நீரிழிவு நோய்- கண் பார்வை குறைவு

சர்க்கரை நோயால் கண்களில் ஏற்படும் பாதிப்புகள் என்ன?

1. கண் வெளிப்புறம் (இமைகள் மற்றும் வெள்ளைத் தோலில்) கிருமி பாதிப்புகள் 2. கண்புரை நோய் உண்டாகுதல் மற்றும் முற்றுதல் 3. விழிதிரை பாதிப்பு (டயபடிக் ரெடினோபதி) 4. கண் நரம்புகள் பாதித்து, இரட்டை பார்வை உண்டாகுதல்.

நீரிழிவு நோயாளிகளுக்கு கண் அறுவை சிகிச்சை......

நீர்ழிவு நோயாளிகளுக்கு செய்யப்படும் கண்புரை அறுவைச் சிகிச்சை மற்ற நோயாளிகளுக்கு செய்வதை விட கவனமாக செய்ய வேண்டும். முதலில் ரத்தத்தில் உள்ள சர்க்கரை அளவு குறைக்கப்பட வேண்டும். வேறு தொற்று நோய்கள் இருப்பின், அவற்றை குணப்படுத்த வேண்டும். நீரிழிவு விழித்திரை நோய் இருந்தால் லேசர் சிகிச்சையை முதலில் அளித்த பிறகு கண்புரை அறுவைச் சிகிச்சை செய்ய வேண்டும்.

இதன் மூலம் கண்புரை அறுவை சிகிச்சைக்கு பின், விழித்திரை நோய் மேலும் தீவிரமடையாமல் பார்த்து கொள்ளலாம். கண்புரை அறுவை சிகிச்சைக்கு பின்னும் விழித்திரை பரிசோதனை தொடர்ந்து செய்ய வேண்டும்.

சர்க்கரை நோயால் விழித்திரை எவ்வாறு பாதிக்கப்படுகிறது?

கண்ணை ஒரு காமிராவுக்கு ஒப்பிட்டால் விழித்திரையை காமிராவுக்குள் இருக்கும் படச்சுருளுக்கு ஒப்பிடலாம், படச்சுருள் நன்றாக இருந்தால் தான் அதில் விழும் நிழற்படமும் நன்றாகத் தெரியும். அதே போல் விழித்திரை நன்றாக இருந்தால் தான்.

அதில் விழும் உருவங்களும் நன்றாகத் தெரியும். சர்க்கரை நோயால் விழித்திரையில் உள்ள ரத்த நாளங்கள் பழுதடைந்து ரத்தக்கசிவு ஏற்படுவதால் விழித்திரை பாதிக்கப்படுகிறது. சர்க்கரை நோயினால் பார்வையிழப்பு யாருக்கும் ஏற்படலாம். ஆனால் யாருக்கு விழித்திரை பாதிக்கப்படும் என்பதைக் கூறுவது கடினம்.

எவருடைய விழித்திரை பாதிப்படையும்?

* 5 முதல் 10 வருடங்களாக சர்க்கரை நோயால் பாதிக்கப்பட்டவர்கள்.

* 50 வயதிற்கு மேற்பட்ட சர்க்கரை நோயாளிகள்.

* இன்சுலின் சார்ந்த சர்க்கரை நோயாளிகள்

* சர்க்கரை நோயுடன் ரத்த அழுத்தம், குடிப்பழக்கம், புகைப்பிடிக்கும் பழக்கம் உள்ளவர்கள்.

சர்க்கரை நோயினால் ஏற்பாடும் பார்வையிழப்பைத் தடுக்க முடியுமா?

* நிச்சயமாக முடியும். அடிக்கடி கண் மருத்துவரை கலந்தாலோசித்து, தக்க தருணத்தில் கண்டுபிடித்து உரிய சிகிச்சை மேற்கொண்டால் இருக்கும் பார்வையை பாதுகாத்துக் கொள்ள முடியும்.

* இழந்த பார்வையை மீண்டும் பெறுவது கடினம்.

* விழித்திரை பாதிக்கப்பட்டிருந்தால் மருத்துவரின் ஆலோசனைப்படி தொடர் பரிசோதனையும் தேவைப்பட்டால் லேசர் சிகிச்சையும் மேற்கொள்வது பார்வையிழப்பைத் தடுக்க சிறந்த வழி.

சர்க்கரை நோயாளிகளின் கவனத்திற்கு?

* சர்க்கரை நோயாளிகளுக்குப் பார்வைக் கோளாறு ஏற்படும் வாய்ப்பு மற்றவர்களை விட 2 மடங்கு அதிகம்.

* முன் அறிகுறி ஏதுமின்றி பார்வை குறைய வாய்ப்புகள் அதிகம்.

* விழித்திரையில் ஏற்படும் மாறுதல்களை, கண் மருத்துவரால் மட்டுமே பரிசோதித்து அறிய முடியும்.

* விழித்திரை பாதிப்பை ஆரம்ப நிலையிலேயே கண்டுபிடிப்பது அவசியம்.

* சர்க்கரை நோயாளிகள் ஆறு மாதத்திற்கு ஒருமுறை கண் பரிசோதனை செய்து கொள்ள வேண்டும்.

விழித்திரை பாதிப்பு உள்ளவர்கள் செய்ய வேண்டியது என்ன?

* நோய்க் கட்டுப்பாடு

* ரத்தத்தில் சர்க்கரையில் அளவை கண்காணித்தல்

* அடிக்கடி தொடர் கண் பரிசோதனை செய்து கொள்ளுதல்

மாலைமலர்