம்பவத்தால்
அப்பகுதியில் போக்குவரத்து ஸ்தம்பித்தது. அவரிடம் போலீசார் விசாரித்தபோது,
சேலையூர் அடுத்த அகரம்தென் பகுதியை சேர்ந்த ஆட்டோ டிரைவர் என்று தெரிய
வந்தது. உண்ணாவிரதம் இருந்தவர்களுடன் அவரும் சென்றார்.

தினகரன்