6 புதிய அமைச்சர்கள் இன்று பதவி ஏற்பு

புதியதாக நியமிக்கப்பட்ட 6 அமைச்சர்கள் கவர்னர் மாளிகையில் இன்று (ஞாயிற்றுக்கிழமை) பதவி ஏற்கிறார்கள். அவர்களுக்கு கவர்னர் ரோசையா பதவி பிரமாணம் செய்துவைக்கிறார்.

6 புதிய அமைச்சர்கள்

தமிழக அமைச்சரவை நேற்று முன்தினம் 3-வது முறையாக மாற்றம் செய்யப்பட்டது. அமைச்சர்களாக இருந்த சி.சண்முகவேலு, ஆர்.பி.உதயகுமார், எஸ்.பி.சண்முகநாதன், என்.ஆர்.சிவபதி, ஜி.செந்தமிழன், புத்திசந்திரன் ஆகிய 6 பேர் பதவி நீக்கம் செய்யப்பட்டனர்.

அதற்கு பதிலாக புதிய அமைச்சர்களாக கிணத்துக்கடவு தொகுதி சட்டமன்ற உறுப்பினர் எஸ்.தாமோதரன், நன்னிலம் தொகுதி சட்டமன்ற உறுப்பினர் ஆர்.காமராஜ், பரமக்குடி தொகுதி சட்டமன்ற உறுப்பினர் டாக்டர் எஸ்.சுந்தரராஜ், திருச்சி மேற்கு தொகுதி சட்டமன்ற உறுப்பினர் எம்.பரஞ்சோதி, மாதவரம் தொகுதி சட்டமன்ற உறுப்பினர் வி.மூர்த்தி, சிவகாசி சட்டமன்ற உறுப்பினர் கே.டி.ராஜேந்திரபாலாஜி ஆகியோரை புதிய அமைச்சர்களாக முதல்-அமைச்சர் ஜெயலலிதா நியமித்துள்ளார்.

புதிய அமைச்சர்களில் எஸ்.தாமோதரனுக்கு வேளாண்மைத்துறையும், ஆர்.காமராஜ×க்கு உணவுதுறையும், டாக்டர் எஸ்.சுந்தரராஜ×க்கு கைத்தறி மற்றும் ஜவுளித்துறையும், எம்.பரஞ்சோதிக்கு சட்டம் மற்றும் இந்து அறநிலையத் துறையும், வி.மூர்த்திக்கு பால்வளத்துறையும், கே.டி.ராஜேந்திரபாலாஜிக்கு செய்தித்துறையும் ஒதுக்கப்பட்டுள்ளது.

இன்று பதவி ஏற்பு

புதிய அமைச்சர்கள் பதவி ஏற்பு விழா இன்று (ஞாயிற்றுக்கிழமை) மாலை 3 மணிக்கு கவர்னர் மாளிகையில் உள்ள தர்பார் மண்டபத்தில் நடைபெறுகிறது. கவர்னர் ரோசையா புதிய அமைச்சர்களுக்கு பதவிப்பிரமாணமும், ரகசிய காப்பு பிரமாணமும் செய்துவைக்கிறார்.

முதல்-அமைச்சர் ஜெயலலிதா முன்னிலையில் 6 புதிய அமைச்சர்களும் பதவி ஏற்கிறார்கள். இந்த விழாவில் சபாநாயகர் ஜெயக்குமார், மற்றும் அமைச்சர்கள், அ.தி.மு.க. எம்.எல்.ஏ.க்கள், எம்.பி.க்கள், அதிகாரிகள் முக்கிய பிரமுகர்கள் கலந்து கொள்கிறார்கள்.
தினதந்தி