ஆபரேஷன் தியேட்டரில் செல்போன்களை,திருடிய டாக்டர் கைது : சிறையிலடைப்பு

kitcha · kitcha Wed 21 Sep 2011 - 11:50

பெரும்பாக்கம் மருத்துவமனையின் ஆபரேஷன் தியேட்டரில் டாக்டர்களின் செல்போன்களை திருடிய டாக்டரை ரகசிய கேமரா காட்டிக்கொடுத்தது. அவரை போலீசார் கைது செய்து 3 செல்போன்களை மீட்டனர்.

சென்னையை அடுத்த பெரும்பாக்கத்தில் தனியார் மருத்துவமனை உள்ளது. இந்த மருத்துவமனையில் ஆபரேஷன் செய்யும் போது டாக்டர்களின் செல்போன்கள் மாயமாகி விடுவதாக மருத்துவமனை நிர்வாகத்துக்கு புகார்கள் வந்தன. இது பற்றி பள்ளிக்கரணை போலீசில் புகார் செய்யப்பட்டது.

இதன்பேரில் போலீஸ் இன்ஸ்பெக்டர் சகாதேவன் வழக்குப்பதிவு செய்து விசாரணை நடத்தினார்.

மருத்துவமனையின் ஆபரேஷன் தியேட்டரில் வைக்கப்பட்டு இருந்த ரகசிய கேமராவை போட்டு பார்த்தார்கள். இதில் மருத்துவமனையில் பணியாற்றிய டாக்டர் ஒருவர் செல்போன்களை திருடும் காட்சி பதிவாகி இருந்தது.

இந்த துப்பு மூலம் விசாரணை நடத்தியதில் செல்போன்களை திருடியது, மருத்துவமனையில் எலும்பு முறிவு டாக்டராக பணியாற்றிய பிரகாஷ் நாராயணன் என தெரியவந்தது.

சென்னை திருவல்லிகேணியில் வசிக்கும் அவர் கடந்த 2-ந் தேதி தான் இந்த மருத்துவமனையில் டாக்டராக பணி அமர்த்தப்பட்டார். அவரிடம் இருந்த 3 செல்போன்கள் பறிமுதல் செய்யப்பட்டது.

பின்னர் டாக்டர் பிரகாஷ்நாராயணனை போலீசார் கைது செய்து கோர்ட்டில் ஆஜர்படுத்தி சிறையில் அடைத்தனர்.

நக்கீரன்